Read Uab Meto YEREMIA 28 Bible Online

YEREMIA 28 - Uab Meto bible

YEREMIA 28

¹Anbi ton le nane amsa anbi fun nima anbi ton ha Kesel Nai Zedekia nanaoba plenat, Nai Hananya Nai Azur anmone, Mafefa knino mese na'ko kot Gibeon, na'uab neu kau anbi Ume UISNENO. Anbi ale Ana' fuat knino ma to sin human sin matan in nak neu kau nak,

²UISNENO Akuasat Afinit, Uisneno Israel, nakua In a'an nak on i, “Be'it matani kesel Babel Au ule'un ulalien.

³Anbi tabu ton nua le i of Au eki ufani ale bale na'ko Au Ume, le Nebukadnezar naiti neki sin nao neu Babel.

⁴Au amsa of eki ufani Nai Yoyakhin Nai Yoyakim anmone Kesel Yehuda, nok to ok-oke le neki sin anao neu Babel. Namneo of Au u'oleb ani Babel in be'in matanin. Au, UISNENO Kau, ukua ulali Au a'ak.”

⁵Anbi ale Ana' fuat knino ma to ok-oke le anhake anbi Ume UISNENO nane, au u'uab neu Nai Hananya ak,

⁶“Leko! So nati' ale ho uab nane anbol ma natonon, ma UISNENO namneo-namneo neki anfani nem na'ko Babel ale bale Ume UISNENO nok ale atoni ok-oke le anpolin nalali sin neu bale nane.

⁷Mes ho, Hananya, ma hi al-al ki oke, hoi to, amnen nai a'an i:

⁸Ale Mafefa knino le nahunun kit sin na'uab nalali nak makenat, lasi amle'ut, ma menas anaek of antom neu ale uf-uf ma pah-pah le abe'it ma matani.

⁹Mes Mafefa knino le na'uab lasi halan, nane es ansimo on Mafefa knino le namneo-namneo UISNENO ansonu in, kalu in uab molok sin anbol ma natonon.”

¹⁰Oke te Nai Hananya nasik nan nepat na'ko Mafefa Knino Nai Yeremia hanun ma an ipu nani.

¹¹Anbi to ok-oke sin human sin matan le sin nem anbi nane, in na'uab nak, “UISNENO nakua In a'an nak on i In of an ipu nani nepat le Kesel Nai Nebukadnezar antao nani neu ale uf sin hanun; UISNENO of anmo'e nani anbi tabu ton nua le i.” Namuni na'ko nane te au amsa au nao kuk.

¹²Ka lo fa na'ko lasi nane anbol, UISNENO anlelu kau

¹³au nao neu Nai Hananya he uton neu ne on i, “UISNENO nakua In a'an nak nabe'i hom ipu nepat na'ko hau, mes In of anseka nani neki nepat na'ko besi.

¹⁴UISNENO Akuasat Afinit, Uisneno Israel, nakua In a'an nak In of antao nani nepat na'ko besi neu uf-uf le i sin haun ok-oke, ma sin of an aetnok neu Nebukadnezar kesel Babel. UISNENO nakua In a'an amsa nak mu'it abulalut amsa of In nana'at nani sin neu plenat Nebukadnezar.”

¹⁵Ale lasi nane au utiaba ani neu Nai Hananya, oke te au u'uab ateni ak, “Amnen nai, hoi Hananya! UISNENO kan sonu ko fa; ho mo'e mulali nonot i sin nateb neu u'uab molok mo'el ma poi.

¹⁶Es nane te UISNENO In neknon kun nakua In a'an nak ho mes naneku ko na'ko pah pinan i. Ton le i amsa of ho mate, natuin hom lelu mulali nonot le i anlaban UISNENO.”

¹⁷Ton le nane amsa anbi fun hitu, Nai Hananya anmate.