Read Uab Meto YEREMIA 31 Bible Online

YEREMIA 31 - Uab Meto bible

YEREMIA 31

¹UISNENO nakua In a'an nak, “Of antia in tabu Au fani Uisneno neu nonot Israel ok-oke, ma sin anfani Au to.

²Anbi mnela hufui Au ulile Au nek amnaut neu sin le nafetnon na'ko lasi maten. Leka nonot Israel nami tainine,

³na'ko lo Au ulile Au aok neu sin. Hoi to Israel, na'ko ahunut Au nek umnau ki piut, ma piut-piut of Au ulile ak Au nek umnau ki piut.

⁴Hi nonot of Au mo'e sin anmoni nok leko on afi ahunut. Hae es anteni hi of maiti heo', ma mibso' nok amlilat.

⁵Hi of amfai lene tua min kase anbi Nuaf Samaria le asenat sin of sin anseu in fuan amsa.

⁶Namneo of antia in tabu ale apao kot ankoa anbi Nuaf Efraim tuakenu nak, ‘Aim he hit atnao teu Sion teu hit UISNENO.’ ”

⁷UISNENO nakua In a'an nak, “Amsi nai nok amlilat neu Israel, Au nonot — uf ahunut na'ko ale uf. Amsi nai sit pules, ma amsaksi nai mak: ‘UISNENO nafetin nalali nesif na'ko In to.’

⁸Na'ko aon bian a'li Au eki sin anfani nem; Au bubun sin na'ko pah-pah sin tu'an. Atoni mat folo ma atoni hae uku sin of nok sin, onane amsa fenai le fe nahoni ma anhaumak he nahoni. Sin al sin ok-oke of anfani nem nok fatuf le anaek anbi pah le i.

⁹Sin anao nok matnu le ansai, Au halin ma tuntaku sin. Au eki sin sin anao nok bale-bale le oe namfau, anao nok bale mnela anbi bale le sin kan pastun fa. Au fani on amaf, neu Israel; Au anmone anaet nane es Nai Efraim.”

¹⁰UISNENO nakua In a'an nak, “Amnen nai hoi uf-uf! Mutiaba nai Au a'ak neu tasi bian; Au to le Au usitab ma usana ulali sin of Au bubun ma Au panat ma pao sin on atukus anpanat ma anpao in bibi kase sin.

¹¹To Israel Au fe ulali aomina neu sin ma Au ufetin sin na'ko uf abe'it.

¹²Of sin anao neu Tubu Sion ma anfani nem nok humaf knino ma ansi nok amlilat natuin sa' le Au fe neu sin, esle' ane kase, mina, tua mina mtasa, bijae ma bibi kase. Sin of on etu le oe nanokbon, ma kan labu fa sa'-sa'.

¹³Anbi neno nane ale li'feto munif of nabso' nok amlilat. Mnasi ma munif bua'-bua' anmoni nok ua alekot, natuin of Au fe neu sin neka mina. Sin susal Au ubaina ma anfani amlilat. Sin nek nu'ut Au ubaina ma anfani ua alekot.

¹⁴Sin Ana' fuat knino of Au umsenab sin eki bukae le nathoe; ma sa' ok-oke le Au to anlomi of Au fe ani neu sin. Au, UISNENO Kau, es uton lasi nane.”

¹⁵UISNENO nakua In a'an nak, “Hanaf kaet ma kulut anbol nem na'ko Rama, ma sakoit ma sananet le an aum nan nok nek susal. Bi Rahel ankae neu in anah-anah sin ma in kan lomi fa hen halin in natuin in anah-anah sin katit fa sin.

¹⁶Musnasanab ho kaet nai ma amnose mumeto ho matnu nai! Ka son-sona fa ho susal ma ho kaet neu ho anah-anah sin. Of anmu'i seunbanit neu ko, ho anah-anah sin anfani nem na'ko pah musu.

¹⁷Anmu'i panet ma afnekan neu ko anbi neno amnemat; ho anah-anah sin of anfani nem neu ho kuan in enon.

¹⁸Au nen to Israel na'uab nahenu nok nek susal nak, ‘Koi UISNENO, hai onle mu'it le fe kan heke nan kai fa mes Ho munoina kai he nati' hai mituin, ma tabu i hai miloitnom neu hem fani neu Ko. Es nane te, meki mufani kai, koi hai UISNENO.

¹⁹Hai amkoti milali Ko, mes hai nekam nanu'on neu taos nane. Leka Hom kas mulali kai, hai miluli hai nakam natuin nek susal. Hai mae ma mibau natuin hai misanab milali anbi tabu hai munif kai.’

²⁰Israel, ho Au anah le Au nek ani, anah amanekat, Au nekak in fuan. Hae fauk-fauk Au sali ko mes Au umnau ko piut nok sinmakat. Of Au tao ma mo'e ko nok nek amnaut.

²¹Mutaka' nai lanan-lanan, muhakeb nai taka'-taka' na'ko lanan ma mami nai lanan le afi ahunut hom nao mokan. Hoi, Israel, amfani aum nai! Amfani aum nai neu ho kot-kot ahunut sin.

²²Of ante leka ho nekam fe naoni piut, hoi nonot le ka mu'ki neu Kau? Au mepu ulali sa'-sa' le neki lasi amkakan — onle fenai nahafo naimone.”

²³UISNENO Akuasat Afinit, Uisneno Israel, nakua In a'an nak, “Leka Au to Au mo'e sin ma anmoni nok alekot on afi ahunut, onane pah Yehuda nok in kuan-kuan sin of sin nen antani atoni na'uab nak, ‘So nati' UISNENO anfe tetus neu tubu knino Yerusalem bale maika al neu In kun.’

²⁴Of atoni natua anbi Yehuda ma in kuan-kuan sin. Anbi nane of anmu'i atof lene ma ahao mu'it nok bijae ma bibi kase.

²⁵Ahaet sin of Au fe neu sin asnasat, ma le anlimae natuin amnahas of Au umsenab sin.

²⁶Anbi tabu nane atoni of na'uab nak, ‘Leka au tup a fini, au naben upeni asnasat.’

²⁷Au, UISNENO Kau, ukua ulali Au a'ak ak ante in tabu pah Israel ma Yehuda of Au utua uhenu ani nok atoni ma mu'it.

²⁸On afi ahunut Au pao ma panat ulali sin he nati' namuni te Au bok sin, utseleb sin ma uskuku sin, onane amsa of Au panat sin he nati' Au uhelan sin ma ufena ufani sin.

²⁹Anbi tabu nane atoni of na'uab anteni nak, ‘Atoni mnasi es anbukae hau fua mahai, in anah es nisin anmahai,’

³⁰so mak sekau es anbukae hau fua mahai, in nisin kun es of anmahai. Atoni mese-mese of anmate natuin in sanat kun.”

³¹UISNENO nakua In a'an nak, “Of antia in tabu Au mo'e lasi manta'en fe'u ok to Israel ma Yehuda.

³²Mes lasi manta'en nane ka on fa lasi manta'en le Au mo'e ok sin amaf sin leka Au na' ma topu sin anpoi na'ko Mesir. Maski Au onle naimone mese neu sin, mes sin nasuan Au lasi manta'en ok sin.

³³Le i lasi manta'en fe'u le of Au mo'e ani ok to Israel: Ale Au plenat sin of Au tao ani sin anbi sin nekan nanan, ma Au tui ani sin anbi sin nekan. Au of anfani Uisneno neu sin, ma sin of anfani Au to.

³⁴Ka nabe'i anteni fa es na'ko sin amsa he nanoina sin biaf sin benuf he nahin UISNENO. Natuin sin ok-oke, anaet abaut, of sin nahin Kau. Ale sin tanhais of Au nikan ani, sin sanat-sanat sin of Au sako ani sin. Au, UISNENO Kau, ukua ulali Au a'ak.”

³⁵UISNENO naloitan ma nabalab manas neu hen tana anbi ne-neno; funan ma afkun-afkun neu hen tana anbi fa-fai. In anselo tasi talan te an'oki ma anpes, UISNENO Akuasat Afinit, In kanan kun esle' nane.

³⁶UISNENO In anmanta'en nak, “Leka ale lekat lulut pah pinan fe ka nabaina fa, Israel amsa of anhake nabalah on uf mese.

³⁷Kalu onle hae es ansu' nabe'i neno tnanan, ma antae nalek-leko pah pinan in tu'an, anbi tabu nane of Au tite Israel natuin ale sin taos sin mo'et amle'ut. Au, UISNENO Kau, ukua ulali Au a'ak.”

³⁸UISNENO nakua In a'an nak, “Of antia in tabu nafena nafani Yerusalem ok-oke on Au kot, na'ko Elfatu Hananeel talan te Eno Naek Si'uf.

³⁹Na'ko nane in nakat anao neu Tubu Gareb, oke te anbeo neu Goa.

⁴⁰Nonof nane ok-oke, le anpake on bale nitu nate ma bale polin maklafu, ma ale lene anbi Noel Kidron ninen talan te Eno Naek Bikase antam nok neno saen, of anbeti nateta nani neu Kau. Kot Yerusalem of ka natseleb anteni fa ai ka naskuku anteni fa.”