Read Uab Meto YEREMIA 40 Bible Online

YEREMIA 40 - Uab Meto bible

YEREMIA 40

¹UISNENO nakua In a'an neu kau leka Nai Nebuzaradan, solalus nakaf nane, nafetin kau anbi Rama. Neki kau neu bale nane anbi kolen besi nok ale atoni bian na'ko Yerusalem ma Yehuda le fe naiti neki sin neu Babel on atoni le anheke nan sin anbi makenat nanan.

²Solalus nakaf nane no'en kau au mese ma nak, “UISNENO ho Uisneno, ansali nalali pah i he naskuku nale'un nani.

³Tabu i lasi nane In nanaoba nalali, natuin ho nonot sin nasanab nalali ma ka na'ki fa neu In.

⁴Tabu i au ufetin kolen besi i na'ko ho nimam ma au ufetin ko. Kalu hom lomi nabe'i ho mok on Babel, ma of au panat ko. Mes kalu ho kam lomi fa, ka sa'-sa' fa. Anbi pah i nabe'i hom nao neu bale me le hom lomi.”

⁵Fe au ka nao fa, Nai Nebuzaradan nak, “Kalu hom lomi, lekot hom fani neu Nai Gedalya Nai Ahikam anmone Nai Safan upuf, le kesel Babel naiti nalali in anfani kumlol neu kot-kot Yehuda. Leko ho mutua mok in anbi to sin atnanan, ai hom nao neu bale me al natuin ho lomim kun.” Oke te in anfe kau mnahat ma anfe kau sa'-sa' bian anteni, ma nafetin kau au nao.

⁶Au nao neu Nai Gedalya anbi Mizpa, ma au utua ok in anbi to sin atnanken anbi pah Yehuda.

⁷Kesel Babel naiti nalali Nai Gedalya anfani kumlol anbi Yehuda he naplenat ale atoni le fe namaika anbi Yehuda, esle' ale atoni-atoni amamu'it abainesit sin. Bian na'ko solalus nakaf ma solalus Yehuda le ka nana'atok fa neu Babel, sin nen neu naiti nalali Nai Gedalya nane.

⁸Nai Ismael Nai Netanya anmone, Nai Yohanan Nai Kareah anmone, Nai Seraya Nai Tanhumet anmone, ma anah-anah Nai Efai na'ko Netofa, ma Nai Yezanya na'ko Maakha sin anao nok sin atoni-atoni sin neu Nai Gedalya anbi Mizpa.

⁹Nai Gedalya nak neu sin nak, “Ka nabe'i fa hi mimtau he mina'tom neu atoni Babel. Mitua mibalah anbi hit pah i, ma amfani ate nai neu kesel Babel. Au uhin of hi mipeni aomina.

¹⁰Mitua nai anbi kot-kot le him lomi, ma hi mibuab ma mipan tua mina mtasa, ale hau fuan ma mina bub fua mina. Of au utua bi Mizpa ma au fani fefa hanaf na'ko to leka atoni-atoni Babel sin nem neu bale i.”

¹¹Anbi tabu nane amsa ale atoni Israel le anbi pah Moab, Amon, Edom, ma pah-pah bian sin nen nalali nak kesel Babel nafetin nalali atoni Israel bian natua anbi Yehuda, ma nak in naiti nalali Nai Gedalya anfani Kumlol.

¹²Es nane te sin nasaitan bale-bale le nasitib ma nasana sin, oke te sin anfani neu Yehuda. Sin nem neu Nai Gedalya anbi Mizpa, ma sin nabuab tua mina mtasa amfau le'uf ma ale hau fua bian anteni.

¹³Namuni te, Nai Yohanan ma ale solalus nakaf sin le ka nana'tok fa neu musu, sin nem neu Nai Gedalya anbi Mizpa

¹⁴ma sin nak, “Ho muhin ai kahaf neu Nai Baalis kesel Amon anlelu nalali Nai Ismael he namate ko?” Mes Nai Gedalya in ka nateb fa neu sin uab nane.

¹⁵Oke te nok a ten-tena Nai Yohanan nak neu Nai Gedalya nak, “Leko te au nao he umate Nai Ismael; of es ka nahin fa neu sekau ka es namate in. Nansa' mes he nafetin in he namate ko? Nane of antao ma anmo'e atoni Yehuda ok-oke le sin natua nabua nalali nok ko anbi i, of sin nasitbon ma nasan'on anteni, ma lasi nane of naskuku nale'un to ok-oke le fe nabalah anbi Yehuda.”

¹⁶Mes Nai Gedalya natae nak, “Kaisa! Le ho mu'uab antom Nai Ismael nane ka namneo fa!”