Read Uab Meto YEREMIA 2 Bible Online

YEREMIA 2 - Uab Meto bible

YEREMIA 2

¹UISNENO anlelu kau

²he uton a'an i neu atoni ok-oke anbi Yerusalem, “Hoi Israel, Au umnau ko neu afi ho mu'ki neu Kau anbi tabu ho fe munif ko; ho manekam anae le'uf neu Kau leka hit nua kit moni tabua anbi funan fe'u leka fe hit toko ume. Leka Au nao meu mnela hufui ho mutuin Kau hom nao mok lene le fe ka masona fa.

³Israel, ho Au in-ini kun, Au nekak in-ini kun le Au nek ani. Au fe amle'ut neu sin le sin anmo'e ko talan te hom sutai mafena, Au UISNENO Kau, Au ukua ulali Au a'ak.”

⁴Amnen nai han ba'an UISNENO, hoi hi Nai Yakub in sufan ki, uf-uf Israel!

⁵UISNENO nakua In a'an nak, “Hi amaf sin napeni sanat sa' na'ko Kau, talan te sin nasuan Kau? Sin nami le'u mahuma le ka maupa fa ma namuni te sin anfani amle'ut.

⁶Sin kan sian Kau fa; Au es ana' ma topu sin anbi lanan, ma upoitan sin na'ko Mesir nao natuin mnela snaen, pah hufui in akloput namfau, katit fa oe ma nahenu nok amle'ut — katit fa atuas he natua anbine ma kan mu'i fa lanan anbine!

⁷Au eki sin nao neu bale maafa he nati' sin nah pah in afan ma ale sa' alekot anbi nane. Mes anbi nane sin nale'un Au pah ma Au mu'ik nane ma anfani bale mainisit.

⁸Ale Ana' fuat knino katit fa es he natoti nak Au es kau me, sin UISNENO. Ale ana' lasi fekat amsa sin ka nahin fa nak Au sekau Kau, ale ana' aplenat sin anlaban Kau. Natuin kanaf Baal ale mafefa sin na'uab, ma naluli nabes neu le'u mahuma le ka maota fa.”

⁹UISNENO nakua In a'an nak, “Tabu i Au mo'e lasi anteni ok Au to, ma ufek lasi neu sin sufan.

¹⁰Him nao nai mok tasi Siprus in ninen aon bian neno tesan, ma amsonu nai atoni nao neu neno saen pah Kedar, ma amtae milek-leko anbi nane, ai lasi onle i anbol nit fa ka?

¹¹Katit fa uf mese hen seka in uisneno teta maski nane ka uisneno amneot fa. Mes, Au to sin anseka nalali Kau, sin apinat neki bale mese le kan mo'e fa sa'-sa'.

¹²Es nane te, hoi obet neno atnanan, amtainunu nai! Sanmak nai, ma amlilitai nai!

¹³Au to antao ma anmo'e sanat nono nua: sin ankoti Kau, oe mata honis a'fe honis neu atoni pah pinan; sin antao ma anmo'e nifu bola' le kan eka nan fa oe.”

¹⁴“Israel ka ate fa, in ka sanut mofut fa na'ko ate lelu. Mes nansa' talan te in anfani on osaf neu in musu sin?

¹⁵In musu sin nakunut neune on meo asu, sin anmo'e sin pah ma anfani pah hufui ma luman, ai notu nani sin kot sin, anfani kot mapolin katit fa es natua anbine.

¹⁶Hoi Israel, atoni Memfis ma Tahpanhes an eu ho nakam funu sin.

¹⁷Ho es amtao ma anmo'e talan te lasi nane anbol nem neu ko, natuin leka Au na' ma topu ko anbi lanan, hom koti Kau, ho UISNENO.

¹⁸Ho mis sa' ka leka ho amnao neu Mesir? Ho he minu oe Noe Nil ka? Ho mis sa' ka leka ho amnao neu Asyur? Ho he minu oe Noe Efrat ka?

¹⁹Ho taos ho mo'et amle'ut es nasanab ho aom, anhamu'i ko natuin hom tite Au, ho Uisneno. Hom naben menu le'uf kun ma in susal kun leka hom koti Kau ma ka muusi Kau fa. Au, ho UISNENO Au ukua ulali Au a'ak; Au UISNENO Kau Alatan Amnanut Akuasat Afin-finit.”

²⁰UISNENO nakua In a'an nak, “Ho lo le'ufen ho kam lomi fa he mululi mubes neu Kau; kam lomi fa he mutuin ai muusi Kau. Anbi ale bale tubu amnanut, ma anbi ale hau u'naek ma mahafo sin hom fua neu uisneno teta a fe amliat.

²¹Au senan ko on tua min kase mabeti le Au beti ani na'ko fini alekot. Mes muni i ho mubaina, ho amfani hau fui ma ka maota ko fa.

²²Maski ho muniu ma hom pake sabun fomeni amfau le'uf, mes ho sanat-sanat amle'ut sin Au fe it sin.

²³Ho matani ko nabe'i ho mu'uab mak ho kam tao ma mo'e fa sanat amle'ut, ma ho ka mutuin mit fa Baal! Amkiso mit fa ho taos ho mo'et anbi nonof, mumnai nai ho taos ho mo'et amle'ut sin ma am au sin nai! Ho onko le bikase paha snaen le anmu'i sin makat, in naen neu am nem kat hel tabe'i fa,

²⁴oke te in naen neu mnela pah hufui le tena maten. Kat hel tabe'i fa kalu in fe anmu'i nek sinmakat. Bikase keso le ansinmak neune ka nabe'i fa he nami, natuin anbi tabu bikase keso anmu'i sinmakat in tulu kun in aon piut-piut.

²⁵Israel, kais ho maen ma mami uisneno teta, ma kais hom koa ma amboin sin, mes ho haem namen ma ho po'am anmeto natuin ho meno. ‘Kahaf, au of ka fani aum fa anteni,’ ho mak onane, ‘natuin au nek umnau ale uisneno teta, ma au he utuin sin.’ ”

²⁶UISNENO nakua In a'an nak, “Onle abakat namaebon leka anheke nan in, onane amsa hi al-al ki of hi mimaebom, hoi atoni Israel, ale kesel sin, ma ale ana' aplenat sin, ale Ana' fuat knino sin ma ale ho Mafefa knino sin!

²⁷Hi of namaeba ki, natuin hau tuka mese hi mo'en in mak ama ma fatu mese hi mo'en in mak aina. Hi ka aim neu Kau fa, mes him koti Kau. Mes kalu susal nem neu ki, hi mo'en Kau he aum he ufetin ki.

²⁸Ale hi le'u mahuma sin le him tao ma mo'e sin nane esme ka? Kalu anmu'i susal, amlelu sin he nafetin ki, kalu sin nabe'i he nafetin ki! Hoi Yehuda, ho uisneno teta sin amfaukenu onle ho kot-kot sin!

²⁹Lasi sa' ka esle' hi kam lomi fa anbi Kau talan te him laban Kau?

³⁰Ka maota fa Au kas ki, natuin hi kam lomi fa hem simo fainekat. Onle meo asu le fe anfoe ma namaun, onane amsa hi mimate Mafefa knino sin.

³¹Hoi to Israel, amnen nai ale Au a'ak i. Ai Au onle mnela hufui neu ki ma ai onle pah mesokan maten neu ki ka? Mes nansa' hi miuab mak him lomi he mifetnom, ma kam lomi fa hem fani aim amteni neu Kau?

³²Ai anmu'i li'feto munif le in nikan pake noas, ai bife fe'u le in nikan in bale pake mamonet? Mes hi lo le'ufen him nikan Kau — le kan so'i tan fa in a'lon nane.

³³Hi namneo-namneo mihin he mo'e onane hem futu hi bia leko sin nekan. Amapaisa le in monin namle'u anfini in fe nanoina na'ko ki!

³⁴Hi bale pake namle'u nalalien natuin na' atoni anukat ma na' atoni le ka nasanab fa, ka natuin fa na' atoni abakat le him heke man sin. Maski onle nane,

³⁵hi miuab mak hi ka misanab fa, ma Au ka uto'an ki fa anteni. Mes Au, UISNENO Kau, of Au kas ki natuin hi kam lomi fa hem au mak hi misanab.

³⁶Manoe le'uf him nao neu uisneno teta uf bian ma amtoti hen tuntaku ki! Mesir of naoleb hi nekam onle Asyur naoleb hi nekam.

³⁷Hi of misaitan Mesir nok nek ole ma nek mae. Au, UISNENO Kau, Au tite ulali sin le him solaitom neu sin; hi of ka mipeni fa mnisat sa'-sa' na'ko sin.”