Read Uab Meto YEREMIA 26 Bible Online

YEREMIA 26 - Uab Meto bible

YEREMIA 26

¹Ka lo fa na'ko tabu Nai Yoyakim Nai Yosia anmone anfani Kesel Yehuda,

²UISNENO nakua In a'an neu kau nak, “Amnao nai amhake ambi Au Ume in po'an ma ho mu'uab nai neu tuafen Yehuda le sin nem naluli nabes anbi nane. Mutiaba neu sin ok-oke le Au fe ulali plenat neu ko he nati' ho muton mani neu sin. Kais mubati kle'o amsa.

³Oni to nane anlomi he nen, oke te sin nasnas na'ko anmo'e amle'ut, talan te Au hel ufani Au tenab he ule'un sin anmatom nok sin mo'et amle'ut.”

⁴UISNENO anlelu kau he u'uab on i neu sin, “Au, UISNENO Kau, Au fe ulali plenat he nati' hi mituin Kau ma minaoba ale Au plenat sin le Au fe ulali neu ki.

⁵Hi amsa mes hem nen sa' le Au ate-ate sin naton neu ki, ale Mafefa knino le Au sonu sin piut-piut neu ki. Mes hi kam lomi fa hem nen sin.

⁶Kalu hi minak fatu mibalah ume luli besa i of Au mo'e ani papmese on Silo, talan te uf anbi pah pinan ok-oke anpake kot Yerusalem in kanan anfani on sukat.”

⁷Ale lasi le au uton anbi Ume UISNENO nane ale Ana' fuat knino sin nen nok ale Mafefa knino sin ma to.

⁸Ka lo fa na'ko tabu au uton ulali ale a'an UISNENO ok-oke onle In naplenat neu kau, sin anheke kau ma sin ankoa nak, “Ho mes he mate!

⁹Ho matani le'uf ko ho mu'uab anbi UISNENO In kanan mak of In Ume i papmese on Silo, ma ho mak of kot i nale'un nani ma anfani bale le ka natua anteni fa.” Nalali ale atoni anfun natef nan kau.

¹⁰Leka ana' aplenat Yehuda sin nen sa' le anbol nalali, nok lab-lab sin anpoi na'ko kesel sonaf oke te sin anao neu Ume UISNENO, ma sin antoko anbi Eno Naek Fe'u.

¹¹Ale Ana' fuat knino sin ma ale Mafefa knino sin na'uab neu ana' aplenat sin ma neu to nane nak, “Atoni i nabe'i nafek lasi maten neune natuin in napoitan uab molok le anlaban kot i. Hi al-al ki amnen milali in uab.”

¹²Oke te au ak, “UISNENO es anlelu kau he utiaba In a'an le anlaban Ume UISNENO ma kot i onle him nen.

¹³Es nane te mibaina nai hi monim ma hi taos hi mo'et; mituin hi UISNENO, he nati' In anhel nafani In tenab neu he nale'un ki.

¹⁴Neu au aok, namneo anbi hi kuasat nanan neu hi he mo'e sa' natuin hi lomim kun.

¹⁵Mes mimnau, kalu hi mimate kau, hi ma tuafen kot i of him sutai sanat neu hi mimate atoni le in ka nasanab fa. Natuin, UISNENO es ansonu kau he fe lasi mnaut nane neu ki.”

¹⁶Onane te ale ana' aplenat ma to nak neu ale Ana' fuat knino ma ale Mafefa knino nane nak, “Atoni i na'uab natuin hit UISNENO In kanan; ka nabe'i fa he nafek lasi maten neu in.”

¹⁷Namuni na'ko nane fauk-fauk na'ko ale atomatas nonot nane sin anhake anbi to sin human sin matak ma nak neu atoni-atoni le nabuabon anbi nane nak,

¹⁸“Anbi tabu Nai Hizkia anfani Kesel Yehuda, Mafefa Knino Nai Mikha na'ko Moresyet natiba neu to a'at i na'ko UISNENO Akuasat Afinit, nak, ‘of na'foi Sion on lene meto, Yerusalem of anfani fatu tutnae, ma tubu Ume UISNENO of anfani nasi.’

¹⁹Mes Kesel Nai Hizkia ma atoni Yehuda ka namate fa Nai Mikha. Mes Nai Mikha in namtau neu UISNENO ma antoti he nek ma namnau in. Oke te UISNENO anhel nafani In salit neu he nale'un sin. Ma tabu le i, al kle'o hit le i tale'un kuk hit aok nok amle'ut a'naek mese.”

²⁰Hae es amsa atoni bian na'uab anlaban kot le i ma nonot le i neki UISNENO kanan, onle au mo'e. Atoni le nane in kanan Nai Uria Nai Semaya anmone na'ko Kiryat-Yearim.

²¹Leka Kesel Nai Yoyakim nok ale in solalus nakaf sin ma ale in ana' aplenat sin nen ale uab molok Nai Uria, kesel nami lanan he namate in. Mes Nai Uria in nen lasi nane oke te in namtau ma in naen neu Mesir.

²²Mes Kesel Nai Yoyakim anlelu Nai Elnatan Nai Akhbor anmo'e nok atoni fauk-fauk sin anao neu Mesir ma sin naiti neki Nai Uria.

²³Oke te sin neki nafani in nem neu Kesel Nai Yoyakim. Namuni te kesel anlelu ma namate in, ma anpolin in aon ta'un nane anbi nitu nate pah amfaun.

²⁴Mes tabu i natuin tetus tuntakus Nai Ahikam Nai Safan anmone, au Nai Yeremia ka nana'at kau fa neu to he namate kau.