Read Uab Meto YEREMIA 34 Bible Online

YEREMIA 34 - Uab Meto bible

YEREMIA 34

¹Leka Nebukadnezar kesel Babel nok in solalus amakenat le ansato anteni sin matanin natuin ale solalus pukan-pukan na'ko ale uf ma pah le nausi neu in sin nem ma nape' Yerusalem ma kot-kot le anhaumak anbi nane, UISNENO nakua In a'an neu kau.

²In anlelu kau ma au nao neu Nai Zedekia Kesel Yehuda, ma au u'uab neune ak on i, “Au, UISNENO Kau, atoni Israel sin Uisneno, of Au una'at kot le i neu kesel Babel ma in of notu nani.

³Of ho ka mufetnom fa, mes anheke ko ma nana'at ko neu in. Of ho mutef mokan ma mu'uab mokan anmes, oke te of neki ko neu Babel.

⁴Mes hom nen nai Au uab le i antom ko, Zedekia! Mes ho ka mate fa ambi makenat nanan,

⁵mes of ho mate nok tainine. Ma onle to notu atu fomeni leka sin sub ho amaf sin le naplenat nahunun ko, onane amsa to of notu atu fomeni neu ko. Sin of ankulu ma ankae ma nak, ‘Koi! Hai Kesel ka esne fa anteni!’ Au, UISNENO Kau, ukua ulali Au a'ak.”

⁶Fun han ba'an UISNENO nane au utiaba ani neu Kesel Nai Zedekia anbi Yerusalem,

⁷leka solalus kesel Babel sin fe nape' kot nane. Sin amsa nape' kot Lakhis ma Aseka, ma kot nua mabaki lape le fe anhake nabalah anbi Yehuda.

⁸Kesel Nai Zedekia ma tuafen Yerusalem sin anmo'e lasi manta'en he nafetin

⁹ate-ate Ibrani sin, he atoni ma bife he nati' katit fa es amsa na'ko nonot Israel le hen aten atoni na'ko sin nonot.

¹⁰To ok-oke ma ale ana' aplenat sin le anmo'e nalali lasi manta'en he nafetin sin ate sin ma of kan aten anteni fa sin, namneo-namneo sin nafetin ale sin ate sin le nane.

¹¹Mes nalali te sin tenab nate'un, oke te sin naiti nafani sin ate-ate nane, ma naseke sin anfani ate anteni.

¹²Fun UISNENO, atoni Israel sin Uisneno, anlelu kau u'uab ak on i neu atoni-atoni nane ak, “Leka Au eki hi amaf sin anpoi na'ko Mesir ma Au ufetin sin na'ko lasi ate, Au mo'e ulali lasi manta'en ok sin.

¹⁴Au u'uab ak ale ate Ibrani le antuthae nan ton ne in a'lon, mes mifetin sin anbi ton hitu in amsopun. Mes hi amaf sin kan lomi fa hen simo sa' le Au umolok nane.

¹⁵Anbi neno fauk afinit hi mibaina hi taos hi mo'et ma him tao ma mo'e sa' le anhalin Au nekak. Hi al-al ki amlomi he mifetin ale ate na'ko hi nonot, ma hi mo'e lasi manta'en mok Kau anbi Au Ume knino.

¹⁶Ale ana' aplenat Yehuda ma Yerusalem nok ale ameput anbi sonaf, ale Ana' fuat knino, ma ale hi apanat pah hi mimepan milali lasi manta'en nane fun him lolo bijae, ambati pa' nua, ma hi amnao mok sisi pa' nua en nane sin atnankenu. Mes, namuni te hi tenab in nabaina ma hi mile'uf Kau. Ate-ate le hi mifetin milali sin matom nok sin lomin, hi maiti mifani sin ma miseke sin hen fani ate anteni. Es nane te, Au UISNENO Kau, ukua Au a'ak nak him tanhai milali Au plenat, ma ka mituin fa lekat lulut sin, natuin hi ka mifetin fa hi bia benu sin nonot Israel. Nah, tabu i leko Au fe neu ki lais sona: lais sona neu he mate ambi makenat in nanan ai natuin menas a'naek ai natuin amnahas. Of Au mo'e ki onle hi mo'e bijae le him lolo nane. Of Au mo'e ale uf anbi pah pinan sin naben lasi amtaus leka ankiso sa' le Au mo'e neu ki.

²⁰Of Au una'at ki neu musu le anlomi he namate ki. Hi aom nitu nane of kolo ma mu'it abulalut neku nani sin.

²¹Nai Zedekia Kesel Yehuda ma ale in ana' aplenat sin of Au una'at sin neu atoni-atoni le anlomi he namate sin. Of Au una'at sin neu solalus Babel, le tabu i nasaitan nalali ki.

²²Of Au fe plenat he nati' sin anfani nem neu kot le i, oke te nape', nasik, ma notu nani kot le i. Kot-kot Yehuda of Au mo'e ani on mnela hufui le atoni ka natua fa anbine. Au, UISNENO Kau, ukua ulali Au a'ak.”