Read Uab Meto YEREMIA 18 Bible Online

YEREMIA 18 - Uab Meto bible

YEREMIA 18

¹UISNENO nakua In a'an neu kau nak,

²“Amnao nai neu ume atoni anmo'e nai'; anbi nane of Au utiaba neu ko Au han ba'an.”

³Au nao neu ume atoni anmo'e nai' ma Au it in fe anfatan mepu nai' nane.

⁴Leka nai' le fe anmepu nane ka naleko fa, in anmepu nafani nai' mese anteni anmatom nok le in anlomi.

⁵Oke te UISNENO anlelu kau ma au uton neu Israel ak,

⁶“Hoi Au to, ait ka nabe'i fa he Au tao ma mo'e neu ki onle anmo'e nai' nane nok afu kle'o nane? On le afu kleo' anbi atoni anmo'e nai' in niman, onane amsa hi ambi Au nimak.

⁷Kalu anbi neno mese Au ufek he usik, he utseleb ma ule'un uf mese anbi plenat mese,

⁸oke te uf nane nate'un na'ko in sanat, of Au hel ufani Au salit nane.

⁹Mes, leka Au ufek he uhakeb ai umepan uf mese ai plenat mese,

¹⁰mes namuni te uf nane ka natuin fa Au plenat oke te sin nao ma anmo'e amle'ut, onane te Au salit nane of Au hel ufani.”

¹¹UISNENO nakua In a'an neu kau nak, “Tabu i ho muton nai neu atoni-atoni Yehuda ma tuafen Yerusalem mak Au fe mo'e Au salit neu he laban sin, ma Au ulotan kasat neu sin. Amlenu sin he nasnasab sin monit asanat ma naleko sin taos sin mo'et.

¹²Mes sin of natae nak, ‘Maota fa sa' ka? Of hai mituin kim hai lomim piut! Hai mese-mese of hai mo'e mituin hai nekam in sinmakat amle'ut!’ ”

¹³UISNENO nakua In a'an nak, “Muton nai neu uf-uf mese-mese ai lasi onle i anbol nit fa. To Israel anmo'e nalali lasi le neki hakataus!

¹⁴Sen-sene ka namneku nit fa na'ko tubu fatu Libanon. Oe honis le ansai na'ko tubu tunan kan meti nit fa.

¹⁵Mes Au to nikan nalali Kau, ma notu atu fomeni neu le'u mahuma. Sin anpastun anbi lanan ahun-hunut le mes sin he nao nokan, oke te sin beo natuin lanan le fe ka nanel nani fa.

¹⁶Pah i sin anmo'e nalali anfani bale hakataus, ma in anfani uab si'u piut. Ale anaot le anao nok bale nane of sin anki'un sin a nakan natuin sin naben lasi amtaus.

¹⁷Onle afu skuku le anin na'ko neno saen anfu naki nani, onle nane Au to of Au una'at ani sin neu musu. Leka lasi amle'ut nane anbol nem, of Au koti sin ma ka bab fa sin!”

¹⁸Atoni na'uab nak, “Aim he hit neka bua het laban Nai Yeremia. Ka al fa in anmes nabe'i he na'uab antom Uisneno. Of anmu'i Ana' fuat knino piut le nabe'i anfe noina, anmu'i atoni nek mahine le nabe'i anfe fainekat; ma anmu'i Mafefa knino le nabe'i natiaba neu kit a'an knino na'ko Uisneno. Aim he hit tatlak in neu bale lef lasi ma kais atnen in uab in molok.”

¹⁹Ma au onen toti ak, “Koi UISNENO, amnen au onen totis nai, amkiso sa' le au musu sin na'uab antom kau!

²⁰Nabe'i ka lasi alekot anseunbanin neki lasi amle'ut? Mes sin anhani nalali bola' he nati' au mofu tam bi in nanan. Mumnau kau nai natuin au pesi ulali sin anbi Ho humam ma Ho matam, he nati' kais Ho muto'an sin.

²¹Mes tabu i, koi UISNENO, maut nai he nati' sin anah-anah sin anmate natuin amnahas ai anmate anbi makenat in nanan. Maut nai he nati' sin bife sin namneku natuin menas a'naek ma sin atoni munif sin anmate anbi makenat in nanan.

²²Amlelu nai asikat sin nem nok askeken neu sin ume, talan te sin anbai natuin sin namtau. Sin anhani nalali bola' he nati' au mofu tam bi in nanan, ma sin natetu nalali kleot he nati' sin anheke kau.

²³Mes Ho, koi UISNENO, Ho muhin ale lasi ok-oke le sin ansali he nasopu au monik. Es nane te, kais Hom sako sin sanat; kais Hom nose muneku sin tanhais. Amkiso sin nai talan te sin anbel. Amtao ma mo'e nai neu sin anbi Ho to'as in nanan.”