Read Uab Meto YEREMIA 15 Bible Online

YEREMIA 15 - Uab Meto bible

YEREMIA 15

¹UISNENO nakua In a'an neu kau nak, “Au of ka nek umnau fa uf i, maski Nai Musa ma Nai Samuel sin anhake anbi i ma natoti Au lasi amnaut ma manekat neu sin. Amlelu uf i he sin nao nai, Au ka lomi fa he kiso sin!

²Kalu sin natoti neu ko nak sin of he nao neu me, mutae sin mak on i, ‘UISNENO nakua In a'an nak, le anlek sin hen mate natuin menas maut he sin anmate natuin menas. Le anlek sin hen mate natuin makenat maut he sin anmate natuin makenat. Le anlek sin hen mate natuin amnahas maut he sin anmate natuin amnahas! Le anlek sin he nis sin anbi makenat maut he neki sin anao on atoni le nis nan sin anbi makenat!’

³Au, UISNENO Kau, Au lek ulali kasat nono ha le neki lasi amtaus of anbol nem neu sin; sin of anmate anbi makenat nanan, sin aon nitu asu of anhel sin, kolo neku sin, ma mu'it abulalut of neku nani sin ok-oke.

⁴Of Au mo'e ale uf anbi pah pinan namtau leka ankiso sin. Ale nane Au mo'e ani natuin mo'et na'ko Nai Manasye Nai Hizkia anmone anbi Yerusalem anbi tabu in anfani kesel anbi Yehuda.”

⁵UISNENO nakua In a'an nak, “Hoi tuafen Yerusalem, sekau ka es anlomi he in nekan nasusbon nok ki? Sekau ka es anlomi hen senu ki he natoti ki neu hi monim?

⁶Him tite milali Kau ma misaitan Kau, es nane te Au aiti Au nukuk he uskuku ule'un ki, natuin Au ka lomi fa he ek Au to'as.

⁷Anbi ale kot anbi pah i of Au polin ki on ane ta'u. Maski Au to es ki mes of Au ule'un ki ma hi anah-anah sin natuin hi kam lomi fa he mite'un hi monin.

⁸Hi pah of nahenu nok bife banu, nesi na'ko snaen anbi tasi ninen. Atoni-atoni of Au umate sin anbi tabu fe sin munif talan te sin ainaf sin namtau ma kan tainine fa. Anbi manas Au fe neu sin atoni abulalut talantia sin namtau ma kan tainine fa.

⁹Ainaf le in anah sin mone hitu namneku oke fun in anmafus natuin in snasan na'lel. In neno honis nane ansanu nalali, in naben nasi'u in ma namaeba in. Hi musu-musu sin Au lelu sin he namate le fe anmoni anbi in sonam hi atnanam. Au, UISNENO Kau, ukua ulali Au a'ak.”

¹⁰Namneo au ka is fa sa'-sa'! Au aina nahonis kau neu sa' ka? Au ok sin le anbi pah i hai of amatoe ma amaban. Maski es kan fe neu kau fa sa'-sa' es ai kau ka fe fa sa'-sa' neu es, mes atoni ok-oke ansukat kau.

¹¹Koi UISNENO, kalu namneo au ka unaoba fa au mepu nok alekot, ma au ka pesi fa musu-musu sin anbi Ho humam anbi tabu sin napeni amle'ut ma susal, namaut nai sukat na'ko atoni-atoni nane namneo-namneo anbol. (

¹²Katit fa atoni mese amsa nabe'i an ipu besi, nes-nesi besi na'ko aon bian a'li le anselo nalali nok noni molo.)

¹³UISNENO nakua In a'an neu kau nak, “Of Au sonu musu he naiti mu'if ma maus na'ko Au to on kasat neu sin natuin sanat-sanat le sin anmo'e nalali anbi pah i ok-oke.

¹⁴Anbi atoni sin pah le sin ka nahin nani fa, of Au mo'e sin anfani ate neu sin musu-musu sin, natuin Au to'as nanua' nalali on ai le anpin a'naek ma kan sifo nabe'i fa.”

¹⁵Oke te Au ak, “Koi UISNENO, Ho muhin. Mumnau kau ma ambab kau fa. Amseunbanin neu sin nai le sin anli'u ma anhamu'i kau. Kais hom neka none bainesi neu sin talan te sin namate kau. Mumnau kau nai fun natuin Ho onane te sin nasi'u kau.

¹⁶Ho mukua Ho a'am neu kau, ma au nen ale Ho a'am nane. Ho ini es kau, koi UISNENO Akuasat Afinit, es nane te Ho a'am anhalin kau ma neki ua alekot neu kau.

¹⁷Au ka ok fa he umlil ma u'uab ok ale atoni le nabua neu he namolkin. Natuin au ufnek neu Ko, onane te au pesbiaok nok nek to'as.

¹⁸Nansa' au ususbok piut? Nansa' au papa' nanae ma kan lomi fa he naleko? Ait Hom lomi he muoleb au nekak on noe le anmeto anbi tabu fauknais?”

¹⁹UISNENO natae nak, “Kalu hom fani aum, of Au simo ko. Of hom fani Au ate anteni. Kalu hom saksi ma muton lasi-lasi maota ma ka lasi uab luman fa, nabe'i hom fani Au Mafefa knino anteni. Atoni-atoni sin of nem neu ko anteni, ma ka nabe'i fa he hom nao neu sin.

²⁰Of Au mo'e ko on baki lape noni molo neu sin. Sin of anken ko, mes sin of ka nis ko fa. Of Au ok ko he uhafo ko ma ufetin ko.

²¹Of Au ufetin ko na'ko kuasat atoni-atoni amle'ut ma abulalut sin. Au, UISNENO Kau, Au ukua ulali Au a'ak.”