Read Uab Meto YEREMIA 25 Bible Online

YEREMIA 25 - Uab Meto bible

YEREMIA 25

¹Leka Nai Yoyakim Nai Yosia anmone anfani kesel anbi Yehuda nan ton ha Au upeni han ba'an na'ko UISNENO antom uf Yehuda ok-oke. Tabu nane ton ahun-hunut na'ko Nebukadnezar anfani kesel Babel.

²Au u'uab neu uf Yehuda ok-oke ma tuafen Yerusalem ak,

³“Ton bo'nua am tenu in a'lon, leka ton bo'es amtenu Nai Yosia Nai Amon anmone in ana' aplenat anbi Yehuda, talan te neno i UISNENO nakua nalali In a'an neu kau ma au ka usnas it fa he utiaba neu ki sa' le In natiaba nalali neu kau. Mes hi kam sian mani fa.

⁴UISNENO amsa ansonu neu ki piut-piut ale Mafefa knino In ate-ate sin, mes hi kam lomi fa hem nen ma amsimo sin.

⁵Sin anlelu ki he misaitan hi monim amle'ut le nane, ma hi taos hi mo'et asanat, he nati' hi mitua mibalah ambi pah le i le UISNENO anfe nalali neu ki ma neu hi amfenu on bale bela mnasi.

⁶Ale Mafefa knino nane sin nakain ki he nati' kais hi miluli ma mibes neu ale uisneno teta. Sin nakain ki he kais hi miluli ma mibes neu ale le'u mahuma le hi mo'e sin, natuin lasi nane anmo'e UISNENO ma In nato'. Kalu hi mituin UISNENO In plenat nane, In kan kas ki fa.

⁷Mes UISNENO In neknon kun nakua In a'an nak hi kam lomi fa hem nen In. Hi mes kim es amhone tu kasat neu hi aom. Mes hi mifena In to'as natuin ale hi le'u mahuma nane.

⁸Natuin hi kam lomi fa hem nen In a'an, es nane te UISNENO Akuasat Afinit nakua In a'an nak,

⁹‘Of Au boin ale uf na'ko aon bian a'li, ma Au ate amsa, Nebukadnezar kesel Babel. Of Au lelu sin hen maken ma anlaban Yehuda ma in tuafen ma ale uf le anhaumak in. Uf Yehuda nok uf-uf le natnoe nok in, of Au ule'un sin ma Au ufetin ani he nale'un naskuku nani talan te nabal. Atoni-atoni le sin nit of sin naskek ma sin naben lasi mtaus. Au, UISNENO Kau, ukua ulali Au a'ak.

¹⁰Sin hanan amlilat amoket ma sin malinat fesat kabin nane of Au usnasab ani. Mina of kan mu'i fa neu sin paku, ma sin ane kase of oke.

¹¹Pah i ok-oke of Au ufetin he nati' nale'un naskuku nani ma anfani tena maten. Ma uf-uf le anhaumak nokan of sin aetnon neu kesel Babel nan ton bo'hitu in a'lon.

¹²Namuni na'ko nane of Au fe kasat neu uf Babel ma in kesel natuin sin sanat. Pah Babel of Au utseleb ani ma Au ufetin he nale'un naskuku nani talan te nabal.

¹³Of Au fe kasat neu Babel eki ale amle'ut le Au ubalab ulali neu uf-uf le Au uton ulali nao nok Nai Yeremia — esle' ale amle'ut le antui nani anbi sulat i in nanan.

¹⁴Taos mo'et atoni Babel of Au seunbanin sin; kesel anaet sin ma uf namfau of an aten sin.’ ”

¹⁵UISNENO, atoni Israel sin Uisneno, nakua In a'an neu kau nak, “Maiti nai klas mninut ma tua mina mtasa i le Au utua ulali eki tua mina mtasa Au to'as. Meki amnao nai neu ale uf le ansonu ko neune, ma amlelu sin he ninu tua mina mtasa i.

¹⁶Leka sin ninu te, sin nao nasni'-ni' neu li ma ne'u ma sin nekan namneku natuin makenat le Au fe nem neu sin.”

¹⁷Mes au simo klas mninut tua mina mtasa nane na'ko UISNENO In niman, ma au nao neu ale uf neu bale le UISNENO ansonu nalali kau neune, ma au mo'e sin ninu tua mina mtasa nane.

¹⁸Yerusalem ma ale kot anbi Yehuda, nok ale kesel sin ma ale in ana' aplenat sin, au fe neu sin tua mina mtasa ma sin ninu talan te sin anfani on mnela hufui ma neki amtaus. Talan te neno i anpake sin kanan on sukat.

¹⁹Le i sul kanaf atoni-atoni bian le mes he ninu na'ko UISNENO In klas mninut tua mina mtasa nane: Kesel Mesir nok in ameput sin, ma ale in ana' aplenat sin; ale atoni Mesir ma atoni anao amnemat anbi Mesir; ale kesel anbi pah Us; ale kesel kot-kot Filistin anbi Askelon, Gaza, Ekron; ale atoni le fe anmoni anbi Asdod; ale atoni Edom, Moab, ma Amon; ale kesel anbi Tirus ma Sidon; ale kesel anbi Tasi Tnana in ninen; kot-kot Dedan, Tema ma Bus; ma ale atoni le an eu napalan sin nakan funu; ale kesel Arab; ale kesel pah-pah le anmaselo nabuan ma sin natua anbi pah hufui; ale kesel anbi Zimri, Elam ma Madai; ale kesel anbi aon bian a'li, a'lot ma ahaumakat, mese-mese. Ale uf anbi pah pinan mes he ninu tua min kase nane. Ma atoni amunit le mes he ninu tua mina mtasa nane es kesel Babel.

²⁷Oke te UISNENO nakua In a'an neu kau nak, “Muton nai neu ale atoni-atoni nane mak Au, UISNENO Akuasat Afinit, atoni Israel, Au lelu sin he ninun talan te sin anmafu ma anlo'. Au mo'e sin anbel ma kan fen anteni fa natuin makenat le Au fe nem neu sin.

²⁸Ma kalu sin kan lomi fa hen simo klas nane na'ko ho nimam he ninu tua mina mtasa nane ho muton neu sin mak UISNENO Akuasat Afinit es anfe nalali plenat nane.

²⁹Of Au fatan lasi mle'un nane anbi kun Au kot anmes. Kais sin natenab nak of Au ka fe fa kasat neu sin. Namneo-namneo of Au kas sin natuin of Au fe nem neu sin lasi makenat neu ale uf anbi pah pinan ok-oke. Au, UISNENO Kau Akuasat Afinit, ukua ulali Au a'ak.”

³⁰Ale lasi ok-oke le Au uton ulali neu ko, hoi Yeremia, ho mes he mutiaba mani neu sin. Muton nai neu sin mak, “UISNENO In hanan natai na'ko sonaf neno tunan; na'ko In bale knino In hanan na'lot anlaban In to. Tuafen pah pinan ok-oke sin nen In anhunun ma ankoa on ameput le anmepu tua min kase anbi bale mepu.

³¹In hanan nanon talan te pah pinan tu'an; UISNENO anmo'e lasi nok uf-uf. In of nafek lasi neu atoni ok-oke ma of ankas namate atoni amle'ut sin.”

³²UISNENO Akuasat Afinit nakua In a'an nak, “Na'ko pah pinan in tu'an anin nautus naslutu nok hanan a'naek; lasi amle'ut nem neu uf mese-mese.”

³³Anbi neno nane atoni amates le UISNENO namate sin of sin aon nitu nane mapolin anbi pah pinan. Of es kan kae fa neu sin, katit fa es amsa le he naiti sin aon nitu hen sub sin, mes anpolin sin anbi nain on natupu maklafu.

³⁴Hoi ale ana' aplenat, hoi ale atukus to UISNENO! Amkae mihelnom nai! Am huil hi aomin anbi afu, natuin in tabu antia nalalien he namate ki, ma le nafetnon of nasitib ma nasana sin. Hi of on pika maupa le anmofu ma anpe'.

³⁵Namneo-namneo hi of ka mifetnom fa.

³⁶Him sakoi ma amsanane ma amkae nok nek susal natuin UISNENO anbi In to'as nale'un nalali hi nonot ma naskuku nalali hi pah tainine nane.

³⁸On asu fui anpoi na'ko in bola', onane amsa UISNENO anpoi hen kas In to. Lasi le'uf na'ko makenat ma UISNENO In to'as nabaina pah i anfani mnela hufui.