Read Uab Meto YEREMIA 3 Bible Online

YEREMIA 3 - Uab Meto bible

YEREMIA 3

¹UISNENO nakua In a'an nak, “Leka bife mese in mone anpolin, ma bife nane anfani atoni bian in fenai, natuin lasi nane of nale'un pah le i. Ho, Israel, ho mu'i bia leko amfau le'uf, nansa' es hom lomi hem fani aum neu Kau!

²Ait hom kiso meki amsae nai, neu tubu-tubu sin tunan! Bale me es fe ho kam nao meune fa he mo'e lasi mapaisa? Onle atoni Arab anbi mnela hufui, onle nane ho amtoko ambi lanan in ninen ampao atoni le anlomi he na'bae' lasi mafulit nok ko. Hom hainisi pah i meki ho lasi mapaisa ma ho mo'e amle'ut.

³Nok nane te oe na'ko neno tunan na'ek'on, ma ulan anbi tabu oe fat of ka nem anbol fa. Ho on ko le amapaisa ma ka mae muhin fa.

⁴Anbi tabu ho neno susal nane ho mu'uab neu Kau mak ho ama es Kau, ho mak Au nek umanu ko na'ko ho fe an-ana ko.

⁵Ho amsa mu'uab mak of Au ka uto'an ko fa piut-piut. Ho mu'uab onle nane, hoi Israel, mes nok nane amsa ho mo'e ale lasi amle'ut le nabe'i ho mo'e sin.”

⁶Anbi tabu Kesel Nai Yosia in ana' aplenat, UISNENO nakua In a'an neu kau on i, “Ho mit mulali sa' le Israel anmo'e, bife le ka na'ki fa nane? In nasaitan Kau ma anmo'e kun mapaisa anbi bale-bale tubu amnanut ma anbi ale hau naek mahafo.

⁷Au utenab leka in anmo'e nalali ale lasi nane, in of anfani nem neu Kau. Mes in kan fani nem fa, somak in nao piut kun ma anmapaisa. Es nane te Au polin in ma Au li'u in. Yehuda, Israel in biaf, ka a'ki'at nane in nit ale lasi nane oke, mes in ka namtau fa. Mes in nok kun ma anfani kun amapaisa,

⁹ma in kan mae nahin fa. In mapaisa natuin in naluli ma nabes neu fatu le'u ma hau le'u, talan te pah le i anfani mainisit.

¹⁰Leka in mo'e nalali ale lasi nane ok-oke, Yehuda ka a ki'at nane anfani nem neu Kau nok asafanu, natuin in nekan le ka namneo fa. Au, UISNENO Kau, Au ukua ulali Au a'ak.”

¹¹Namuni te UISNENO naton neu kau nak maski Israel ankoti nalali In, mes Israel naleko nesin Yehuda le ka a ki'at nane.

¹²UISNENO anlelu kau nao he uton lasi i neu Israel: “Hoi Israel le ka a ki'at, amfani aum nai meu Kau! Au uhenu nok lasi manekat ma amnaut Au of ka uto'an ko fa piut.

¹³Am au nai neu ho musanab ma amlaban mulali ho UISNENO. Am au nai neu anbi ale bale hau u'naek mahafo, hom opan mulali ho lasi sinmakat amle'ut neu ale uisneno teta uf bian, ma ka mutuin fa ale Au plenat sin. Au, UISNENO Kau, Au ukua ulali Au a'ak.”

¹⁴UISNENO nakua In a'an nak, “Hoi to ka aki'at, amfani aum nai neu Kau! Hi le nane bale bela mnasi. Au of aiti ufani ki, es na'ko kot es, atoni nua na'ko uf mese ma Au eki ufani ki neu Tubu Sion.

¹⁵Of Au fe neu ki atopus-atopus le na'ki neu Kau. Sin of ana' ma antopu ki nok nek manoe ma nok nek mahine.

¹⁶Ma leka kalu hi amsato ma mimfau amteni anbi pah le i, of atoni ka na'uab anteni fa, sin of kan natenab fa neu hen mo'e Peti Manta'en bian anten.

¹⁷Anbi tabu nane kot Yerusalem of antek nak ‘Bale Toko UISNENO’, ma ale uf-uf of sin nabua anbi kot nane he naluli ma nabes neu Kau. Sin of ka natuin fa sin nek lomit amonot ma amaufinut nane.

¹⁸Israel of sin nabua nok Yehuda, ma bua'-bua' sin nem na'ko pah mapolin anbi aon bian a'li. Sin of anfani nem neu pah le Au fe ulali neu sin on pah bale bela neu sin amaf sin.”

¹⁹UISNENO nakua In a'an nak, “Israel Au lomi he simo ufani ko on Au anah, ma Au fe neu ko pah le namsenab ko, pah le naleko nesi na'ko pah pinan ok-oke. Au lomi he hom tek Kau mak ho ama, ma ka maen amteni fa mu'ko Kau.

²⁰Mes on bife le ka na'ki fa, ho amsa ka mu'ki fa neu Kau. Au, UISNENO Kau, Au ukua ulali Au a'ak.”

²¹Anbi tubu-tubu sin tunan anmu'i hanaf slutuf; nane hanaf to Israel le ankoa ma antoti piut, natuin sin nasanab nalalien, ma sin nikan sin UISNENO.

²²Hoi hi al-al ki le hi misaitan milali UISNENO, amfani aim nai! In of naleko ki, ma anmo'e ki he hi mi'ki. Hi miuab mak, “Namneo, hai amfani aim meu hai UISNENO, natuin hai Uisneno es In.

²³Ka maota fa ma luman kun hai bua'-bua' miluli meu le'u mahuma anbi tubu-tubu sin tunan! Ababat neu Israel al nem na'ko hai UISNENO.

²⁴Luli besa neu Baal, le'u mahuma le namaeba kai nane anmo'e kai talan te hai anah-anah sin namneku ma hai mu'it sin bijae ma bibi kase, ale nane ok-oke bale bela mnasi na'ko hai amaf sin na'ko batan ahun-hunut.

²⁵Es nane te, maut he hai amsutai mae nai, ma maut he hai amfani si'ut nai. Natuin, hai ma hai amaf sin hai misanab milalien neu hai UISNENO, ma hai ka mi'ki mit fa neu In plenat-plenat sin.”