Read Uab Meto YEREMIA 32 Bible Online

YEREMIA 32 - Uab Meto bible

YEREMIA 32

¹Anbi ton bo'mese Nai Zedekia Kesel Yehuda in ana' aplenat, nane ton bo'es am fanu Nebukadnezar kesel Babel naplenat, UISNENO nakua In a'an neu kau.

²Anbi tabu nane solalus kesel Babel fe sin nape' Yerusalem. Kesel Nai Zedekia an ek kau anbi in sonaf po'an

³sin natlak kau natuin au uton ulali ak UISNENO nakua In a'an on i, “Kesel Babel of Au ufetin he nis ma anbe'u ma antoko kot i,

⁴ma Kesel Nai Zedekia of ka nafetnon fa. Of nana'at in neu kesel Babel ma natef nok kesel nane ma na'uab nok in anmese.

⁵Namuni te of naiti neki Nai Zedekia anao neu Babel ma namaika anbi nane talan te Au kas in. Maski in anken atoni Babel, mes in of ka nis fa. Au, UISNENO Kau, ukua ulali Au a'ak.”

⁶UISNENO nakua In a'an neu kau

⁷nak Nai Hanameel, au baba Nai Salum anmone, in of nem he au toti he nati' au sos in nain anbi Anatot anbi Nai Benyamin in pah. Natuin au es in biaf ahaumakat le au mu'i hak he sos in nain nane.

⁸Oke te anmatom onle UISNENO nakua nalali In a'an, fun nai Hanameel in nem neu kau anbi sonaf po'an, ma antoti he nati' au sos in nain. Es nane te au uteb namneo-namneo UISNENO nakua nalali In a'an neu kau.

⁹Ma au sos nain nane na'ko Nai Hanameel nok upan noni muti bo'es am hitu. Fun au boin saksi-saksi sin ma anbi sin matkenu au tui au kanak anbi sulat sos nain nane, oke te au tao takaf plenat ma au tai noni nain in upan.

¹¹Namuni te au aiti sulat sos nain nane le au takaf plenat ulali ma matui nok lekat lulut ma lasi bian-bian anteni. Au aiti amsa sulat nasoni in nesan mes kan mu'i fa in takaf plenat,

¹²ma sulat nua en nane au fe sin neu Nai Barukh Nai Neria anmone Nai Mahseya in upuf. Au una'at ani anbi Nai Hanameel in matan ma saksi-saksi sin le antui nalali sin kankenu anbi sulat-sulat nane, ma anbi atoni-atoni le sin antoko anbi nane sin matkenu anbi sonaf po'an.

¹³Anbi sin matkenu ok-oke au u'uab neu Nai Barukh ak,

¹⁴“UISNENO Akuasat Afinit, Uisneno Israel, anfe plenat he nati' ho maiti sulat nua en i, sulat matakaf plenat ma ka ma takaf plenat, ma mutam sin anbi nai besi mese he nati' nabalah anbine a'lo.

¹⁵UISNENO Akuasat Afinit, Uisneno Israel, nakua In a'an nak, ume, nai, ma lene tua min kase of nasosa anteni sin anbi pah i.”

¹⁶Leka au una'at ulali ale sulat sos nain nane neu Nai Barukh, au onen toti ak,

¹⁷“Koi UISNENO Amnanut Afinit. Ho es ampakae neno tunan ma pah pinan meki Ho kuasat ma Ho be'im matanim anaek. Katit fa sa' es amsa le he mafena neu Ko.

¹⁸Ho mulile ma muton Ho manekam abal-balat neu atoni nifun-nifun, mes Ho amsa amkas atoni natuin sanat na'ko sin amnasi sin. Ho Uisneno apinat, abe'it ma matani Ko; Ho kanam UISNENO Akuasat Afinit.

¹⁹Ho mepu sin le nane lo matani, ma Ho taos Ho mo'et sin lo neki sanmakat; Ho mit ale sa' le atoni pah pinan anmo'e ma Hom seunbanin sin anmatom nok sin mo'et.

²⁰Na'ko ahun-hunut Ho mo'e lasi sanmakat ma lasi-lasi matani anbi Mesir ma talan te batan i amsa Ho es fe anmo'e he neu atoni Israel ai he neu ale uf bian. Es nane te na'ko neno i Ho kanam mateka kun anbi me-me.

²¹Nok Ho kuasat ma Ho be'im Ho matanim le anae le'uf Ho meki to Israel anpoi na'ko Mesir. Ho mo'e ale lasi taka' ma ale lasi sanmakat ma ale lasi bian anteni le anbol ma neki hakataus neu musu sin.

²²Pah alekot ma maafa i Au fe ani neu sin onle Au ba'an ulali neu sin amfenu.

²³Mes leka sin nem neu pah i ma nasik nani, sin ka natuin fa ale Ho plenat sin, ma kan moni natuin fa ale Ho noina sin. Ale sa' le Ho muplenat neu sin katit fa plenat mese amsa le sin he nanaoba. Es nane te Hom fe ale amle'ut i nem neu sin.

²⁴Atoni-atoni Babel sin nafena nalali baki lape anfun natef nan kot he nasik nani, ma tabu le i sin nape' kot nane. Makenat, amnahas ma menas anaek of anmo'e kot i anmofu neu sin niman. Ho mit nak ale sa' le Au uton nane anbol nalalien.

²⁵Mes maski onane, koi UISNENO Amnanut Afinit. Ho es amlelu kau he sos nain i anbi saksi-saksi sin matkenu, maski of ka lo fa anteni kot i of atoni Babel nasik nani.”

²⁶Nalali te UISNENO nakua In a'an neu kau nak,

²⁷“Au UISNENO Kau, Uisneno neu atoni ok-oke. Kan mu'i fa mafena neu Kau.

²⁸Kot i of Au ufetin ani he nati' Nebukadnezar kesel Babel nok in solalus sin naplenat nani. Sin of nasik nani kot i,

²⁹ma notu nani ok-oke nok ale ume anbi bale le sin nafena Au to'as, natuin anbi ume-ume nane sin apupun sin notu sin atu fomeni neu Baal ma an op tua mina mtasa neu ale uisneno teta.

³⁰Na'ko ahun-hunut sin a'monin, atoni Israel ma atoni Yehuda sin anmo'e Kau talan te Au ka malin fa. Sin nafena Au to'as neki sin taos sin mo'et amle'ut.

³¹Na'ko afi nafena kot i, sin tuakenu anmo'e nalali Kau ma Au uto' anae le'uf. Au ufek ulali he ule'un ani sin,

³²natuin ale lasi amle'ut le atoni Yehuda ma Yerusalem anmo'e nok ale sin kesel sin, ana' aplenat sin, Ana' fuat knino sin, ma ale sin Mafefa knino sin.

³³Sin nasaitan nalali Kau ma maski Au unoina sin piut, sin kan lomi fa he nen ma kan lomi fa he nate'un.

³⁴Nesi na'ko nane ume le sin nafena he naluli ma nabes neu Kau sin nalahi nalali natuin sin le'u mahuma le neki mainisit anbi bale nane.

³⁵Sin nafena ale baki tulu neu Baal anbi Nonof Hinom, ma natulu sin anah sin neu Uisneno teta Molokh. Mes, Au ka lelu it fa sin hen mo'e lasi nane, nesi na'ko nane lasi nane kan moni nit fa anbi Au tenab neu sin hen mo'e lasi amle'ut human onle nane le anmo'e atoni Yehuda sin nasanab.”

³⁶UISNENO, atoni Israel sin Uisneno, nakua In a'an neu kau nak, “Yeremia, nonot Israel sin na'uab nak makenat, amnahas, ma menas anaek of anmo'e kot i anmofu neu kesel Babel in niman. Tabu le i, hom nen amsa sa' le of Au he uton.

³⁷Of Au nibun ubuab nonot i na'ko ale pah bale le Au usana sin natuin Au to'as fun Au to'as le anmaputu le'uf neu sin. Of Au eki sin anfani nem neu bale i ma Au ufetin sin he natua anbi bale i nok tainine.

³⁸Sin of anfani Au to, ma Au fani Uisneno neu sin.

³⁹Al of Au fe neu sin monit mese: esle', sin namtausan Kau talan te nabal-bal; lasi nane of neki alekot neu sin ma neu sin sufkenu.

⁴⁰Of Au mo'e lasi manta'en nabal-bal ok sin. Of Au ka usnas fa he mo'e alekot neu sin. Of Au mo'e sin namtausan Kau ma antola Kau nok sin nekan ok-oke he nati' sin kais na'lo Kau.

⁴¹Of Au malin he mo'e alekot neu sin, ma mo'e sin he natua nabalah anbi pah i talan te nabal-bal.

⁴²Onle Au fe ulali amle'ut neu nonot i, onane amsa of Au fe ani ale alekot le Au ba'an ulali neu sin.

⁴³Atoni na'uab nak pah i anfani nalali onle mnela hufui le atoni ma mu'it ka natua fa anbi nane, ma sin nak pah i anmofu nalali neu atoni Babel sin niman. Mes Au u'uab ak namuni of nasosa anteni lene-lene anbi pah i,

⁴⁴sul masusa of anmalak ma antakaf plenat nani, ma saksi-saksi sin of nahelan nani. Nane of anbol anbi Nai Benyamin in pah, anbi kuan-kuan anhaumak Yerusalem, anbi kot-kot Yehuda bale nuaf, anbi bale nuaf haen, ma anbi Yehuda neno aonbian a'ne'u. Nonot i of Au uleko sin monin anbi pah i. Au, UISNENO Kau, ukua ulali Au a'ak.”