Read Uab Meto YEREMIA 39 Bible Online

YEREMIA 39 - Uab Meto bible

YEREMIA 39

¹Anbi fun bo' ton sio Nai Zedekia Kesel Yehuda nanaoba plenat, Nebukadnezar kesel Babel nok in solalus sin nem ma nape' Yerusalem.

²Antam neno sio fun ha anbi ton bo'es am mese Kesel Nai Zedekia nanaoba plenat, musu nape' kot in baki lape,

³ma musu nasik nan Yerusalem. Ma ale ana' plenat kesel Babel sin nem ma sin nao ma antok anbi Eno Naek Tnana. Anbi sin le nane es Nai Nergal-Sarezer, Nai Samgar Nebo, Nai Sarsekim nakaf ume toko sonaf in nanan, Nai Nergal-Sarezer Rabmag ma solalus nakaf bian anteni.

⁴Leka Kesel Nai Zedekia ma in solalus sin ok-oke sin nit ale lasi nane, sin nahelnon naen nafetin sin aon nao nok Nonof Yordan anbi fai nane amsa. Sin naen nok lanan kesel etu, oke te anpoi nao nok eno naek le anmalutab baki lape nua en anbi bale nane.

⁵Mes solalus Babel anli'u sin ma anheke Nai Zedekia anbi mnela Yerikho. Oke te neki in neu Kesel Nai Nebukadnezar anbi kot Ribla anbi pah Hamat, ma nafek lasi maten neu Nai Zedekia.

⁶Anbi kot nane amsa namate in anah-anah sin anbi in matan, ma ale ana' aplenat Yehuda amsa namate sin.

⁷Oke te sin anlo'i napoitan Nai Zedekia in matan, nalali te anfutu in ma neki in anao neu Babel.

⁸Ma atoni-atoni Babel notu kesel in sonaf ma to sin ume, ma natseleb ale baki lape Yerusalem.

⁹Namuni te to le fe nabalah anbi kot, nok ale atoni-atoni le sin naen nalali neu atoni Babel, Nebukadnezar in solalus nakaf Babel, neki sin nao neu Babel.

¹⁰To bian amamu'it le kan mu'i fa maus, namaika sin anbi Yehuda ma anfe neu sin lene tua min kase ma lene meto.

¹¹Kesel Nai Nebukadnezar anlelu Nai Nebuzaradan, in solalus nakaf, napoitan plenat nak on i,

¹²“Amnao nai mami Nai Yeremia, ma ampanat in lek-leko. Kais anmo'e sa'-sa' neu in; minokab sa' le in antoti.”

¹³Es nane te Nai Nebuzaradan nok in biafen nua solalus nakaf amnanut, Nai Nebusyazban ma Nai Nergal-Sarezer ma ale solalus nakaf Babel bian anteni,

¹⁴sin naiti kau na'ko po'an sonaf nanan. Oke te sin nana'at kau Nai Gedalya Nai Ahikam anmone ma Nai Safan upuf, le mes he nok kau fani nok aomina. Ma au utua ubua ok to anbi sin atnankenu.

¹⁵Leka fe natam kau anbi o'of anbi po'an sonaf nanan, UISNENO anlelu kau

¹⁶he utonan Nai Ebed-Melekh atoni Sudan nane nak UISNENO Akuasat Afinit, Uisneno Israel nak on i, “On afi le Au uton ulali, of Au fe amle'ut nem neu kot i, ma ka lasi alekot fa. Of ho mit lasi nane anbol.

¹⁷Mes Au, UISNENO Kau, of Au uneo ma uhafo ko. Of ka nana'at ko fa neu atoni-atoni le ho mumtausan sin.

¹⁸Of ka namate ko fa, natuin of Au ufetin ko. Ho smanam of napeni aomina natuin hom sonlaitom neu Kau. Au, UISNENO Kau, es ukua ulali Au a'ak.”