Read Uab Meto YEREMIA 22 Bible Online

YEREMIA 22 - Uab Meto bible

YEREMIA 22

¹UISNENO anlelu kau he au nao neu Kesel Yehuda in sonaf, Nai Daud in sufan, he utiaba han ba'an UISNENO neu kesel, ma neu ale in ameput sin, ma neu tuafen Yerusalem. A'an UISNENO neu sin esle' i,

³“Amtao ma mo'e nai lasi amneot ma amnonot. Mifetin nai atoni-atoni le na'nisi sin na'ko kuasat atoni a'nisi' sin. Kais him hamu'i ai him tao amle'ut neu atoni anao amnemat, anmanat ai ankome, ai bife banu. Kais hi mimate atoni le ka nasanaf fa anbi bale i.

⁴Kalu namneo-namneo hi minaoba ale Au plenat nane, onane te ale kesel le nanaoba plenat on Nai Daud of sin tam natuin sonaf i in eno naek sin nok ale in ameput sin ma sin to ansae aklet ma bikase.

⁵Mes kalu hi ka mituin fa Au plenat-plenat sin, Au sup ak sonaf i of anfani fatu tutnae. Au, UISNENO Kau, Au ukua ulali Au a'ak.

⁶Neu Au kun sonaf Kesel Yehuda mas le'uf nane, namas on pah Gilead ma tubu-tubu Libanon; mes bale nane of Au mo'e ani onle mnela hufui le atoni ka natua nani fa.

⁷Of Au sonu atoni he nale'un naskuku nani. Sin of neki fani, ma natseleb ale in ni amasat sin le anmo'e sin na'ko hau aijob Libanon. Oke te sin of anpolin natam sin anbi ai in nanan.

⁸Namuni na'ko nane atoni anao amnemat namfau of sin nao nok bale nane ma sin matotin es nok es nak nansa' Au UISNENO, Au tao ma mo'e onane neu kot amasat nane.

⁹Oke te atoni of natae nak ale lasi nane anbol natuin hi misuan hi lasi manta'en mok Kau, hi Uisneno, ma hi miluli ma miusi milali neu ale uisneno teta bian.”

¹⁰Atoni Yehuda, kais hi nekam nasusbon neu Kesel Nai Yosia in a'maten. So amkae nai neu Nai Yoahas anmone natuin neki in ma nao nalalien ma of in kan fani nem fa. Pah ma nifu le in na' na'top anbine of in ka nit anteni fa.

¹¹Neu Nai Yoahas, Nai Yosia anmone le anfani Kesel Yehuda anseka in amaf, UISNENO nakua In a'an nak on i, “In nao nalalien na'ko bale i ma of in kan fani nem fa.

¹²In of anmate anbi bale polin, ma in ka nit anteni fa pah i.”

¹³Amle'ut neu atoni le nafena in ume ka nok fa lasi amneot, ma in anmeunuaba ka nok fa lasi amnonot. Amle'ut neu in le anlelu atoni ma anmepu ka nok fa baen.

¹⁴Amle'ut amsa neu atoni le na'uab nak, “Of au uhakeb sonaf a'naek mese nok in ke'an-ke'an meunuan anbi ktuta fafon,” oke te anbi sonaf nane au mo'e eno kiso le in na'an nane na'ko hau aijob Libanon, ma a nose nani neki oet me'.

¹⁵Amnen nai, hoi Kesel Nai Yoyakim! Kalu ho mufena ho sonaf meki hai aijob leok le'uf na'ko Libanon, ai nane kan fani fa taka' nak ho kesel le muleko mnesi na'ko ale kesel bian sin? Bait ho mumnau mit fa ho ama: In moni anbi monit alekot ma in nis anbi ale in mepu sin, natuin in namneo ma namnono ma in nafek lasi atoni amamu'it nok amneot. Namneo onle nane atoni-atoni le nahin UISNENO.

¹⁷Mes ho, Yoyakim, ho monim in naik kun. Al ho mami mnisat neu ho aom kun. Ho mumate atoni le ka nasanab fa, ma hom hamu'i ho to meki maufinu.

¹⁸Es nane te UISNENO nakua In a'an nak on i antom Nai Yoyakim Kesel Yehuda, Nai Yosia anmone, “In lasi maten nane katit fa es hen kae; katit fa es of he nak, ‘Koi, au benu, koi au benu.’ Katit fa es nekan nasusbon ai hen sakoi nak, ‘Kasian usi naek!’

¹⁹Of anhel Nai Yoyakim ma anpolin napoitan in na'ko eno naek Yerusalem, onle atoni antao ma anmo'e neu bikase luke mnanu amates.”

²⁰UISNENO nakua In a'an nak, “Hoi tuafen Yerusalem, amnao nai neu Libanon ma amnao nai neu Basan, ma amhunun nai ambi nane. Ambai nai ambi nuaf Moab, natuin ale ho neka bua sin nis ma anbe'u nalali sin.

²¹Au u'uab ulali neu ki leka hi monim fe naleko, mes hi kam lomi fa he bismai ma mituin Kau. Namneo hi monim onle nane na'ko ahunut talan te muni i.

²²Es nane te, ale ho atukus sin of sin namneku onle anin anfu neki sin. Ale ho mok sin ma him neka bua of naiti neki sin onle nis sin anbi makenat ma nasi'u hi kot ma namaeba nani natuin ale hi taos hi mo'et amle'ut.

²³Hi mitua nok tainine fun ale ni aijob Libanon anfun natef nan ki, mes leka menas antoman ki, hi of amnaben menas onle bife le he nahoni.”

²⁴UISNENO nakua In a'an neu Kesel Nai Yoyakhin Nai Yoyakim anmone Kesel Yehuda nak, “Natuin Au, Uisneno amonit, Au uton ko nok amneot nak maski ho onle kleli taka' anbi Au nimak ne'u, mes of Au bok upoitan ko

²⁵ma Au una'at ko neu atoni-atoni le ho mumtausan sin ma le anlomi he namate ko. Of Au una'at ko neu Nai Nebukadnezar kesel Babel, nok in solalus sin.

²⁶Ho ma ho aina of Au li'u ki ma of Au polin ki neu pah le ka hi pah hi na' nat'op anbine, ma of hi mate ambi nane.

²⁷Of him sinmak anae le'uf neu pah le i, mes hi of kam fani aim fa.”

²⁸Au Yeremia au u'uab ak, “Ait Kesel Nai Yoyakhin in anfani onle nai' le anpe' nalalien ma anpolin ma kan lomi anteni fa? Ait es nane te in ma in anah sin anli'u sin ma anpolin sin neu pah le sin ka nahin nani fa?”

²⁹Hoi au pah, amnen nai a'an le UISNENO naton nak,

³⁰“Anlek nalali atoni nane he nati' naneku in anah sin ma in ka nis fa sa'-sa' anbi in monin. Ma na'ko in sufan katit fa esle' of nabe'i he naplenat anbi Yehuda on kesel na'ko Nai Daud in sufan. Au, UISNENO Kau, ukua ulali Au a'ak.”