Read Uab Meto YEREMIA 44 Bible Online

YEREMIA 44 - Uab Meto bible

YEREMIA 44

¹UISNENO nakua In a'an neu kau antom atoni Israel le sin natua anbi Mesir, anbi kot Migdol, Tahpanhes, Memfis, ma anbi pah aon bian a'ne'u.

²UISNENO Akuasat Afinit, Uisneno Israel, In han ba'an neu sin esle' i, “Hi meknom amsaksi milali lasi amle'ut le Au usanut neu Yerusalem ma ale kot bian anbi Yehuda. Talan te neno i amsa kot-kot nane fe naskuku'on piut ma kan mu'i fa atuas anbi nane.

³Lasi nane anbol natuin tuafen nasanab, anmo'e Kau talan te Au uto'. Sin natulu fua tulu ma nausi neu ale uisneno teta le sin fe ka naluli ma nabes nit fa neune, ai he hi ai hi amfenu.

⁴Au sonu neu ki piut-piut Au ate-ate sin Mafefa knino, le nakain sin kais anmo'e amle'ut le Au ka lomi ani fa nane.

⁵Mes hi kam lomi fa hem nen ma kam lomi fa he mituin. Hi kam lomi fa he misnas mi'ko mo'et amle'ut, esle' hi mitulu fua tulu neu uisneno teta sin.

⁶Es nane te Au opan Au to'as ma Au sesu kot-kot Yehuda ma lanan-lanan anbi Yerusalem. Au otu ani sin ok-oke talan te anfani fatu tutnae ma hufui onle hi mit anbi tabu le i.

⁷Ma tabu le i Au, UISNENO Akuasat Afinit, Uisneno Israel, Au toti ki nansa' hi mo'e lasi le neki nem neu ki lasi amle'ut anae le'uf nane neu hi aom. Ai him lomi he mile'un atoni ok-oke — naimone, fenai, li'ana, ma li'ana me' — talan te kan mu'i fa es amsa na'ko hi nonot le he nabalah?

⁸Nansa' hi mo'e lasi-lasi le anmo'e Kau Au uto'? Hi aim ma hi mitua anbi Mesir, pah le hi ka mihin mani fa nane, oke te hi miluli ma mibes neu le'u mahuma ma mitulu fua tulu neu ale uisneno teta pah nane! Ai him lomi he miskuku mile'un hi aom he nati' ale uf anbi pah pinan i nasi'ut ki ma anpake hi kanam anfani on sukat?

⁹Him nikan milali ka ale lasi amle'ut le hi nai un-unu sin ma Kesel Yehuda sin ma ale sin fenai sin, ma hi ma ale hi fenai sin le anmo'e nalali anbi pah Yehuda ma anbi lanan-lanan kot Yerusalem?

¹⁰Mes talan te neno i hi ka mibaun fa hi aom. Hi kam tola Kau fa ma hi ka moni fa mituin plenat le Au fe neu ki ma neu hi amaf sin.

¹¹Es nane te, Au, UISNENO Akuasat Afinit, Uisneno Israel, of Au laban ki ma uskuku ule'un Yehuda ok-oke.

¹²Ma kalu na'ko atoni Yehuda le fauk nabalah le ansinmak piut he nao neu Mesir he natua anbi nane, sin of namle'u oke. Sin ok-oke, anaet abaut, of sin anmate anbi Mesir anbi makenat ai natuin amnahas. Atoni of sin naben amtaus leka ankiso sin ma of nasi'ut sin. Of anpake sin kanan on sukat.

¹³Onle Au kas Yerusalem, onane amsa of Au kas sin le natua anbi Mesir. Of sin anmate anbi makenat, natuin amnahas ai menas anaek.

¹⁴Na'ko atoni Yehuda le fe sin nabalah, le sin anao nalali neu Mesir he natua anbi nane, es amsa of ka nafetnon fa ai hen moni. Es na'ko sin amsa of kan fani nem fa anbi Yehuda, maski lasi nane sin ansinmak anae le'uf. Namneo, katit fa esle' of anfani nem so al fauk-fauk le natnanib sin.”

¹⁵Oke te atoni amfau le'uf sin nem neu kau, fun ale atoni le sin nahin neu sin fe natulu fua tulu neu uisneno teta, ma ale bife le sin anhake anbi nane, fun atoni Israel le sin natua anbi Patros, antom aon bian a'ne'u anbi Mesir. Sin nak neu kau nak,

¹⁶“Hai kam lomi fa hem nen sa' le ho muton neu kai anbi UISNENO In kanan.

¹⁷Ale sa' le hai manta'en milali, of hai mo'e mani amsa. Of hai mitulu fua tulu piut neu Usi Fenai Neno tunan, ma amtesi tua mina mtasa on fua tulu neu in onle hai mo'e mani anbi kot-kot Yehuda ma anbi lanan-lanan anbi Yerusalem natuin hai amaf sin, natuin hai kesel sin, ma ale hai ana' aplenat sin, ma hai kun amsa. Anbi tabu nane hai mu'i mnahat nanokbon, hai moni nok alekot, ma hai ka minuka fa sa'-sa'.

¹⁸Mes leka hai misnas mi'ko mitulu fua tulu neu Usi Fenai Neno tunan ma kam tesi amteni fa tua mina mtasa on fua tulu neu in, hai minuka ale sa'-sa' ok-oke; hai atoni sin anmate anbi makenat nanan ai anmate natuin amnahas.”

¹⁹Oke te ale bife nane sin nak, “Hai mone sin anlomi he hai mo'e utunu' namas on Usi Fenai Neno tunan ma motu fua tulu ma mitulu tua mina mtasa neu hai uisneno teta nane.”

²⁰Neu ale atoni ma bife le sin natae onane, au ak,

²¹“Ai hi mitenab mak UISNENO ka nahin fa ai In nikan nalali ale fua tulu le natulu sin anbi kot-kot Yehuda ma anbi lanan-lanan anbi Yerusalem natuin hi amaf sin, natuin hi kesel sin ma ale hi ana' aplenat sin, ma to pah i ma natuin hi kun amsa?

²²UISNENO ka nabe'i anteni fa ankiso ki hi mitulu fua tulu neu ale uisneno teta bian. Hi mo'et nane amle'ut ma si'ut. Hi misanab milali neu UISNENO, ma ka mituin fa In plenat-plenat sin. Es nane te anbi tabu i amsa hi pah naskuku nalalien talan te ka nabe'i fa mitua amteni, ma ampake in kanan on sukat. Atoni le ankiso in naben lasi amtaus.”

²⁴Oke te au uton ani neu ale atoni nane ok-oke, nes-nesi neu ale sin fenai sin, nak UISNENO Akuasat Afinit nakua In a'an on i neu atoni-atoni Yehuda le sin natua anbi Mesir, “Hi ma ale hi fenai sin him sup milali neu Usi Fenai Neno tunan nak of hi motu fua tulu ma mitulu tua mina mtasa neu in. Hi minokab milali hi han manta'en nane. Es nane te, leko! Anmo'e nai sa' le hi manta'en milali nane!

²⁶Mes tabu i amnen nai sa' le au uton neu ki, hoi atoni Israel abit Mesir: Au, UISNENO Kau, Au sup natuin Au kanak apinat nak Au ka ufetin ki fa hem pake Au kanak he mo'e lasi manta'en sa' es amsa. Hi ka nabe'i fa miuab mak, ‘Au sup natuin Uisneno amonit!’

²⁷Of Au mo'e ki he nati' hi mimle'u ma ka moni fa ambi alekot, talan te hi mate oke, leko anbi makenat ai natuin menas anaek.

²⁸Al atoni faukah es of napeni aomina ma sin anfani neu Yehuda na'ko Mesir. Ale atoni Yehuda ok-oke le anbi Mesir of sin nit nak ai sin uab ai Au a'ak es of anbol.

²⁹Of Au fe nem neu ki lasi amle'ut anbi bale i he uton neu ki nak kasat le Au ubalab ulali neu ki, namneo-namneo of anbol.

³⁰Nai Hofra Kesel Mesir of Au una'at in neu musu-musu sin le anlomi he namate in, onle Au una'at Nai Zedekia Kesel Yehuda neu Nebukadnezar kesel Babel, in musu nane le anlomi he namate in.”