Read Uab Meto YEREMIA 29 Bible Online

YEREMIA 29 - Uab Meto bible

YEREMIA 29

¹Au tui sulat neu ale Ana' fuat knino, ale Mafefa knino, atukus-atukus to le fe anmoni ma neu ale atoni bian ok-oke le Nebukadnezar neki sin na'ko Yerusalem anao neu Babel.

²Sulat nane au tui leka Kesel Nai Yoyakim, in ainaf, ameput-ameput anbi sonaf nanan, ale ana' aplenat Yehuda ma Yerusalem, ale apakaet ma ale ameput mahine naiti neki sin neu bale polin.

³Au fe sulat i neu Nai Elasa Nai Safan anmone, ma Nai Gemarya Nai Hilkia anmone le Nai Zedekia Kesel Yehuda ansonu sin neu Nebukadnezar kesel Babel. Sulat nane nahan nak on i,

⁴“Onle i UISNENO Akuasat Afinit, Uisneno Israel, nakua In a'an neu ale atoni le anpolin nalali sin na'ko Yerusalem neu Babel:

⁵‘Mibalah ambi nane. Mifena nai ale hi ume-ume sin. Amepu nai lene ma ambukae in afan nai.

⁶Mafe ma mamone nai he nati' hi mipeni anah, ma maut nai hi anah-anah sin amsa anmafe ma anmamone amsa he nati' sin amsa napeni anah. Hi mfaum ma hi aim mes masato ma ka nabe'i fa hen sanu.

⁷Amepu nai neu kot-kot sin alekon bale le Au anpolin ki anbine. Onen toti nai neu Kau neu monit kot-kot nane, natuin kalu kot-kot nane sin nalekon, hi amsa of hi mileko.

⁸Au UISNENO Akuasat Afinit, Uisneno Israel, Au umnauba ki he nati' kais him fe hi aom hen fuli ki natuin ale Mafefa knino le natua anbi hi sonam hi atnanam ai sekau amsa le na'uab nak nabe'i sin nahin neno amnemat. Kais him simo ale sin nanait nane.

⁹Sin anpake Au kanak he na'uab neu ki lasi-lasi le ka namneo fa. Au ka lelu fa sin. Au, UISNENO Kau, ukua ulali Au a'ak.’

¹⁰UISNENO nakua In a'an nak, ‘Leka ton bo'hitu namsopu neu Babel, of Au kiso ki anteni, ma Au unokab Au han manta'en he eki ufani ki neu bale le i.

¹¹Ai Au ka mese uhin fa ale Au tenab-tenab sin neu ki? Tenab-tenab nane ka neu fa he nale'un ki, mes neu he mileko, ma neu hen fe neu ki neno amnemat le nahenu nok lasi panet ma afnekan.

¹²Ma hi of amtoti he Au bab ki. Hi of aim neu hem onen toti neu Kau, ma of Au utae hi onen totis.

¹³Hi of mami Kau ma mitef mok Kau, natuin hi mami Kau nok hi nekam ok-oke.

¹⁴Namneo, hi of mieku ma mitef Kau. Hi of Au bubun ki na'ko uf mese-mese sin sonan sin atnanan, ma na'ko pah mese-mese bale le hi misitbom ma misanom ma anpolin ki. Hi of Au eki ufani ki neu hi pah le hi mikone ma Au uleko hi monim. Au, UISNENO Kau, ukua ulali Au a'ak.’

¹⁵Natuin hi, UISNENO anfe nalali neu ki ale Mafefa knino anbi Babel.

¹⁶Amnen nai sa' le UISNENO nakua In a'an neu kesel le nanaoba plenat anbi tabu le i, esle' sanut mofut na'ko Nai Daud, ma neu tuafen kot le i, esle' hi biaf hi benuf anbi hi ume nanan sin le ka neki fa sin neu bale polin nok ki.

¹⁷UISNENO Akuasat Afinit nakua In a'an nak, ‘Of Au fe nem neu sin makenat, amnahas, ma menas anaek. Au mes anmo'e sin onle bub fua mina in fuan le anpunu nae le'uf talan te ka nabe'i fa het bukae tani.

¹⁸Mes Au li'u sin piut-piut nok makenat, amnahas, ma menas anaek talan te ale uf anbi pah pinan of sin namtau leka ankiso sin monin. Of Au usitib ma usana sin anbi me-me fun atoni of in naben aon anmahai ma namtau leka ankiso sa' le anbol nalali neu sin. Of nasi'u sin, ma anpake sin kanan on sukat.

¹⁹Ale lasi nane anbol nem neu sin natuin sin ka natuin fa Au a'ak le Au utiaba neu sin piut-piut anao nok ale Mafefa knino Au ate-ate sin. Sin kan lomi fa hen simo Au a'ak nane.

²⁰Ma hi al ki ok-oke le Au polin ulali ki neu Babel, amnen nai sa' le Au UISNENO uton ulali.’

²¹UISNENO Akuasat Afinit, Uisneno Israel, nakua nalali In a'an neu Nai Ahab Nai Kolaya anmone ma neu Nai Zedekia Nai Maaseya anmo'e le anpake UISNENO In kanan he natiaba neu ki lasi-lasi le ka namneo fa. UISNENO nakua In a'an nak In of nana'at sin neu Nebukadnezar kesel Babel in kuasat, le of namate sin anbi hi humam hi matam.

²²Ma leka ale atoni le naiti neki sin na'ko Yerusalem neu Babel hen kas es, sin of na'uab nak, ‘So nati' UISNENO anmo'e ko onle Nai Zedekia ma Nai Ahab, le kesel Babel notu nalali sin nok hon-honis.’

²³Onle nane sin moni natuin sin mo'e sanat-sanat a'nae le'uf anbi Israel: sin anmapaisa, ma anpake UISNENO kanan he na'uab lasi-lasi le ka namneo fa. Nane nasuli nok UISNENO In lomin. In nahin sa' le sin anmo'e, ma In neknon anfani saksi hen laban sin. UISNENO nakua nalali In a'an.”

²⁴UISNENO Akuasat Afinit, Uisneno Israel anfe kau han ba'an antom Nai Semaya, atoni Nehelam, natuin Nai Semaya antui sulat neki in kanan neu tuafen Yerusalem ok-oke, neu Ana' Fuat Knino Nai Zefanya Nai Maaseya anmone, ma neu Ana' fuat knino bian ok-oke. Anbi sulat nane Nai Semaya antui nak on i neu Nai Sefanya:

²⁶“UISNENO naiti nalali ko hom fani Ana' fuat knino amseka Nai Yoyada, ma muni i ho es anaet ko amnesi anbi Ume UISNENO. Ho mepu nane esle' muplenat he nati' ale atoni amaunut, le antek sin aon nak Mafefa knino, amfutu sin meki kolen besi anbi sin neno.

²⁷Mes nansa' es ho ka maiti fa lasi neu Nai Yeremia atoni Anatot nane le in antao ma anmo'e on Mafefa knino anbi hit nonot?

²⁸Atoni le nane mes het poh in fefan, natuin in naton neu ale hit atoni le anbi Babel nak sin fe a'lo natua anbi nane. Ma es nane te, in nak, sin mes he nafena ume ma hen mepu lene ma anbukae in afan.”

²⁹Sulat nane Ana' Fuat Knino Nai Zefanya in anso'i neu kau.

³⁰Es nane te UISNENO anlelu kau

³¹au sonu hanaf antom Nai Semaya neu atoni Israel le anpolin sin anbi Babel. Hanaf le nane esle' i, “Nai Semaya in na'uab nalali neu ko onle in Mafefa knino; mes namneo-namneo Au, UISNENO Kau, Au ka lelu fa in. Natuin in anmo'e nalali ki hi miteb neu lasi mo'el ma poi,

³²ma es nane te in anlelu nalali ki he nati' him laban Kau, es nane te of Au kas in ma in sanut mofut sin. Katit fa es na'ko sin le of natua nabalah nok kai he nit lasi-lasi alekot le of Au mo'e ani neu Au to ok-oke. Au, UISNENO Kau, ukua ulali Au a'ak.”