Read Uab Meto YEREMIA 41 Bible Online

YEREMIA 41 - Uab Meto bible

YEREMIA 41

¹Anbi fun hitu ton nane Nai Ismael Nai Netanya anmone ma Nai Elisama upuf in nok atoni bo'mese sin anao neu Mizpa he natef nok Nai Gedalya. (Nai Ismael in sanut mofut na'ko kesel, in solalus nakaf amnanut mese anbi pah nanan.) Leka sin fe anbukae bua'-bua',

²Nai Ismael ma atoni bo'mese nane sin anfaki sin suni ma namate Nai Gedalya, kumlol le atoni Babel naiti nane.

³Nai Ismael amsa namate ale atoni Yehuda le sin nok Nai Gedalya anbi Mizpa, ma ale solalus Babel le anbi nane.

⁴Namuni na'ko nane, fe atoni ka nahin fa neu namate Nai Gedalya,

⁵atoni bo'fanu sin nem na'ko Sikhem, Silo, ma Samaria. Sin an eu nalali sin konon, anpisu sin bale pake, ma anheli sin aoken. Sin neki ane kase ma min fomeni he natulu anbi Ume UISNENO.

⁶Nai Ismael anpoi na'ko Mizpa in anao ma ansenu sin. Fun in ankae, ma in nak, “Aim hem nao hem kiso mit Nai Gedalya.”

⁷Leka sin antia kot antanan, Nai Ismael nok in amnokten sin namate atoni-atoni nane. Mes atoni bo'mese na'ko sin nak neu Nai Ismael nak, “Kais mumate kai! Hai fe amu'i ane kase huma nua ma mina bub fua mina ma oni hau. Hai mitolo' sin ok-oke anbi kot kotin.” Es nane te Nai Ismael ka namate fa sin, mes bian in namate sin ma sin aon nitu in anpolin natam sin neu oe hani in nanan.

⁹Oe hani nane oe hani naek le Kesel Nai Asa anhani anbi tabu Nai Baesa Kesel Israel anmaken nok in.

¹⁰Oke te Nai Ismael in anheke kesel in anfetnai sin ma ale atoni le fe anbi Mizpa le Nai Nebuzaradan nana'at nalali sin neu Nai Gedalya hen panat sin. Nai Ismael anheke sin ma in nao nok sin neu pah Amon.

¹¹Nai Yohanan Nai Kareah anmone ma ale solalus nakaf le nok in sin nen neu Nai Ismael in taos mo'et amle'ut nane.

¹²Sin nok sin solalus sin anao ma anli'u in, ma napeni in anbi nifu naek Gibeon.

¹³Leka sin nit Nai Yohanan nok in solalus nakaf nane sin nem, sin al sin le anheke sin anmalin anaek,

¹⁴oke te sin nabain'ok ma naen anapson nok Nai Yohanan in solalus sin.

¹⁵Mes Nai Ismael nok in solalus sin fanu, sin naen nafetnok neu pah Amon.

¹⁶Oke te Nai Yohanan nok in solalus nakaf sin nibun nabuab ale solalus, bife, li'ana, ma ale ameput anbi sonaf le Nai Ismael anheke sin leka in namate Nai Gedalya.

¹⁷Sin al-al sin namtausan atoni Babel, natuin Nai Ismael namate Nai Gedalya le kesel Babel naiti in anfani kumlol anbi pah nane. Es nane te, sin naen neu Mesir. Anbi lanan atnanan, sin nasnas anbi Kimham anhaumak Betlehem.