Read Uab Meto YEREMIA 33 Bible Online

YEREMIA 33 - Uab Meto bible

YEREMIA 33

¹Leka sin fe ana' natau kau anbi po'an, au upeni han ba'an bian na'ko UISNENO,

²le anmo'e pah pinan ma anpakae ma nabela anbi in balan. In nakua In a'an nak,

³“Amhunun nai neu Kau, ma of Au utae ki; of Au uton neu ko lasi-lasi alekot le neki lasi amkakan le ho fe ka mueku mokan fa.

⁴Kesel Yehuda in sonaf ma ume-ume anbi kot Yerusalem anpukai nalali sin he nahelan be'it ma matani leka musu hen fun natef ma nape' kot. Mes Au, UISNENO Kau, Uisneno Israel, ukua Au a'ak nak,

⁵luman kun leka him laban atoni Babel, natuin lasi nane of anmo'e kot i nahenu nok aon nitu atoni amates le Au umate sin anbi Au to'as fun Au to'as le matani le'uf neu sin. Au ka lomi teni fa he it kot le i, natuin in tuafen sin mo'e nalali amle'ut.

⁶Mes namuni te of Au uleko ufani kot le i ma in tuafenu; sin of nabe'i anteni. Of Au fe neu sin alekot ma tainine le nathoe.

⁷Yehuda ma Israel of Au mo'e sin anmoni nok alekot on afi ahunut ma sin of anhake anfani on Au to.

⁸Of Au uknino sin na'ko ale sanat le sin anmo'e nalali neu Kau; ale sin sanat ma sin taos mo'et amle'ut of Au uneku ani sin.

⁹Yerusalem of anfani Au amlilat ma Au apinat. Ale uf anbi pah pinan of sin anfani namtau ma anlilitai ma antola Kau, leka sin nen ale lasi alekot le Au mo'e neu tuafen Yerusalem, ma neu halan aomina le Au fe ani neu kot nane.”

¹⁰UISNENO nakua In a'an nak, “Atoni na'uab nak bale le i onle mnela hufui, katit fa atoni ai mu'it le natua anbi nane. Sin uab nane lo namneo, natuin kot-kot Yehuda ma lanan-lanan anbi Yerusalem luman kun ok-oke; katit fa atoni ai mu'it le natua anbi nane.

¹¹Mes anbi bale-bale nane of atnen ateni hanaf amlilat ma hanaf amoket tolas mafet mamonet. Of atnen amsa sit pules atoni-atoni le neki tulu ma atnatas neu Au Ume. Sin of na'uab nak, ‘Miliatas nai UISNENO Akuasat Afinit, natuin In leko kun ma In manekan talan te nabal-bal.’ Pah le i of Au mo'e maafa on afi ahunut. Au, UISNENO Kau, ukua ulali Au a'ak.”

¹²UISNENO Akuasat Afinit In nakua In a'an nak, “Pah ma in kot-kot sin le onle mnela hufui i atoni ma mu'it ka natua nani fa. Mes maski onane, anbi neno amunit of anmu'i anteni mnela hun bale atoni natuku sin bibi kase sin.

¹³Anbi kot-kot bale nuaf, bale nuaf sin haen, bale Yehuda aon bian a'ne'u, anbi Nai Benyamin in pah ma kuan-kuan anhaumak Yerusalem, ma anbi kot-kot Yehuda, ale atukus of sin anso'i anteni ale sin bibi kase. Au, UISNENO Kau, ukua ulali Au a'ak.”

¹⁴UISNENO nakua In a'an nak, “Of ante in tabu Au unokab Au lasi manba'an le Au mo'e ulali ok Israel ma Yehuda.

¹⁵Anbi tabu nane atoni amneot mese na'ko Nai Daud in sufan of Au beti ani anfani kesel. Kesel nane of anmo'e sa' le amneot ma amnonot anbi pah ok-oke.

¹⁶Atoni Yehuda ma tuafen Yerusalem of In nafetin sin anmoni nok tainine. Kot Yerusalem of nakanab nak, ‘UISNENO Hit Afetin.’

¹⁷Au, UISNENO Kau, Au manta'en nak of anmu'i piut es na'ko Nai Daud sufan le hen fani Kesel Israel;

¹⁸of anmu'i piut ale Ana' fuat knino na'ko uf Nai Lewi le sin antuthae Kau ma natulu fua tulu mu'it, ane kase ma fua tulu mnotu.

¹⁹UISNENO nakua In a'an neu kau nak,

²⁰“Au futu ulali lasi manta'en ok manas ma fai, he nati' manas ma fai sin nem anmatom nok sin tabu; lasi manta'en nane ka nabe'i fa he namneku.

²¹Onane amsa Au futu ulali lasi manta'en ok Au ate Nai Daud, nak na'ko in sufan of anmu'i piut esle' hen fani kesel; ma Au futu ulali lasi manta'en of ale Ana' fuat knino na'ko Nai Lewi sufan nak sin of antut hae Kau piut. Fun ale lasi manta'en nane ka nabe'i fa he nose naneku sin.

²²Of Au sato Au ate Nai Daud in sufan ma ale Ana' fuat knino uf Nai Lewi, talan te sin amfaun on snaen anbi tasi ninen ma on afkun anbi neno tnanan.”

²³UISNENO nakua In a'an neu kau nak,

²⁴“Ho mit mulali sa' ka le atoni na'uab antom Israel ma Yehuda? Sin na'uab nak Au polin ulali nonot nua en nane le Au beti ulali sin. Es nane te sin ankiso Au nonot te nabau, ma sin kan kiso fa sin on uf mese anteni.

²⁵Mes on Au, UISNENO Kau, Au mo'e ulali lasi futus manta'en nane ok manas ma fai, ma Au uhakeb plenat le anlek neno tunan ma pah pinan,

²⁶onane amsa of Au na' uhelan Au lasi manta'en piut ok Nai Yakub in sufan ma ok Au ate Nai Daud sufan. Es na'ko Nai Daud sufan of Au beti ani he naplenat Nai Abraham, Nai Ishak, ma Nai Yakub sufan. Of Au nek umnau Au to, ma Au mo'e sin anmoni nok alekot anteni.”