Read Uab Meto YEREMIA 20 Bible Online

YEREMIA 20 - Uab Meto bible

YEREMIA 20

¹Ana' fuat knino Nai Pasyhur Nai Imer anmone, in anfani nakaf apanat Ume UISNENO. Leka in nen ale lasi le au uton ulali nane,

²in anfe plenat he nati' anbeso kau ma natam au haek au nimak anbi bol hau anbi Eno Naek Benyamin, eno antom fafon Ume UISNENO.

³Ma noka fa anteni leka Nai Pasyhur nafetin kau na'ko bol hau haef ma nimaf nane, au ak neune ak, “Kanaf le of UISNENO anfe neu ko ka Nai Pasyhur fa, mes ‘Nai Abulalut anbi me-me’.

⁴UISNENO In neknon kun nakua In a'an nak, ‘Of Au mo'e ko amfani abulalut neu ho aom anmes ma neu ho bia ma ho benu sin. Ho mes mit sin neu sin musu anlolo sin; bian na'ko sin of naiti neki sin onle atoni le nis sin anbi makenat anao neu Babel, ma bian of anlolo namate sin.

⁵Sin musu sin of Au ufetin sin amsa he nasik ma neki nao neu Babel ale mu'if kot le i ma ale sin a'maus ok-oke, ma fun ale bale-bale mu'if na'ko Kesel Yehuda sin.

⁶Ma ho, Nai Pasyhur, ho mok ho ume nanan sin ok-oke amsa of anheke ki ma neki ki amnao neu Babel. Of ho mate ambi nane ma ansub ko anbi nane amsa; onane amsa ale ho bia ho benu le sin nen nalali ho lasi mo'el ma poi nane.’ ”

⁷Koi UISNENO, Hom fuli kau ma au utuin ulali Ho fulit nane. Ho mube'i mnesin kau ma Ho mis mulali kau. Es-es nasi'u kau na'ko nok-noka talan te manas anmabe.

⁸Hae fauk-fauk au u'uab ak, mes au hunun ma koa eki au be'ik ok-oke ak, “Maufinu! Amle'ut!” Koi UISNENO, sin naakan kau ma nasi'u kau anbi ale tabu, natuin au utiaba Ho a'am.

⁹Mes leka anbi au nekak au u'uab ak, “Maut nai he au nikan UISNENO au ka lomi teni fa he u'uab anbi In kanam,” mes Ho a'am nane on ai le maputu anbi au nekak nanan. Au su' he utau ani, mes namneo-namneo au ka mu'i fa kuasat.

¹⁰Au nen atoni nase-seo anbi me-me nak, “Lasi amtaus anfun natef! Aim he hit tatlak in neu ana' aplenat!” Fun nesi na'ko nane ale au sob leko sin anhat ma anpao neu au he mofu. Sin nak, “Oni nok han fulit, nabe'i hit tis in, he nati' nabe'i hit seunbanin hit nek menas neu in.”

¹¹Mes Ho, koi UISNENO, Hom haek mok kau; Ho abe'it Ko ma matani le'uf Ko. Sin le anli'u kau ma le anhamu'i kau of sin anbel ma kan mo'e fa sa'-sa'. Sin of anmae nabal-bal, sin salit nane of ka maota fa ok-oke. Sin amle'ut nane of namnau sin piut-piut.

¹²Mes, koi UISNENO Akuasat Afinit, nok amneot Hom su' atoni pah pinan; Ho muhin sin nekan ma sin tenab. Es nane te Ho mufetin kau fa he au it neu Hom seunbanin amle'ut neu musu sin fun natuin anbi Ko au una'at au lasi.

¹³Amsi nai neu UISNENO ma ampules In nai natuin In nafetin atoni le anhapnesa sin na'ko kuasat atoni amle'ut.

¹⁴Kasat antom neno le nahonis kau! Maut nai tabu le au aina nahonis kau anfani lasi si'ut.

¹⁵Kasat amsa neu amneki hanaf le anmo'e au ama namlil a'nae le'uf, leka naton neune nak, “Ho mupeni anmone mese!”

¹⁶Maut nai amneki hanaf nane papmese onle kot-kot le UISNENO nale'un naskuku nani sin ka nok fa nek susal. Maut nai in nen han sakoit lasi menas anbi nok-noka, ma sakanat anbi makenat anbi manas namtetu.

¹⁷Natuin In ka namate kau fa leka au fe bi au aina apun, mes he nati' au ubalah bi au aina apun ma au aina apun anfani on au nitu nate.

¹⁸Mes nansa' neu he nahonis kau? Al neu he sutai susal ma mafena ka? Ma he nati' au monik anfini ma ankono al anbi lasi mae ka?