Read Uab Meto YEREMIA 23 Bible Online

YEREMIA 23 - Uab Meto bible

YEREMIA 23

¹UISNENO Israel nakua In a'an nak, “Amle'ut neu ki hoi ale atukus le hi mile'un ma misana Au to! Namneo-namneo hi mes hem panat Au to, mes hi ka mo'e fa onane; hi mifetin sin nasan'on ma sin naenan. Es nane te of Au kas ki natuin hi mo'et amle'ut.

³Mes nesif na'ko Au to mes Au bubun sin na'ko pah-pah anbi bale le Au polin sin anbine. Of Au eki sin anfani nem neu sin pah ma sin sufkenu of ansato namfau anteni.

⁴Of Au aiti atukus he nati' anpanat ma anpao sin. Au to of ka namtau ma ka natai fa; katit fa es anteni na'ko sin le he namneku. Au, UISNENO Kau, ukua ulali Au a'ak.”

⁵UISNENO nakua In a'an nak, “Of antia in tabu, Au aiti kesel amneot mese na'ko Daud in sufan. Kesel nane of naplenat nok nek mahine, ma anmo'e sa' le amneot ma amnonot anbi pah ok-oke.

⁶Leka in nanaoba plenat, atoni Yehuda of napeni aomina, ma atoni Israel of sin moni nok tainine. Kesel nane of antek in nak, ‘UISNENO Hit afe Aomina’.

⁷Of antia in tabu, katit fa es hen sup natuin Au, Uisneno amonit, le Au upoitan to Israel anpoi na'ko pah Mesir,

⁸mes natuin Au, Uisneno amonit, Au es upoitan to Israel anpoi na'ko pah mese anbi aon bian a'li, ma na'ko ale pah bian le Au usana ulali sin. Sin of natua kun sin pah ma sin nifu.”

⁹Le i au han ba'an neu ale Mafefa knino sin: Au nekak namle'u ma au lilitai. UISNENO In a'an knino anmo'e kau onle atoni amafut le ninu tua mina mtasa nae le'uf.

¹⁰Hit pah nahenu nok atoni le ka na'ki fa neu UISNENO. Sin anmoni anbi amle'ut ma sin anpake ansan sin kuasat. Natuin sukat UISNENO, hun anbi mnela anmate ma pah ok-oke ankulu ma ankae.

¹¹UISNENO nakua In a'an nak, “Mafefa knino ma Ana' fuat knino kan lomi fa he natuin Kau. Ma nesi na'ko nane Au upeni sin anmo'e amle'ut anbi Au Ume knino.

¹²Es nane te, sin lanan of anmaseki ma mesokan, talan te sin anpastun ma anbel. Of Au fe neu sin amle'ut, leka in tabu antia neu Au he kas sin. Au, UISNENO Kau, ukua ulali Au a'ak.

¹³Sanat na'ko ale Mafefa knino Samaria Au it ulali sin. Sin na'uab natuin Baal in kanan, ma nasekeb Israel Au to.

¹⁴Mes anbi Yerusalem Au it ale Mafefa knino sin anmo'e sanat nesi anteni. Sin anmo'e ma sin anmapaisa, ma anbab atoni le anmo'e amle'ut, talan te es amsa kan lomi fa he nate'un. Neu Kau sin al-al sin amle'ut onle tuafen Sodom ma Gomora.”

¹⁵UISNENO Akuasat Afinit nakua In a'an nak, “Of Au fe neu ale Mafefa knino anbi Yerusalem nane hau fua menu he nati' sin nah ma laso he nati' sin ninu, natuin sin anmo'e ale atoni ka naliatas Kau fa anbi pah in nanan ok-oke.”

¹⁶UISNENO Akuasat Afinit, nakua In a'an neu tuafen anbi Yerusalem nak, “Kais him nen uab molok Mafefa knino le anfe panet ma afnekan luman. Sin al natiaba sin tenab ne'ob kun ma ka Au a'ak fa.

¹⁷Neu atoni-atoni le kan lomi fa he nen Au a'ak sin na'uab nak, ‘Of hai mipeni aomina.’ Ma neu ale atoni le in nakan fatu, sin na'uab nak, ‘Of ho ka mupeni fa amle'ut.’ ”

¹⁸Mes Au ak, “Katit fa es amsa na'ko ale Mafefa knino nane sin nahin lasi sa' anbi UISNENO In tenab. Katit fa na'ko sin le sin nen ma nahin In tenab ma In salit sin; kan mu'i fa amsa le ansimo ma anpanat In a'an.

¹⁹UISNENO In to'as nane onle anin nautus le anfoe ma namaun antoman atoni-atoni amle'ut.

²⁰In to'as nane kan sanu fa kalu In fe ka nanaoba fa ale In tenab ma In salit sin. Anbi neno namuni te UISNENO In to of sin nahin lasi nane nok alekot.”

²¹UISNENO nakua In a'an nak, “Ale Mafefa knino nane sin anmepu nok matani, mes nane Au ka lelu fa sin. Sin natiaba saksit natuin Au kanak, mes nane kan mu'i fa han ba'an le Au fe neu sin.

²²Kalu sin nahin sa' le anbi Au tenab, sin mes natiaba neu Au to sa' le Au utiaba ulali. Onane te Au to of sin nate'un na'ko ale sin sanat ma sin taos mo'et amle'ut.

²³Au Uisneno le Au bi me-me, ka al fa bi bale mese.

²⁴Atoni mese amsa ka nabe'i fa he natolo' in aon na'ko Au humak Au matak, natuin Au bi me-me: Au bi neno tunan ma bi pah pinan.

²⁵Lasi ok-oke le ale Mafefa knino nane naton Au uhin ulalien. Sin anmo'e neki Au kanak nak Au han ba'an nane sin ansimo nalali nao natuin nanait.

²⁶Of ante leka ka ale Mafefa knino nane sin he nasekeb Au to neki beno le sin anmo'e natuin sin lomin kun?

²⁷Sin natenab nak nok ale sin nanait le sin naton nane, Au to nabe'i nikan Kau onle sin amfenu sin nikan Kau ma naluli nabes neu Baal.

²⁸Mafefa knino le in nanai in mes na'uab nak, ‘Le i al nanai. Mes Mafefa knino le napeni han ba'an na'ko Kau namneo-namneo in mes he natiaba a'an nane nok amneot kun. Ane kase ka nabe'i fa he tanesa nok ane ta'u.

²⁹Au a'ak onle ai, ma onle tutu besi le naskuku nani fatu.

³⁰Of Au laban ale Mafefa knino le natiaba han ba'an na'ko sin biaf sin benuf, oke te naton nak nane han ba'an na'ko Kau.

³¹Au amsa of a'laban ale Mafefa knino le sin naiaba sin uab a'at kun, oke te naton nak nane na'ko Kau.

³²Au, UISNENO Kau, of Au laban ale Mafefa knino le sin natiaba sin nanait le nahenu nok lasi mo'el ma poi. Sin nasekeb Au to neki lasi mo'el ma poi ma sin uab luman. Au ka lelu fa ale Mafefa knino nane. Sin namneo-namneo ka maota fa neu Au to. Au, UISNENO Kau, ukua ulali Au a'ak.”

³³UISNENO nakua In a'an nak, “Yeremia, kalu es na'ko Au to, ai Mafefa knino mese ai Ana' fuat knino mese natoti neu ko nak, ‘UISNENO anba'an lasi sa' ka?’ Ho mes mutae mak, ‘Ho le nane baut mafena UISNENO; es nane te In of anpolin ko.’

³⁴Kalu es na'ko Au to ai Mafefa knino ai Ana' fuat knino fe na'uab neu ‘baut mafena UISNENO’, of Au kas in nok in ume nanan sin.

³⁵Mes, mese-mese he natoti neu in biaf in benuf ma neu in ume nanan sin nak, ‘UISNENO In han taes nane nak sa' ka?’ ai ‘UISNENO nakua In a'an nak sa'ka?’

³⁶Sin ka nabe'i fa hen pake uab molok ‘baut mafena UISNENO.’ Kalu fe anmu'i le anpake uab nane of Au mo'e Au han ba'an nane namneo-namneo anfani baut mafena neu in. Atoni le na'uab nak, ‘baut mafena UISNENO’ sin al na'uab mo'el ma poi antom Au a'ak, sin Uisneno, Uisneno amonit, UISNENO Akuasat Afinit.

³⁷Sin al nabe'i na'uab neu ale Mafefa knino nane nak, ‘UISNENO natae ko nak sa' ka? UISNENO nakua In a'an nak sa' ka?’

³⁸Kalu anmu'i le ka natuin fa Au plenat nane, ma fe anpake uab molok ‘baut mafefa UISNENO’,

³⁹of Au aini sin, ma polin sin a'lo le'uf, leko he sin ai kot le Au fe ulali neu sin ma sin amfenu.

⁴⁰Of Au mo'e sin ma sin anmae ma sin namle'u nabal-bal fun sin monin nane of atoni kan nikan nani fa.”