Read Uab Meto YEREMIA 48 Bible Online

YEREMIA 48 - Uab Meto bible

YEREMIA 48

¹Le i han ba'an UISNENO, Israel sin Uisneno, In naton nani antom Moab nak, “Amle'ut neu tuafen Nebo, sin kot natsel nalalien! Nasik nan Kiryataim, ma in baki lape le matani naskuku nani, talan te sin tuafen sin anmae;

²Moab in lasi amlilat namneku. Musu nasik nalali Hesybon ma anbi nane sin ansali he naneku nani uf Moab ok-oke. Hanaf-hanaf anbi kot Madmen of nasnasab nani, natuin musu of nape' nani kot nane.

³Amnen nai! Tuafen Horonaim sin anhunun nak, ‘Lasi amle'ut! Lasi maten!’

⁴Moab namle'u nalalien! Han anbait na'ko sin li'ana abaut sin manena antia Zoar.

⁵Amnen nai han kaet anbi lanan sae neu Luhit, ma kulut kaet anbi lanan sanu neu Horonaim.

⁶Sin nak, ‘Manap nai! Mifetin hi smanam! Maen nai on bikase luke mnanu afuit anbi mnela hufui.’

⁷Moab! Hom sonlaitom meu ho manoem ma ho mu'im. Mes tabu i of sin anbe'u ko. Kamos, ho uisneno teta, nok ale ana' fuat ma ale ana' aplenat sin of naiti neki sin neu bale polin.

⁸UISNENO of naskuku nani sin es amsa of ka nafetnon fa. Nonof ma mnela ok-oke of namle'u. Au, UISNENO Kau, ukua ulali Au a'ak.

⁹Mihakeb nai fatu naukel neu Moab, natuin ka lo fa anteni pah nane of nale'un nani ok-oke. In kot-kot sin of natsel ma es amsa ka natua fa anbi nane.”

¹⁰Kasat neu atoni le ka nanaoba fa plenat na'ko UISNENO, nok namneo-namneo. Kasat neu in le kan faki fa in suni ma ka namate fa.

¹¹UISNENO nakua In a'an nak, “Na'ko ahun-hunut Moab anmoni anbi tainine. Fe ka naiti neki nit fa in neu bale polin. In onle tua mina mtasa le nafetin ma anten kun ma kan tesi natnanib fa neu bale tua mina mtasa bian. In tua mina mtasa fe fomeni ma mina.

¹²Mes, of ante in tabu Au lelu he nati antesi Moab onle tua mina mtasa, ma nalumab in bale-bale sin ma nape' nani sin.

¹³Moab of in nekan namle'u neu Kamos, sin uisneno teta, fun onle atoni Israel nekan namle'u neu Betel le sin sonlaiton neune.

¹⁴Onme ka talan te atoni-atoni Moab sin nabe'i na'uab nak, ‘Hai meo pa'e kai, solalus abe'it ma matani le ansu' nalali kai anbi makenat?’

¹⁵Moab ma in kot-kot sin naskuku nalali sin, ma in atoni munif alekot namate nalali sin. Au ukua ulali Au a'ak. Au kesel Kau, UISNENO Akuasat Afinit.

¹⁶Lasi amle'ut neu Moab anhaumaken anbi eno matan, ka lo fa anteni of in naskuku.

¹⁷Hoi hi pah-pah le amhaumak Moab le hi mihin neu antek in kanan anbi me-me, amkae ma amkulu nai neu in mak, ‘Moab kan mu'i fa kuasat anteni, in alekon ma in matanin namneku nalali!’

¹⁸Hoi tuafen Dibon, amsanu nai mi'ko hi bale apinat; amtoko nai anbi nain ma anbi afu. Natuin le he nale'un Moab hi pah nane in nem antia nalalien, ma of naskuku nale'un nani hi baki lape sin ok-oke.

¹⁹Hi le mitua anbi Aroer, amhake nai ambi lanan ma amkiso nai! Mitoti sin le sin naen, ma nafetin sin aon mak, ‘Sa' es anbol nalali ka?’

²⁰Sin of natae nak, ‘Moab anbel nalali ma anfani si'ut, es nane te amkae nai neu in. Miton nai anbi Noe Arnon ok-oke mak naskuku nale'un nalali Moab.’ ”

²¹“Lasi kasat nasanut nalali neu kot-kot anbi bale neten amnanut: neu Holon, Yahas, Mefaat,

²²Dibon, Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot, ma Bozra. Kot Moab ok-oke, a'lot ma ahaumakat ankas nalali sin.

²⁵Na'ipu nalali Moab in be'in in matanin, ma in kuasat naskuku nani. Au, UISNENO Kau, ukua ulali Au a'ak.”

²⁶UISNENO nakua In a'an nak, “Amoe Moab nai hen mafu, natuin in namoko in aon neu Kau. In of an tuil anbi in lo'at nanan, ma atoni anmanis in.

²⁷Ait afi ahun-hunut Moab kan manis fa atoni Israel ma nasi'u ma naakan sin onle anheke nan sin bua nok ale abakat?

²⁸Hi tuafen Moab misaitan nai hi kot-kot sin ma mitua nai anbi tubu fatu on kol ot kase anmo'e in kuna anbi kefan amnanut.

²⁹Hi minaebom anae le'uf! Au nen ulali neu hi mimoko'om, neka naebom, miliabom!

³⁰Au, UISNENO Kau, Au uhin neu hi minaebom, hi uab luman kun, ma hi mo'et ka maota fa.

³¹Es nane te of Au kae uhel-helnok neu ki ok-oke ma neu atoni-atoni abit Kit-Heres, hi kot ainaf.

³²Of Au kae nesi anteni neu tuafen Sibma na'ko tuafen Yaezer. Kot Sibma onle tua min kase le in atlaen anlaba antia Tasi Maten aonbian Yaezer. Mes tabu i in fuan fauknais ma in fuan tua min kase nale'un nani sin.

³³Han a baf amlilat namneku nalali na'ko pah Moab le maafa. Au moe tua mina mtasa in kan saifa na'ko bale tua mina mtasa; kan mu'i fa atoni anteni hen moe tua mina mtasa ma anhunun nok amlilat.

³⁴Atoni abit Hesybon ma Eleale sin ankae ma sin han kaet nem ante Yahas, ma atoni-atoni na'ko Zoar talan te Horonaim ma Eglat-Selisia sin amsa sin nen. Sin ankae natuin oe anbi ana' Noe Nimrim anmeti anmate amsa.

³⁵Of Au moe atoni Moab sin nasnas na'ko notu fua tulu anbi sin bale-bale fuat ma sin nasnas na'ko natulu fua tulu neu ale uisneno teta. Au, UISNENO Kau, ukua ulali Au a'ak.

³⁶Ale mu'if na'ko Kir-Heres ma Moab ok-oke namneku nalalien. Au nekak nasusbon leka Au kius sin monit nane; Au on atoni le anbobi sit susal nukat anbi feku.

³⁷Sin al-al sin an eu sin nakan funu ma sin konon, napapa' sin niman, ma sin anpake kloe kalo taka nek susal.

³⁸Anbi ume-ume sin a'pupun ma anbi bale-bale mnela al atnen han kaet. Natuin Au upe' ulali Moab onle nai' le ka lomi fa.

³⁹Naskuku nalali Moab ok-oke! Moab anmae nae le'uf! In ankae natuin nasi'ut nalali ma pah-pah le anfun natef nan in sin anmanis in. Au, UISNENO Kau, ukua ulali Au a'ak.”

⁴⁰UISNENO nakua In a'an nak, “Onle kol teme nauf in ninen ma anpas, onane amsa uf mese of nem ma anpas nan Moab.

⁴¹In kot-kot sin ma in baki lape sin of nasik nan sin ma in solalus sin of namtau onle bife he nahoni.

⁴²Of naskuku nani Moab ma kan fani anteni fa uf mese, natuin sin namoko sin aoken neu Kau.

⁴³Sin natef nok maufinu, bola' ma akleot.

⁴⁴Atoni le naen nafetin na'ko maufinu of anmofu anbi bola', le anpoi na'ko bola' nane of anheke sin anbi kleot in nanan. Ale lasi nane of anbol anbi tubu le Au utetab ulali neu Au he uskuku ani Moab.

⁴⁵To le natnanib sin le kan mu'i fa be'it ma matani sin anao ma nami neot ma hafot anbi Hesybon, mes kot nane fe anputu ma sonaf Kesel Sihon amsa fe ai notu nani. Ai nale'un nalali bale nakat ma neten Moab, pah atoni-atoni le anlomi hen makenan.

⁴⁶Amle'ut neu Moab! In tuafen le naluli ma nabes neu Uisneno teta Kamos nale'un nalali in, ma sin anah sin naiti neki sin onle atoni le anheke nan sin anbi makenat.

⁴⁷Mes anbi neno amunit of Au uleko monit pah Moab. Au, UISNENO Kau, ukua ulali Au a'ak!” Lasi nane es of UISNENO anmoe neu Moab.