Read Uab Meto YEREMIA 30 Bible Online

YEREMIA 30 - Uab Meto bible

YEREMIA 30

¹UISNENO, Israel sin Uisneno,

²nakua In a'an neu kau nak, “Amtui nai anbi sulat mese ale sa' le Au uton ulali neu ko.

³Natuin of antia in tabu Au uleko ufani Au to Israel ma Yehuda sin monin. Of Au eki sin anfani nem neu pah le Au fe ulali neu sin amfenu. Pah nane of sin anpal nafani. Au, UISNENO Kau, ukua ulali Au a'ak.”

⁴UISNENO nakua In a'an neu to Israel ma Yehuda nak,

⁵“Au nen ulali han sakoit atoni le anlilitai, han sakoit atoni le namtau le kan mu'i fa halan.

⁶Ait mitenab ma amtae mileko! Nabe'i ka naimone nahonis li'ana? Kalu onane nansa' Au it ale naimone sin human anmutik ma anpoh sin tain neki sin niman on fenai le he nahoni?

⁷Neno le neki lasi amtaus nem antia nalalien, neno le kan mu'i fa sa' nanes'on nokan. Neu Au to, nane neno le neki lasi amtaus; mes Au of ufetin sin.”

⁸UISNENO Akuasat Afinit nakua In a'an anteni neu In to nak, “Leka neno nane nem antia, nepat le antao neu ho hanum of Au ipu ani, ma ho kolen besi of Au ufetin ani. Hi of kam fani fa ate atoni anao amnemat.

⁹Hi of miusi neu Kau, hi UISNENO, ma neu atoni mese na'ko Nai Daud in sufan of Au aiti anfani kesel.

¹⁰Israel Au to kais hi mimtau! Au ate Nai Yakub kais amlilitai! Hi ma hi sufam sin of Au ufetin ki na'ko pah a'lo, bale le nis ma anbe'u ki anbi makenat. Hi of amfani ma mitua hi pah nok halan. Hi of amoni nok tainine; kan mu'i fa sa' le hi he mimtausan.

¹¹Au of aum ma of Au ufetin ki. Uf-uf, bale le Au usana ki anbine of Au ule'un ani sin, mes hi Au ka mo'e ki fa onane. Namneo hi of ka mifetnom fa na'ko kasat mes Au kasat neu ki namneo anmatom nok Au lomik. Au, UISNENO Kau, ukua ulali Au a'ak.”

¹²UISNENO nakua In a'an neu In to nak, “Hi menas ma'fen le'uf, neu hi papa' kan mu'i fa in le'u ai in malo.

¹³Atoni mese amsa ka nahelnon fa neu ho he muleko, kan mu'i fa le'u ai malo neu ho bisul sin. Kan mu'i afnekan neu ho he muleko.

¹⁴Ho bia leko sin ok-oke sin nikan nalali ko; sin kan lomi fa he natenab ho aom. Onle musu Au upe' ma kas ki nok matani, natuin hi sanat namfau ma hi tanhais anae le'uf.

¹⁵Kais amsakoi amteni neu ale ho papa' sin, natuin neu ko kan mu'i fa afnekan he muleko. Au kas ki onane natuin hi sanat namfau ma hi tanhais anae le'uf.

¹⁶Mes tabu le i sin le anolo ko of Au olo sin, ma ho musu sin ok-oke of naiti neki sin neu bale polin. Of Au hamu'i sin le anhamu'i ki of Au usik sin le sin nasik ki.

¹⁷Maski hi musu sin na'uab nak, ‘Anpolin nalali Sion, ma katit fa esle' hen kiso in',’ mes maski onane of Au mo'e ki hi mileko amfani, ma ale hi papa' sin of Au paloli sin.”

¹⁸UISNENO nakua anteni In a'an nak, “Hi, Au to of Au nek umnau ki ma Au uleko hi monim anbi hi pah kun. Of hi mifena Yerusalem anteni, ma of hi mileko in sonaf.

¹⁹In tuafen of naliatas Kau neki sit ma anhunun ma ankoa nok amlilat. Au mo'e ma antola sin ma ka nasi'ut fa sin anteni, ma sin amfauken of ansato sin piut.

²⁰Ho nonot of Au mo'e sin naleko on afi ahunut ma anhake anteni on Au to. Sin le anhamu'i Au to of Au kas sin amsa.

²¹Kesel le naplenat ki nem na'ko hi nonot. Nok alekot of in anhaumak Kau leka Au boin in hen haumak Kau. Natuin sekau ka nabe'i anhaumak Kau natuin in lomin kun? Hi of amfani Au to ma Au fani hi Uisneno. Au UISNENO Kau es uton lasi nane.”

²³UISNENO In to'as on oki, on anin nautus le anfoe ma namaun antoman atoni-atoni amle'ut, ma of kan sanu fa leka ale In salit nane In nanaoba nani. Anbi neno amunit In to of nahin lasi nane.