Read Uab Meto YEREMIA 43 Bible Online

YEREMIA 43 - Uab Meto bible

YEREMIA 43

¹Han ba'an UISNENO, atoni Israel sin Uisneno, le mes au he utiaba neu to au utiaba ulali ok-oke.

²Oke te Nai Azarya Nai Hosaya anmone ma Nai Yohanan Nai Kareah anmone ma ale atoni bian anteni a'moko nane sin nak neu kau nak, “Ho mumoe, hai UISNENO kan lelu ko fa he mukain kai he kais hai amnao ma mitua anbi Mesir.

³Nai Barukh Nai Neria anmone es na'henu ko hem laban kai, he nati' atoni Babel naplenat kai ai namate kai ai naiti neki kai neu Babel.”

⁴Leko Nai Yohanan ai solalus nakaf ma to kan lomi fa he natuin plenat UISNENO he natua anbi Yehuda.

⁵Nai Yohanan ma ale solalus nakaf nane sin neki ale atoni le fe natua anbi Yehuda anao neu Mesir, onane amsa ale atoni le anfani neman na'ko bale bian le sin nasitbon ma nasan'on.

⁶Atoni, bife, li'ana, ale anfetnai na'ko kesel le Nai Nebuzaradan nana'at sin neu Nai Gedalya hen panat sin, fun au amsa ma Nai Barukh, neki kai oke neu Mesir.

⁷Sin anlaban plenat UISNENO, ma sin anao neu Mesir sin anao antia kot Tahpanhes.

⁸Anbi nane UISNENO nakua In a'an neu kau nak,

⁹“Maiti nai fatu-fatu naek, ma amsenan sin anbi nain anbi eno matan tam neu ume ana' aplenat kot nane. Ampanat he nati' atoni-atoni Yehuda sin nit ko neu ho moe lasi nane.

¹⁰Oke te muton neu sin mak Au, UISNENO Akuasat Afinit, Uisneno Israel, of Au fe nem neu ki Au ate Nebukadnezar kesel Babel, neu bale nane. Ma anbi fatu-fatu le hom senan sin anbi nain nane in fafon, of in nahakeb in a toko' ma na'ben in um-ume plenat.

¹¹Nebukadnezar of in nem ma anbe'u Mesir. Ma atoni-atoni le anlek sin hen mate anbi makenat nanan of sin mate anbi makenat in nanan. Sin le anlek sin he neki sin on ma nake, of neki sin on manake, ma le anlek sin hen mate anbi makenat of anmate anbi makenat.

¹²Of Au upina ai anbi ume-ume uisneno teta Mesir, ma kesel Babel of notu nani ale le'u mahuma anbi ume-ume nane ai naiti neki sin neu in pah. On atukus naknino in bale pake na'ko tume ma hutu, onane amsa kesel Babel of in pik ma nako naknino Mesir ma in anfen ma nao anteni fun katit fa es hen laban in.

¹³Ale ni fatu naek le'u mahuma anbi Heliopolis anbi Mesir, of naskuku nani ma ale ume-ume uisneno teta Mesir of notu nani sin ok-oke.”