Read Uab Meto YEREMIA 4 Bible Online

YEREMIA 4 - Uab Meto bible

YEREMIA 4

¹UISNENO nakua In a'an nak, “To Israel kalu him lomi hem fani aim, amfani aim nai neu Kau. Ahun-hunut ampolin nai ale le'u mahuma-le'u mahuma nane le Au ka lomi fa sin, ma mi'ki nai neu Kau.

²Kalu hi maiti supat natuin Au kanak ma hi moni nok amneot amnonot ma aknino, onane te ale uf of antoti neu Kau he nati' Au fe neu sin tetus, ma sin of anpules ma naliatas Kau.”

³UISNENO nakua In a'an neu Yehuda ma Yerusalem nak, “Mepu nai hi nain le fe ka mepu fa; kais amkaki fini anbi bale le kisan ma kasunat anmoni anbine.

⁴Amna' mihelan hi lasi manta'en mok Kau, hi UISNENO, ma ambeti miteta hi aom al neu Kau, hoi tuafen Yehuda ma Yerusalem. Kalu kahaf, of Au to'as nane natsaku ma notu ki on ai le es kan sifo nabe'i fa. Ale nane ok-oke of anbol nem neu hi aom natuin hi taos hi mo'et amle'ut.”

⁵Amfu to'is nai neu pah ok-oke! Amkoa nai nok han aikan ma matani. Amlelu nai tuafen Yehuda ma Yerusalem he naen nai neu kot-kot mabaki lape.

⁶Miton nai lanan anao neu Sion, tubu UISNENO, mitnani nai nok manoe, kais hi mitensom piut. UISNENO anfe amle'ut nem neu ki ma amle'ut anaek nem na'ko neno aon bian a'li.

⁷On meo asu anpoi na'ko in bale tolo' onane amsa ale'un uf-uf anfen nem nalalien he nale'un Yehuda. Kot-kot Yehuda of anfani fatu tutnaes bale le atoni ka natua fa anbine.

⁸Es nane te, amkoa nai, ma amsakoi nai nok kaet, ampake nai kalo taka' nek susal. Natuin to'as UISNENO le anpin-pin fe ka namsau fa na'ko Yehuda.

⁹UISNENO nakua In a'an nak, “Anbi neno nane ale kesel sin ma ale ana' aplenat of sin nekan an ole; ale Ana' fuat knino nata'i ma ale Mafefa knino sin naskek.”

¹⁰Oke te au ak, “Koi UISNENO Alatan Amnanut, Hom fuli mulali atoni Yehuda ma tuafen Yerusalem! Ho mukua Ho a'am mak of anmu'i halan, mes tabu i ansali hai smanam neki suni.”

¹¹Of antia in tabu atoni Yehuda ma tuafen Yerusalem napeni han tonas nak anin maputu nem na'ko mnela hufui neu sin. Anin nane ka anin le natpeneb ane ut fa,

¹²mes anin matani le nem natuin UISNENO In aplenat neki kasat neu In to.

¹³Amkiso nai, musu nem on nope. Ale sin aklet makenat on anin nautus, sin bikase anmanoe nesi na'ko kolo teme. Koi, hit tamle'u! Hit tamle'u talalien!

¹⁴Yerusalem ampolin amle'ut nai na'ko ho nekam he nati nafetin ko. Of antia leka ka ho mupan ale tenab ne'ob amle'ut nane anbi ho nekam?

¹⁵Na'ko kot Dan, ma na'ko neten Efraim ale haef sin nem neki han tonas lasi le'uf.

¹⁶Sin namnauba uf-uf ma naton neu tuafen Yerusalem nak musu nem na'ko pah a'lob. Sin of ankoa nok han sakanat lasi makenat neu kot-kot Yehuda

¹⁷ma anfun natef nan Yerusalem on atoni apao lene. Ale lasi nane anbol natuin to Yehuda anlaban nalali UISNENO. UISNENO nakua nalali In a'an.

¹⁸Yehuda ho es meknom meki amle'ut nane neu ho aom. Ho monim ma ho taos ho mo'et es neki ale susal nukat nane napau ho nekam.

¹⁹Au nekak nasusbon matani, au ka sutai ube'i fa mafena. Au ka ube'i fa he tainineb au aok au nekak nata'i anbi au nanak, natuin au nen to'is in hanan ma koa mekenat nalu.

²⁰Amle'ut nem piut-piut nale'un naklati pah ok-oke. Nale'un au um-ume nok askeken ale in kloe pilu sin anpisu anbati sin ok-oke.

²¹Of antia leka ka au saksi atoni anmaken nok matani le'uf talan te namsopu? Of antia leka ka au nen to'is in hanan natono au lukek?

²²UISNENO nakua In a'an nak, “Au to nane monon matani, sin ka nahin Kau fa. Sin onle li'ana amonot ka nahin fa sa'-sa' amsa; mahin le'uf anbi lasi amle'ut, ka nahin fa sa'-sa' anbi lasi alekot.”

²³Au matak ankiso neu pah pinan, onle luman ma onle paha snaen, ma au aiti au matak ma baisenu neno tunan, koi, katit fa apinat.

²⁴Au kiso it tubu ma nuaf-nuaf amnanut antainunu nok matani le'uf.

²⁵Au ka it fa atoni pah pinan, kolo amsa naplele ok-oke.

²⁶Pah maafa anfani paha snaen, kot-kot naskuku nale'un sin ma anfani fatu tutnae, natuin UISNENO nato' anae le'uf neu In to. (

²⁷UISNENO nakua In a'an nak pah pinan ok-oke of anfani paha snaen, mes of In ka nale'un nani fa ok-oke.)

²⁸Pah pinan of ankulu ma ankae, neno tunan mesokan maten. UISNENO nakua nalali In a'an ma of ka natnanib fa In lasi fekat. In nafek nalalien ma of kan fani koti fa he laktes amsa.

²⁹Slutuf na'ko solalus asae bikase ma ana' aklaot, anmoe ale atoni sin naen nok nasnas ket-ketu. Sin antam neu ale nasi nanan; sin ansae neu neten ma fatu. Ale kot anfani namne, kan mu'i fa alomit he natua anteni anbi nane.

³⁰Hoi Yerusalem, nasaitan nalali ko ma ho kam tao ma moe fa sa'-sa'! Maota sa' hom pake sobalu me' ma ampake noas ho aom, meki noni mnatu ma noni muti, ma amnose ho matam meki aklimat? Ka maota fa ho munoas ho aom, natuin ho bia leko sin kan lomi ko fa anteni, nesi na'ko nane sin ansali he namate ko.

³¹Au nen han nanoit onle bife le he nahoni; onle bife munif le he nahonis in anah ale'u ta'uf, onane han kaet Yerusalem le sin snasan ansek. In nanona in niman ma ansakoi, “Amle'ut neu kau — musu sin he namate kau!”