Read Uab Meto YEREMIA 21 Bible Online

YEREMIA 21 - Uab Meto bible

YEREMIA 21

¹Nai Zedekia Kesel Yehuda ansonu Ana' fuat knino Nai Pasyhur Nai Malkia anmone, ma Ana' fuat knino Nai Zefanya Nai Maaseya anmone sin nem neu kau. In anlelu sin natiaba neu kau han totis i,

²“Amtoti nai fainekat na'ko UISNENO neu kit, natuin Nai Nebukadnezar kesel Babel nok in solalus sin anfun natef nan hit kot. Oni UISNENO of anmo'e lasi mkakan neu kit, ma naseke Nai Nebukadnezar hen hel nafani in solalus sin.”

³Oke te UISNENO nakua In a'an neu kau, ma au lelu atoni-atoni le ansonu sin nane

⁴he sin natonan Nai Zedekia nak UISNENO Israel, nakua in a'an nak on i, “Zedekia, Au of is ma be'u ho solalus sin le sin fe anmaken ma sin anlaban kesel Babel ma in solalus sin. Ale ho bale makenat na'ko ho solalus sin of Au bubun ani sin anbi kot atnanan.

⁵Au eknok of a'ken ki eki Au be'ik Au matanik oke ma eki Au to'as le nanua' ma nahenu nae le'uf.

⁶Tuafen kot le i of Au umate sin; he atoni ai he mu'it of anmate natuin menas le anae le'uf.

⁷Ho ma ale ho ameput sin ma ale atoni-atoni le nafetnok na'ko makenat, amnahas ma menas a'nae le'uf, of Au ufetin sin ok-oke he nati' Kesel Nai Nebukadnezar anheke nani sin ma ale musu-musu le anlomi he namate ko. Nai Nebukadnezar of namate ki ok-oke ka namnau ki fa ma ka nek ki fa. Au, UISNENO Kau, ukua ulali Au a'ak.”

⁸Oke te UISNENO anlelu kau u'uab on i neu In to, “Amnen nai! Au, UISNENO Kau, Au fe neu ki lasi mese he nati' him beti: lanan le anao neu honis, ai lanan le anao neu maten.

⁹Atoni mese-mese le natua anbi kot nanan of anmate natuin makenat, amnahas ma menas a'naek. Mes sin le anpoi ma nana'tok neu atoni Babel le fe nape' kot i, of sin nafetnok ma ka namate fa sin.

¹⁰Au ufek ulali neu he ule'un uskuku kot i, ma Au ka nek ani fa. Kot i of Au una'at ani neu kesel Babel; in of notu nani talan te namneku ok-oke. Au, UISNENO Kau, ukua ulali Au a'ak.”

¹¹UISNENO anlelu kau utiaba han ba'an i neu Kesel Yehuda in ume nanan sin, Nai Daud in sufan: “Amnen nai sa' le Au, UISNENO, ukua Au a'ak. Mihelnom nai he nati' lasi amneot hi minaoba anbi neno-neno. Mifetin atoni le na'nisi sin na'ko kuasat atoni a nisit sin. Kalu kahaf, lasi amle'ut le ho mo'e of anmo'e Au to'as anpin on ai le kan sifo nabe'i fa.”

¹³Oke te UISNENO nakua In a'an neu Yerusalem nak, “Hoi Yerusalem! Ho balam nane namnanu nesin ale nuaf-nuaf le anfun natef nan ko. Ho onle tubu fatu le in namnanu nekin sae anbi mnel-keon, mes Au of a'laban ko. Ho mak katit fa es amsa le nabe'i he nape' ko ai he nale'un ho baki lape sin,

¹⁴mes of Au kas ko natuin ho taos ho mo'et. Ho sonaf of Au otu ani, ma ale sa'-sa' le anhaumak nokan of anputu amsa. Au, UISNENO Kau, ukua ulali Au a'ak.”