Read Uab Meto YEREMIA 46 Bible Online

YEREMIA 46 - Uab Meto bible

YEREMIA 46

¹UISNENO nakua In a'an neu kau antom ale uf,

²anfatan na'ko Mesir. In naton neu kau antom solalus Nai Nekho Kesel Mesir, le nis ma anbe'u in anbi Karkemis anhaumak Noe Efrat natuin Nebukadnezar kesel Babel anbi ton ha leka Nai Yoyakim, Kesel Yehuda nanaoba plenat. I lasi le UISNENO naton nani antom lasi nane nak,

³“Ale solalus nakaf Mesir ankoa han loitan neu sin solalus sin nak, ‘Miaikab hi suni sin nai! Ampake nai sobalu besi matani! Miloitan nai ben besi tika ma amtam nai anbi lanan! Hi, solalus asae bikase, amtao peni nai neu sin! Amsae nai meu hi bikase sin, amnao mat nai he maken!’

⁵Mes Au, UISNENO Kau, Au it sin antekkotiok nok amtaus. Ale sin solalus sin nis ma anbe'u sin, ma sin naen nok amtaus ka nikfa neu sin kotin.

⁶Le amanoet ka naen nabe'i fa he nafetin sin aon, ma ale abe'it sin ka nabe'i fa he nafetnon na'ko musu. Sin anpastun ma anbel anbi aon bian a'li, anbi Noe Efrat in ninen nane.

⁷Sekau ka in le ansae onle oe Noe Nil, onle noe le ansako ante in ninen sin? In le nane pah Mesir. In nak, ‘Of au fen ma uplenat pah pina. Of au ule'un kot-kot ma in tuafen.

⁹Amfotin nai, hoi bikase! Mibloli nai, hoi aklet! Amnao mat nai, hoi meo pa'e amneki ben besi tika na'ko Sudan ma Lidia.’ ”

¹⁰Mes au, Nai Yeremia au ak i neno UISNENO Amnanut Akuasat Afinit; anbi neno nane In antao ma anmo'e lasi seunbanit neu ale In musu-musu sin. In suni of nah sin talan te namsen, ma ninu sin na' talan te namlil. Neno i UISNENO Akuasat Afin-finit, anlolo ale In fua tulu sin anbi aon bian a'li, anbi Noel Efrat in ninen nane.

¹¹Hoi tuafen Mesir, him nao nai neu Gilead he mami le'u ma malo! Mes, maski onane katit fa le'u ma malo le nabe'i he naleko ki.

¹²Hi monim le neki lasi mae ale uf-uf sin nahin nalalien. Hi han koa nane sin nen nalali anbi pah pinan ok-oke. Solalus sin es anpastun neu es; sin al-al sin anbel anbetnon neu nain.

¹³Leka Nebukadnezar kesel Babel in nem nape' Mesir, UISNENO nakua In a'an neu kau nak,

¹⁴“Yeremia, ho muton nai beno i anbi kot-kot Mesir, anbi Memfis, Migdol ma Tahpanhes mak, ‘Miloitan nai neu hem panat hi aom natuin ale sa' le hi mu'i of nale'un nani sin anbi makenat!

¹⁵Nansa' Apis, hi uisneno teta abe'it nane in naen nalali he nafetin in aon? Natuin Uisneno nis ma anbe'u nalali in!’

¹⁶Hi solalus namfau le anpastun ma anbel. Sin na'uab es neu es nak, ‘Aim he hit atfani neu hit nonot he nati' hit tafetnok na'ko lasi maten musu sin suni.’

¹⁷Amfe kanaf fe'u nai neu Kesel Mesir mak, ‘Nai aslutuf le nafini sona.’

¹⁸Au Uisneno amonit, Au kesel Kau, UISNENO Akuasat Afinit. Onle Tubu Tabor namnanu nesin tubu-tubu bian, ma Tubu Karmel namnanu nesin tasi ninen, onane in le nem ma anlaban ko in le nane abe'it kun.

¹⁹Miloitan nai, tuafen Mesir, neu hen heke ki ma neki ki hem nao! Mefis of anfani fatu tunae — bale tena maten natuin ka natua nani fa.

²⁰Mesir onle bijae ana' apokat, mes kabenu naek na'ko aon bian a'li nem ma naunu in piut.

²¹Fun ale solalus le in seb sin kan mo'e fa sa'-sa' natuin sin onle bijae ana' le anpok anae le'uf. Sin kan laban nabe'i fa. Sin al a'nik koti ma sin naen he napeni aomina. Neno kasat neu sin nem antia nalalien; in tabu antia neu sin he sin napeni lasi amle'ut.

²²Mesir in naen nafetnon ma na'siso onle kaun koko fun natuin solalus musu anhaumak sin piut. Sin nape' in neki fani onle atoni nafae hau

²³ma ankanu nasi naek le ka nabe'i fa he nao nokan. Solalus musu kat so'i tabe'i fa, sin namfau nesi na'ko fokat. Au, UISNENO Kau, ukua Au a'ak.

²⁴Of namaeba tuafen Mesir, natuin uf na'ko aon bian a'li nis ma anbe'u sin. Au, UISNENO Kau, ukua ulali Au a'ak.”

²⁵UISNENO Akuasat Afinit, Israel sin Uisneno, nakua In a'an nak, “Of Au kas Amon, uisneno teta na'ko Tebe, nok Mesir ok-oke ma ale uisneno teta ma kesel sin. Kesel Mesir ma ale atoni le sin sonlaiton neu in,

²⁶of Au una'at sin neu Nebukadnezar kesel Babel nok in solalus le he namate sin. Mes namuni te, of natua nafani Mesir on afi ahun-hunut. Au, UISNENO Kau, ukua ulali Au a'ak.”

²⁷“Au nonot, Israel, kais mimtau! Au ate Nai Yakub, kais amlilitai! Hi ma hi sufam sin of Au ufetin ki na'ko pah a'lo, anbi bale le musu natua anbine. Of him fani ma mitua ambi hi pah nok tainine. Of hi moni nok alekot; katit fa sa' le hi he mimtausan.

²⁸Es nane te kais mimtau, hoi Au to, of Au aum he ufetin ki. Uf-uf, bale le Au usitib ma usana ki, of Au ule'un ani sin ok-oke, mes hi Au ka mo'e ki fa onle nane. Namneo of hi ka mifetnom fa na'ko kasat mes Au kasat neu ki nane namneo anmatom nok Au plenat. Au, UISNENO Kau, ukua ulali Au a'ak.”