Read Uab Meto YEREMIA 37 Bible Online

YEREMIA 37 - Uab Meto bible

YEREMIA 37

¹Anbi tabu Nebukadnezar kesel Babel nasanut Nai Yoyakhin Nai Yoyakim anmone, in naiti Nai Zedekia Nai Yosia anmone anfani Kesel Yehuda.

²Mes leka Nai Zedekia ma ale in ana' aplenat sin ma in to sin ka natuin fa han ba'an UISNENO le In anfe nani neu sin nao nok kau.

³Kesel Nai Zedekia in ansonu Nai Yukhal Nai Selemya anmone, ma Ana' Fuat Knino Nai Zefanya Nai Maaseya anmone ma antoti kau he nati' au onen toti neu UISNENO antom pah in alekon.

⁴Anbi tabu nane fe ka natam kau fa neu o'of nanan ma au fe uoinsok nok menuan anbi to sin atnanan.

⁵Solalus Babel fe sin anfun natef nan Yerusalem, mes leka sin nen nak solalus Mesir anfen nem na'ko Mesir hen makenan, sin anhelon anfani.

⁶UISNENO, atoni Israel sin Uisneno, anlelu kau

⁷mu'uab on i neu Kesel Nai Zedekia, ‘Solalus Mesir le anfen nem neu i hen bab ko, of sin nabain'on ma sin anfani.

⁸Oke te atoni Babel of sin anfani nem ma sin nape' kot i, fun sin nis ma anbe'u ma notu nani.

⁹Au, UISNENO Kau, Au umnauba ki, he nati' kais him fuli hi aom meki tenab mak atoni Babel sin anao nalalien ma of sin kan faineman fa. Natuin namneo-namneo sin mes anfani nem.

¹⁰Kalu onle hi mis ma ambe'u solalus Babel ok-oke talan te amaika sin al atoni-atoni le napapa' naek anbi sin ume-ume, mes of sin anfen ma sin notu nani kot i ok-oke.’ ”

¹¹Solalus Babel sin anhelon na'ko Yerusalem natuin solalus Mesir sin nao nem neu kot nane.

¹²Au usaitan Yerusalem ma au nao neu Nai Benyamin in pah he simo pa' bale bela mnasi na'ko nain au nonot sin ini.

¹³Mes leka au aum a te Eno Naek Nai Benyamin, solalus nakaf le anpao anbi nane in nahakeb kau ma in nak, “Ho he maen neu atoni Babel!” (Solalus nakaf nane in kanan Nai Yeria; Nai Selemya anmone ma Nai Hananya in upuf.)

¹⁴Au utae ak, “Ka namneo fa! Au ka utenab fa he aen eu musu.” Mes Nai Yeria kan lomi fa he nen. In anheke kau ma neki kau neu ale ana' aplenat sin.

¹⁵Sin nato'an kau nae le'uf, ma sin anfe plenat he nati' antepo kau ma natam kau neu o'of in nanan ma sin an ek kau anbi Nai Yonatan lultunis pah, in ume. Ume nane sin nabaina ma anfani ume o'of.

¹⁶Natam kau anbi nifu mese anbi bola' nain a'pinan, ma sin anpao kau anbi nane.

¹⁷Nalali te Kesel Nai Zedekia anlelu atoni neki kau nao utef ok in anbi in sonaf. Anbi nane nok lasi tolo' in natan kau nak ai anmu'i han ba'an na'ko UISNENO. Au utae ak, “Anmu'i.” Oke te au ak ateni ak, “Of nana'at ko Usi neu kesel Babel.”

¹⁸Oke onane te au utoti ak, “Au mo'e amle'ut sa' ka neu ko Usi ai neu Usi ho ana' aplenat sin ai neu ho to, talan te ho mutam kau neu o'of in nanan?

¹⁹Ale Usi ho Mafefa knino sin le nane es me ka le naton nak kesel Babel of kan laban Usi ko fa ma ka nape' fa pah i?

²⁰Tabu i Usi apinat, amlomi te amnen fa au han totis i. Kais Usi hom sonu kau anfani neu o'of anbi Nai Yonatan in ume nane, of au mate bi nane.”

²¹Es nane te Kesel Nai Zedekia anfe plenat he nati' natam kau neu o'of anbi po'an kesel sonaf. Au utua bi nane, ma neno-neno anfe neu kau utunu' na'ko bale mepu utunu' talan te loitan balab utunu' anbi kot nane oke anfini ok-oke.