Read Uab Meto YEREMIA 36 Bible Online

YEREMIA 36 - Uab Meto bible

YEREMIA 36

¹Anbi ton ha leka Nai Yoyakim Nai Yosia anmone anfani Kesel Yehuda, UISNENO nakua In a'an neu kau nak,

²“Maiti nai sulat manunu mese, ma amtui nai anbi nane ale sa' le Au uton ulali neu ko antom Israel ma Yehuda, ma antom ale uf. Amtui nai ale Au a'ak na'ko afi ahun-hunut le Au umolok neu ko anbi batan Nai Yosia in ana' aplenat talan te neno le i.

³Oni atoni Yehuda nasnas na'ko anmoe amle'ut leka sin nen neu ale lasi amle'ut le of Au fe ani neu sin. Fun of Au sako sin sanat ma sin tanhais.”

⁴Es nane te au boin Nai Barukh Nai Neria anmone ma uton neune ale sa' le UISNENO In naton neu kau. Fun nai Barukh in antui nani ale lasi nane ok-oke anbi sulat manunu nane.

⁵Nalali te au fe ani plenat i neu in ak, “Au ka ufetin ko fa anteni hem tam anbi Ume UISNENO.

⁶Es nane te, leka ante in neno atoni nanahon, mes hom nao ambi nane, ma amso'i nok han anaek ale sa' le Au uton ulali neu ko, he nati' sin nen ale sa' le UISNENO naton nani neu kau. Hom tao ma moe lasi nane anbi bale le sin mese-mese nabe'i sin nen ko anbi Ume UISNENO, fun neu sin atoni Yehuda le sin nem na'ko sin kot-kot sin.

⁷Oni nok nane te of sin onen toti neu UISNENO, ma sin nate'un na'ko ale sin taos sin mo'et amle'ut. UISNENO nato'an sin anae le'uf ma ansali sin.”

⁸Fun Nai Barukh in anso'i a'an UISNENO anbi Ume UISNENO, onle au fe ani mepu neune.

⁹Anbi fun sio antam ton nim Nai Yoyakim Kesel Yehuda in nanaoba plenat, to sin nanahon neu he napeni amnaut na'ko UISNENO. Tuafen Yerusalem ma atoni-atoni le sin nem na'ko kot-kot Yehuda sin al-al sin nanahok.

¹⁰Oke te Nai Barukh in anso'i na'ko sulat manunu nane ale sa' le au uton ulali, ma atoni ok-oke sin al-al sin a'nen. Anso'i sulat nane anfatan anbi Ume UISNENO anbi Nai Gemarya in bale mepu, Nai Safan anmone lultunis pah. Bale mepu nane anbi bale po'an Ume UISNENO anbi aon bian fafon, anhaumak lanan hen tam neu Eno Naek Fe'u anbi Ume UISNENO.

¹¹Nai Mikhaya Nai Gemarya anmone ma Nai Safan in upuf sin nen Nai Barukh anso'i a'an UISNENO na'ko sulat manunu nane.

¹²Oke te in anao neu sonaf neu lultunis pah in bale mepu. Anbi nane ale ana' aplenat sin fe nabua ma sin namolok. Nai Delaya Nai Semaya anmone, Nai Elnatan Nai Akhbor anmone, Nai Gemarya Nai Safan anmone, Nai Zedekia Nai Hananya anmone, Nai Elisama lultunis mese, ma anaet bian le fe anbi nane.

¹³Nai Mikhaya naton neu sin, ale sa' le Nai Barukh anso'i anbi Ume UISNENO.

¹⁴Oke te ale anaet nane sin ansonu Nai Yehudi (Nai Netanya anmone, Nai Selemya upuf, ma Nai Kusyi in upu' tilin) neu Nai Barukh neki plenat he in nem neki sulat manunu le in anso'i nalali nane neu sin. Es nane te Nai Barukh in neki sulat manunu nane.

¹⁵Sin nak, “Amtoko nai,” sin nak neune onane, “amso'i neu kai sulat manunu nane.” Nai Barukh in amsa natuin.

¹⁶Leka in anso'i nalali, sin anmakison es nok es nok amtaus oke te sin nak neu Nai Barukh nak, “Hai mes mitiab lasi i neu kesel.”

¹⁷Nalali te sin natoti in nak, “So ho muton neu kai neu hom tui ale lasi i ok-oke onme. Ai Nai Yeremia in es naton neu ko ka?”

¹⁸Nai Barukh in natae nak, “Namneo, ale uab mese-mese le matui anbi sulat i Nai Yeremia in es naton nani neu kau, ma au tui ani eki oe metan anbi sulat manunu le i.”

¹⁹Sin natae nak, “Ho ma Nai Yeremia hi mes he mitolo'. Kais talan te atoni nahin hi bale tolo' nane.”

²⁰Ala ana' aplenat sin antao sulat manunu nane anbi Nai Elisama lultunis nane in ke'an, oke te sin anao neu kesel ma naton neune ale lasi nane.

²¹Oke te kesel anlelu Nai Yehudi anao he naiti sulat manunu nane. Leka in naiti nalali na'ko Nai Elisama in ke'an, Nai Yehudi anso'i nani anbi kesel ma neu ale ana' aplenat le anhake anfun natef nan in.

²²Tabu nane fun sio, ma kesel fe antok anlal ai anbi sonaf matan natuin tabu manikin.

²³Onane fe Nai Yehudi anso'i nalali ela tenu ai ha, kesel anheli ela nane neki besi ana mese ma anpolin natam anbi ai in nanan. In anmoe onle nane piut talan te sulat manunu nane anputu nani ok-oke.

²⁴Maski Nai Elnatan, Nai Delaya, ma Nai Gemarya sin antoti nok matani he kesel kais notu sulat manunu nane, mes in kan lomi fa he nen sin. He kesel ai ale ana' aplenat bian sin le sin nen sulat nane in nesan sin ka namtau nahin fa ma sin ka naton fa nek ate'un.

²⁶Nesi na'ko nane kesel anlelu in anmone Nai Yerahmeel, nok Nai Seraya Nai Azriel anmone ma Nai Selemya Nai Abdeel anmone, he nati' sin anheke kau ma au lultunis Nai Barukh. Mes UISNENO natolo' kai.

²⁷Leka Kesel Nai Yoyakim in notu nalali sulat manunu le au uton ani neu Nai Barukh, UISNENO anlelu kau

²⁸au aiti sulat manunu bian anteni, ma au tui ani lasi ok-oke le matui nalali anbi sulat manunu ahunut nane.

²⁹UISNENO anlelu kau ma au uton neu kesel ak on i, “Ho motu mulali sulat manunu nane, ma ho mutam Nai Yeremia mak nansa' hom tui mak kesel Babel in of nem ma naskuku nale'un pah i ma namate in tuafen nok ale sin mu'it-mu'it sin.

³⁰Es nane te, Au, UISNENO Kau, ukua Au a'ak neu ko, hoi Kesel Nai Yoyakim, nak katit fa es amsa na'ko ho sufam, of naplenat on Kesel Nai Daud sufan. Ho aom nitu of anpolin napoitan, fun manas anhoi anbi ne-neno, ma akum manikin antai anbi fa-fai.

³¹Ho, ma ho sufam, ma ale ho ana' aplenat sin of Au kas sin natuin ale sanat le hi moe. Of Au fe nem neu ki ale amle'ut le Au uloitan ulali neu ki, natuin leko he ho ai tuafen Yerusalem ma Yehuda hi kam sian fa ale Au salit-salit sin.”

³²Fun au aiti sulat manunu mese, ma au fe neu Nai Barukh au lultunis nane. Oke te in antui nani ale sa' ok-oke le au uton ani neune, esle' sulat manunu ahunut in nesan ma ansato anteni neki han ba'an bian papmese onle nane.