Read Uab Meto YEREMIA 42 Bible Online

YEREMIA 42 - Uab Meto bible

YEREMIA 42

¹Oke te atoni ok-oke, anaet abaut, nok ale solalus nakaf, fun Nai Yohanan Nai Kareah anmone Nai Azarya Nai Hosya anmone

²sin nem neu kau ma sin nak, “Ama, onle Ama ho mit mulali, hai le i afi ahunut hai mimfau mes muni i al hai fua faukah. Hai amtoti Ama amlomi te hom onen toti mumnau kai neu UISNENO le Ama ho mululi ma mubes neu In. Amonen toti mumnau kai neu hai fua fauk le fe mibalah le i,

³he nati' UISNENO naton neu kai hai mes hem nao neu me ma sa' esle' mes hai he mo'e.”

⁴Au utae ak, “Leko kalu onane. Au simo hi totis nane. Of au onen toti neu hit UISNENO, ma sa' am sa' le In natae, of Au uton ani ok-oke neu ki.”

⁵Sin nak neu kau nak, “Haim toti Ama amonen toti neu hit UISNENO, natuin haim lomi he mituin In, he nati' monim naleko. Es nane te, leko ai ka leko han ba'an UISNENO nane of hai mituin mani. Maut he UISNENO anfani saksi nek muti ma aki'at neu kai, kalu hai ka mituin fa ale plenat le UISNENO anfe neu kai naneto ko Ama.”

⁷Neno bo'mese namuni na'ko nane UISNENO nakua In a'an neu kau.

⁸Fun au boin Nai Yohanan ma ale in solalus nakaf sin ma ale atoni bian le nem nok in.

⁹Au ak sin ak, “Him lelu kau he au utiaba han totis neu UISNENO, atoni Israel sin Uisneno. Fun UISNENO nakua In a'an nak,

¹⁰‘Kalu him lomi he mitua mibalah anbi pah le i, of Au fiti ki, ma ka ubelat ki fa; of Au uhakeb ki, ma ka utseleb ki fa. Au nekak nasusbon anae le'uf natuin Au fe ulali lasi amle'ut neu ki.

¹¹Kais hi mimtau amteni neu kesel Babel nane. Au bi hi sonam hi atnanam he bab ki ma ufetin ki na'ko in kuasat.

¹²Natuin Au nek umnau ki of Au mo'e kesel Babel in nek namnau ki ma nafetin ki he hi amfani. Au, UISNENO Kau, ukua ulalai Au a'ak.’ ”

¹³Mes hi le fe mitua ambi Yehuda kais hi minakfatu neu hi UISNENO ma kais hi mak, “Hai kam lomi fa he mitua anbi pah le i. Haim lomi hem nao neu Mesir ma mitua anbi pah nane. Anbi nane hai ka mitef mok fa makenat anteni, hai kam nen amteni fa to'is in hanan he no'en kai neu makenat, ma hai kam naben fa amnahas amsa.” Ma kalu hi nekam nane nahel piut neu hem nao neu Mesir ma mitua ambi nane, i han ba'an UISNENO Akuasat Afinit, Uisneno Israel, neu ki nak,

¹⁶“Makenat ma amnahas le hi mimtausan nane of anli'u ki talan te Mesir, ma of hi mate ambi pah nane.

¹⁷Ale atoni le nahel piut neu he nao neu Mesir ma natua anbi nane of sin anmate anbi makenat in nanan, ai anmate natuin amnahas ai menas anaek. Katit fa es amsa he nafetnon na'ko lasi amle'ut le of Au fe nem neu sin; of sin anmate ok-oke.

¹⁸Onle Au, UISNENO Israel Au uopan Au to'as ma to'as maputu nae le'uf neu tuafen Yerusalem, onane amsa of Au uopan Au to'as maputu nae le'uf neu ki le hi maen neu Mesir. Of sin namtau leka sin ankiso ki; of sin nasi'ut ki, ma hi kanam of anpake anfani sukat. Of hi ka mit amteni fa hi pah ma hi nifu anteni.”

¹⁹Oke te au ak ateni, “UISNENO anfe nalali plenat he nati' hi fauk le fe mibalah ambi Yehuda kam nao fa neu Mesir. Es nane te au umnauba ki anbi tabu le i

²⁰nak hi mo'e milali tanhais anaek mese. Him toti he nati' au onen toti neu hit UISNENO neu ki, ma hi manta'en he minaoba ale lasi ok-oke le UISNENO naton neu ki.

²¹Tabu i au utiaba ulali han ba'an na'ko hit UISNENO neu ki, mes hi kam lomi fa he mituin han ba'an nane.

²²Es nane te, mimnau nai: pah le him sinmak hem nao meune he mitua mibalah ambi nane, of hi mate ambi makenat in nanan, ai natuin amnahas ai natuin menas anaek.”