Read Uab Meto YEREMIA 19 Bible Online

YEREMIA 19 - Uab Meto bible

YEREMIA 19

¹UISNENO anlelu kau he nao ma sos a'nai', ma au hone ana' aplenat fauk-fauk le namnasi,

²he au nao nok sin bua'-bua neu Nonof Hinom amnao mok Eno Naek Beling. Anbi nane au mes he uton ani sa' le In anba'an nalali neu kau.

³Au mes he u'uab on i, “Hoi Kesel Yehuda sin ma tuafen Yerusalem! Amnen nai sa' le Au, UISNENO Akuasat Afinit Israel, le he uton neu ki. Of Au fe neu ki amle'ut ma susal mafena naek neu bale i talan te atoni le sin nen of naskek.

⁴Lasi nane Au tao ma mo'e natuin uf i nasaitan nalali Kau. Sin nalahi bale i natuin sin natulu fua tulu neu ale uisneno teta le sin ka nahin nani fa, fun sin amaf sin ma Kesel Yehuda sin. Sin amsa nalahi bale i neki na' atoni-atoni le ka nasanab fa.

⁵Sin nahakeb baki tulu neu Baal he natulu sin anah sin on fua tulu mnotu, mes lasi nane Au ka lelu it fa sin hen tao ma anmo'e lasi nane, fun nesi na'ko nane lasi onle nane kan moni nit fa anbi Au tenab.

⁶Es nane te, of antia in tabu bale i kan tek anteni fa nak Tofet ai Nonof Hinom, mes antek nak Nonof Malolot.

⁷Anbi bale i of Au ule'un ani ale sin salit ok-oke na'ko atoni Yehuda ma tuafen Yerusalem. Of Au ufetin sin he nati' sin musu-musu sin nis ma anbe'u sin ma namate sin anbi makenat in nanan. Sin aon nitu of Au ufetin ani he nati' kolo neku nani ma mu'it abulalut neku nani sin amsa.

⁸Of Au fe nem neu sin amle'ut ma susal mafena le manenu le'uf kun neu kot le i talan te sekau anao nok bale nane of naskek ma namtau.

⁹Musu of an amu nan kot le i, sin nahelnok he namate kot le i sin tuakenu. Sin an amu nan kot nane nok matani, talan te atoni-atoni anbi kot nane in nanan sin neku anmafani es nok es, ma nesi na'ko nane sin neku nani sin anah-anah sin amsa.”

¹⁰Nalali te UISNENO anlelu kau he au upe' a'nai' nane anbi atoni-atoni le sin natuin kau anbi sin matken.

¹¹Au mes he uton neu sin ak UISNENO Akuasat Afin-finit nakua In a'an nak on i, “To ma kot le i of Au ule'un uskuku ani talan te anfani onle nai' le anpe' nane le ka nabe'i fa he taleko ateni. Atoni of ansub in aon nitu nane anbi Tofet, natuin kan mu'i anteni fa bale nitu nate bian.

¹²Kot le i nok in tuafen of Au mo'e sin on Tofet.

¹³Ale ume anbi Yerusalem ma ale Kesel Yehuda sin ume of anfani mainisit on Tofet; natuin anbi ale ume nane sin a'pupun sin notu nalali atu fomeni neu uisneno teta abit neno atnanan, ma natulu fua tulu tua mina mtasa neu uisneno teta bian anteni.”

¹⁴Oke te au usaitan Tofet, bale le anlelu kau he utiaba UISNENO In a'an. Au nao neu po'an Ume UISNENO ma au hake bi nane, ma au uton neu ale

¹⁵atoni sin ak UISNENO Akuasat Afinit Israel, nakua In a'an nak on i, “Natuin hi nakam fatu ma kam lomi fa hem nen, es nane te amle'ut le Au utenab ulali of Au fe ani nem neu kot i ma ale kuan le anhaumak kot i.”