Read Uab Meto YEREMIA 17 Bible Online

YEREMIA 17 - Uab Meto bible

YEREMIA 17

¹UISNENO nakua In a'an nak, “Hoi uf Yehuda ho sanat matui nalalien anbi ho nekam ma anbi ale ho baki tulu sin si'un ok-oke neki tui besi le in matan nane na'ko baon kae in usan.

²Ho atoni-atoni sin, sin naluli anbi baki tulu ma anbi ale ni le'u mahuma le sin nahakeb nalali neu uisneno teta Bife Asyera anbi hau amliat anbi neten-neten sin tunan,

³ma anbi tubu-tubu sin tunan anbi kot in kotin. Natuin ale bale fuat neu le'u mahuma le hi mihakeb milali sin anbi pah nanan ok-oke ma natuin ale sanat le hi mo'e milali sin es nane te of Au mo'e hi musu-musu sin naiti neki ale hi maus ma hi mu'im.

⁴Of nok a seke hi mina'at hi pah le Au fe ulali neu ki, ma of Au mo'e ki ma him aetnom neu musu sin anbi pah le hi ka mihin fa. Au mo'e ale lasi nane ok-oke natuin Au to'as le nanua' on ai le anpin ma kat sifo tabe'i fa.”

⁵UISNENO nakua In a'an nak, “Leka atoni nasaitan Kau, in UISNENO, ma nafnek neu atoni pah pinan ma ansonlaiton neu in matanin, of Au kas in.

⁶In onle mana' ma luat le anmoni anbi mnela, anbi pah monas, le tena maten ma anmu'i masi, in ka napeni nit fa alekot.

⁷Mes atoni le nafnek neu Kau of Au fe neune tetus piut.

⁸In onle hau mese le anmoni anbi noe in ninen le oe ansai; in a ba'an antam antia oe. In ka namtausan fauknais, in non anomate piut. Maski pah anmeto anmate, in nekan ka naoni fa natuin in nafua piut.

⁹Nekaf atoni pah pinan kat su' tabe'i fa, in maekin matani le'uf kun na'ko ale sa' ok-oke ma in menas ma'fen le'uf kun.

¹⁰Au, UISNENO Kau, Au tae uhin nekaf, Au su' uhin atoni pah pinan sin nekan. Of Au seunbanin atoni mese-mese natuin in taos in mo'et, ma Au mo'e ani anmatom nok in mo'et.”

¹¹On kolo le in nu'u teko le ka ini fa, onane amsa atoni ka amneot in napeni maus. Anbi tabu in fe ka namnasi fa in a'maus of namneku ok-oke. Anbi neno in monin namsopu natonon nak in atoni amonot kun.

¹²Hit UISNENO In Ume Knino onle toko apinat, anbi tubu amnanut na'ko ahun-hunut.

¹³Israel, Ho to sin napane ma nafnek neu Ko, UISNENO; al sin le nasaitan Ko of sin namaebon. Sin of namneku na'ko pah pinan i ma of sin nao neu pah atoni amates. Natuin Ho oe mata honis Ko sin nasaitan nalali Ko, koi UISNENO.

¹⁴Koi UISNENO, muleko kau, onane te of au upeni aomina. Amfe neu kau aomina, onane te of au upeni aomina. Al Ho kum es au uliatas Ko!

¹⁵Atoni nak neu kau nak, “UISNENO In lasi salit nane ok-oke esme ka? Maut he In nanaoba nani nai anbi tabu le!”

¹⁶Mes, koi UISNENO, au ka useke it Ko fa he nati' Ho amfe amle'ut neu sin. Au amsa ka lomi fa he nati' Ho musanut susal mafena neu sin. Ho muhin lasi nane, koi UISNENO. Ho muhin sa' le au u'uab.

¹⁷Kais Hom fani on sa' esle' anhakatau au nekak. Hom fani on bale le au he utnani eu Ko leka kalu susal nem anbol.

¹⁸So nati' sin le anli'u kau ma anhamu'i kau, Ho mumaeba ma muhenu mani meki lasi amtaus. Mes kais anmo'e onane neu Kau, koi UISNENO. Musanut neu sin lasi amle'ut talan te sin namle'u naskuku anfini.

¹⁹UISNENO nakua In a'an neu kau nak, “Yeremia, amnao nai neu Eno Naek To le Kesel Yehuda sin antam nokan leka kalu sin-sin antam ma anpoi kot nanan. Amnao nai amsa neu eno naek bian anbi Yerusalem.

²⁰Mutiaba nai Au a'ak neu ale kesel sin ma neu ale atoni Yehuda ma neu ale tuafen Yerusalem le sin nao nok eno-eno nane.

²¹Mutan neu sin mak on i: ‘Kalu hi kam lomi fa he mate, kais hi maiti hi bale sin no Neno Snasat, ai hi meki hi bale sin amnao nok eno-eno naek Yerusalem.

²²Kais hi mepu ai hi meki hi bale sa'-sa' ampoi mi'ko hi ume anbi Neno Snasat amsa. Ambeti miteta neno nane neu Kau onle Au fe ulali plenat neu hi amfenu.

²³Mes hi amfenu kan lomi fa he nen ai hen simo sa' le Au uton ulali neu sin. Sin nakan fatu, ma kan lomi fa he natuin ai he nen fainekat.

²⁴Mituin nai ale Au plenat ok-oke. Kais meki hi bale sa'-sa' amsa hem nao mituin eno naek kot le i anbi Neno Snasat. Ambeti miteta, Neno Snasat neu Kau, ma kais hi mepu sa'-sa' amsa anbi neno nane.

²⁵Kalu namneo-namneo him tao mituin ale Au plenat sin le nane, ale kesel ma ana' aplenat le naplenat on Nai Daud of antam eno-eno naek kot Yerusalem. Sin nok atoni Yehuda ma tuafen Yerusalem, of ansae aklet bikase talan te Yerusalem nahenu nok amlilat ma amoket a'naek.

²⁶Ale atoni of nem na'ko kot-kot Yehuda, ma na'ko kuan-kuan funam natef Yerusalem; sin of nem na'ko pah Benyamin, na'ko bale anhaumak nuaf un, na'ko bale tubu tunan, ma na'ko Yehuda aon bian a'ne'u. Sin of neki nem neu Au Ume knino mu'it-mu'it tulu tnatas alekot, le he notu ai he kahaf, fua tulu ane kase ma fua tulu min fomeni fua tulu nekaf amlilat.

²⁷Fun ale nane of anbol leka hi mituin Au plenat, ma ambeti miteta Neno Snasat neu Kau. Kais hi meki ale hi bale sa'-sa' amsa amnao mok eno-eno naek Yerusalem anbi neno nane. Kalu hi amtanhai ale Au plenat-plenat sin le nane, ale eno-eno naek Yerusalem ma ale sonaf-sonaf sin of Au otu sin ok-oke ma ai nane of kan sifo nabe'i fa.’ ”