Read Uab Meto YEREMIA 16 Bible Online

YEREMIA 16 - Uab Meto bible

YEREMIA 16

¹UISNENO nakua In a'an neu kau anteni nak,

²“Kais ho mafe he mupeni anah anbi bale i.

³Of Au uton neu ko sa' le of anbol neu anah-anah le nahonis sin anbi i ma nok sin mnasi sin.

⁴Sin of anmate natuin menas antoman sin le neki lasi maten, ma of sin anmaten anbi makenat nanan ai anmate natuin amnahas. Es amsa of kan kae fa neu sin ai kan sub fa sin amsa. Sin aon nitu of nasan'ok on baluf anbi nain, ma kolo ma mu'it abulalut of neku nani sin.

⁵Yeremia, kais hom nao neu ume le fe anbi susal. Kais ho nekam nasusbon neu sekau amsa. Of Au ka fefa tetus neu Au to sin anteni eki lasi alekot, ma of Au ka ulile fa nek leko ai amnaut ma manekat neu sin amsa.

⁶Atoni amu'it ma atoni anukat anbi pah i of sin anmate ma katit fa es hen sub sin. Katit fa es amsa hen hamu'i in aon ai an eu in nakan funu on a taka nak susal neu sin.

⁷Katit fa es amsa hen mo'e lasi leko neu he namela asusat sin. Katit fa esle' he nok anbi susal ai he nok atoni le amaf ai in ainaf namneku.

⁸Kais amtam neu ume atoni le fe anmo'e fesat. Kais ho muah ma minu mok sin.

⁹Amnen nai sa' le Au, UISNENO Akuasat Afinit Israel, le Au he uton neu ko. Hanaf amlilat ma amoket ma fesat kabin alekot of Au usnasab ani ok-oke. Lasi nane atoni-atoni le anmoni anbi batan i of ansaksi nani.

¹⁰Leko ho mutiaba ale lasi i ok-oke neu sin, oni of sin natoti nak nansa' Au lomi he kas sin matani onle nane. Of sin natoti nak sin antanhai sa' ma sin nasanab sa' neu Kau, sin UISNENO.

¹¹Muton nai neu sin mak Au ukua Au a'ak on i, ‘Hi amaf sin nasaitan nalali Kau, ma anlomi he naluli ma nabes neu ale uisneno teta. Sin kan sian Kau fa ma kan lomi fa he natuin ale Au plenat sin.

¹²Mes hi mo'e amle'ut nesi anteni na'ko sin. Hi nakam fatu ma al mituin hi lomim amle'ut kun. Hi kam lomi fa he mituin Kau.

¹³Es nane te of Au li'u ki na'ko pah i ma Au polin ki neu pah mese le hi ka mihin mani fa ma hi amaf sin amsa ka nahin nani fa. Anbi nane of hi miluli ma mibes neu uisneno teta fai manas, ma of Au ka nek umnau ki fa.”

¹⁴UISNENO nakua In a'an nak, “Of anbi neno amnemat kan mu'i fa atoni le hen sup anbi Au kanak, Uisneno amonit, le Au eki to Israel anpoi na'ko pah Mesir,

¹⁵so mak anbi Kau, Uisneno amonit, le Au eki to Israel anpoi na'ko pah mese anbi aon bian a'li ma na'ko pah-pah bian le Au usana ulali sin. Of Au eki ufani sin nem neu sin pah ma sin nifu, pah le Au fe ulali neu sin amaf sin.”

¹⁶UISNENO nakua In a'an nak, “Au he boin atifkais namfau hen heke atoni-atoni le i. Namuni te of Au boin ali'ut namfau hen li'u sin anbi tubu ma nuaf, ma anbi nuaf fatu sin a'bolan.

¹⁷Au it ale sa' le sin anmo'e. Katit fa le natol'on neu Kau; ale sin sanat-sanat sin amsa Au it ulali sin.

¹⁸Sin sanat ma sin mo'et amle'ut of Au seunbanin eki kasat kuni nua, natuin sin anhainisi Au pah neki le'u mahuma namfau. Ale le'u mahuma nane kan mu'i fa snasaf sin on amates.”

¹⁹Koi UISNENO, Ho es munini ma mumafo kau ma amfe be'it ma matani neu kau, Hom bab kau anbi tubu au susal nukat. Uf-uf of nem neu Ko na'ko pah-pah, ma na'uab nak hai na'i sin al anmui uisneno teta le namneo ka maota fa.

²⁰Nabe'i ka atoni pah pinan anmo'e kun sin uisneno fa? Namneo ai kahaf! Le sin anmo'e nane namneo-namneo ka Uisneno.”

²¹“Es nane te,” UISNENO nakua In a'an nak, “hae esle' i of Au mo'e uf-uf he naben nit Au kuasat ma Au matanik he nati' ante nabal-bal sin nahin nak Au UISNENO Kau.”