Read Uab Meto YEREMIA 49 Bible Online

YEREMIA 49 - Uab Meto bible

YEREMIA 49

¹I a'an UISNENO le naton nani neu Amon nak, “Nansa' nain na'ko Nai Gad nasik nani ma atoni-atoni le naluli ma nabes neu Uisneno teta Milkom sin natua nani? Ai katit ateni atoni Israel le nabe'i he natau pah nane?

²Mes of antia in tabu Au mo'e tuafen Raba, kot ainaf pah Amon nane, sin nen han sakanat makenat. Kot nane of anfani fatu tutnae ma kuan-kuan le anfun natef nan in of anputu nani ok-oke. Oke te Israel of naiti nafani in nain na'ko atoni-atoni le afi sin nasik nani.

³Hoi atoni Hesybon, amkae nai natuin kot Ai naskuku nalalien! Hoi bife-bife kot Raba, amkae ma amkulu nai! Ampake nai kloe kalo taka' nek susal. Hi maen meum aim nahenu nok nek amnekut. Milkom hi uisneno teta of naiti neki neu bale polin nok ale ana' fuat ma ale aplenat!

⁴Hoi hi le ka mi'ki fa! Nansa' him neka naebom natuin hi nonof-nonof maafa? Natuin sa' him sonlaitom neu hi mu'im? Nansa' onane talan te hi miuab mak katit fa es amsa le hen laban ki?

⁵Hi of mipeni lasi amle'ut le Au fe neu ki nem na'ko ale bale. Of hi maen es-es nahelnon he nafetin kun in aon anmes, ma katit fa le he nibun nabuab ki anteni.

⁶Mes anbi neno amunit, uf Amon ini monin of Au uleko ani. Au, UISNENO Kau, ukua ulali Au a'ak.”

⁷I a'an UISNENO Akuasat Afin-finit le naton nani neu Edom nak, “Ai atoni Edom katit fa he natenab nok nekaf mahine? Ai ale sin afainekat sin kan fe fa fainekat anteni neu sin? Sin nekaf mahine nane namneku nalalien ka?

⁸Hoi tuafen Dedan, amfani koti nai ma maen nai! Amnao nai ma mitolo' nai. Of Au uskuku ule'un ani Nai Esaf in sufan, natuin in tabu antelen he Au kas sin.

⁹Kalu atoni anseu tua min kase fuan, fun anmu'i le namaika, ma kalu abakat nem anbi fai ma nabak, in al naiti sa' le in ansinmak.

¹⁰Mes, Au nako ma pik uknino Nai Esaf sufan ini mu'in ma Au fai sin lasi tolo', bale sin natolo' anbine; sin ka nabe'i fa he natolo' anteni. Atoni Edom nok sin biafen ma sin ume atnoes, nale'un nalali sin ok-oke. Katit fa es amsa le he nafetnon.

¹¹Hoi Edom! Mumaika ale ho anmanat sin neu Kau, of Au panat sin. Maut he ale hi bife banu sin antao sin panet ma afnekan neu Kau.

¹²Atoni le ka nabe'i fa hen kas sin, sin amsa napeni kasat, nansa' hi kahaf? Namneo mes ankas ki!

¹³Au sup natuin Au kanak nak kot Bozra of anfani bale le neki lasi mtaus ma atoni nasaitan nani. Atoni of anmanis in ma anpake in kanan on sukat. Ale kuan le anfun natef nan in of anfani fatu tutnae talan te nabal-bal. Au, UISNENO Kau, ukua ulali Au a'ak.”

¹⁴Au, Nai Yeremia au ak, “Hoi Edom, au simo ulali beno mese na'ko UISNENO. In ansonu nalali haef neu uf-uf hen lelu sin he nibun nabuab solalus ma naloitan hen laban ko.

¹⁵UISNENO anmo'e ko amfani ao ole ma atoni nasi'ut ko.

¹⁶Ho lasi moko es nasekeb ko. Katit fa le he namtausan ko onle ho mutenab. Ho mutua ambi fatu sin sonan, na'ko tubu tunan. Maski ho mo'e ho ume anbi bale latan le amnaun le'uf amsa, amnanun onle bale kol teme in kuna, mes UISNENO of nasanut ko na'ko nane. UISNENO es naton lasi nane ok-oke.”

¹⁷UISNENO nakua In a'an nak, “Amle'ut le antoman Edom of matani le'uf talan te sekau am sekau le anao nok bale nane sin of naskek ma namtau.

¹⁸Onle nale'un Sodom ma Gomora nok ale kuan-kuan le anfun natef nan in, onane amsa Edom. Es amsa of ka natua anteni fa anbi nane. Au, UISNENO Kau, ukua ulali Au a'ak.

¹⁹On meo asu anpoi na'ko nasi naek anhaumak Noe Yordan ma nem neu mnela bale bikase neku hun, onane of Au aum ma mo'e atoni Edom naen na'ko sin pah nok askeken. Oke te of Au beti atomatas mese he naplenat uf nane. Sekau ka es nabe'i hen tao lasi nok Kau? Ai anmu'i ana' aplenat mese le nabe'i hen laban Kau ka?

²⁰Es nane te, amnen nai sa' le Au sali antom atoni Edom, ma sa' le Au he mo'e neu tuafen kot Teman. Sin anah sin amsa of anhel sin anao, ma ale atoni of namtau.

²¹Leka Edom anbel, slutuf matani le'uf of anbol talan te pah pinan ok-oke antainun; han hunun ma han koa na'ko in tuafen of manena talan te Nonof Akaba.

²²Onle kol teme nauf ninen hen heke sa'-sa', onane amsa musu of nem ma nasik nan Bozra. Anbi neno nane solalus Edom of namtau onle bife le he nahoni.”

²³I a'an UISNENO le naton nani antom Damsyik. “Tuafen kot Hamat ma Arpad sin namtau ma sin nekan na'unu natuin sin nen beno amle'ut. Sin nekan namtau ma na'oni neu am nem on oki anbi tasi.

²⁴Tuafen Damsyik sin an ole, ma sin naen nok amtaus. Sin namen ma naben menas onle bife le he nahoni.

²⁵Kot kan mateka ma le nahenu nok amlilat ma amoket nane muni i luman ma katit fa atuas anbine.

²⁶Anbi neno nane ale in munif sin of sin anmate anbi lanan-lanan kot nanan, ma ale in solalus sin of naskuku nale'un nani sin ok-oke.

²⁷Ale baki malape Damsyik of Au uto ani sin, ma Kesel Nai Benhadad in sonaf sin of Au unoe ani sin. Au, UISNENO, Akuasat Afin-finit, ukua ulali Au a'ak.”

²⁸Le i a'an UISNENO le In naton nani neu uf Kedar ma pah-pah bale plenat Hazor, le Nebukadnezar kesel Babel nasik nalali sin nak, “Hoi Nebukadnezar, amlaban nai uf Kedar ma mule'un atoni-atoni anbi neno saen nai!

²⁹Musik sin mu'it sin bibi kase, bikase paha snaen, ma sin ume-ume sin nok ale sin nesan ok-oke, ma amhunun nai neu sin mak, ‘Lasi maufinu an aum nan kit!’

³⁰Hoi hi atoni Hazor! Au, UISNENO Kau, ukua ulali Au a'ak: Amnao nai nok labah ma mitnani nai, ma mitolo' nai. Nebukadnezar kesel Babel ansali nalali ki hen laban ki. In nak,

³¹‘Neu nai amnao mat nai! Aim he hit atlaban atoni-atoni le sin naben alekot ma tainine nane. Sin kot ka naneo ma ka nahafo fa natuin kan mu'i fa in eno naek ma kan mu'i fa in ekat.”

³²UISNENO nakua In a'an anteni neu Nebukadnezar nak, “Musik man sin bikae-bikase paha snaen ma ale sin mu'it ok-oke! Atoni-atoni le an eu sin nakan funu tuk-tuka nane of Au usana sin neu me-me. Of Au fe nem neu sin lasi amle'ut nem na'ko ale bale.

³³Hazor of anpolin talan te nabal-bal ma anfani bale tolo' asu fui. Katit fa es anteni amsa le of he natua anbi bale nane. Au, UISNENO Kau, ukua ulali Au a'ak.”

³⁴Ka lo fa na'ko tabu Nai Zedekia anfani Kesel Yehuda, UISNENO Akuasat Afin-finit nakua In a'an neu kau antom pah Elam.

³⁵UISNENO nakua In a'an nak, “Of Au umate ani ale aklaot mahine le anmo'e Elam nabe'i ma anmatani le'uf.

³⁶Of Au fu anin neu Elam na'ko ale bale, ma usana in tuafen neu me-me talan te katit fa pah mese amsa le atnanis-atnanis na'ko Elam nane he ka nem fa neu sin.

³⁷Of Au mo'e atoni Elam sin namtausan musu le he namate sin. Au uto' nae le'uf neu sin ma of Au uskuku ani sin. Of Au sonu solalus ma anken sin talan te sin naen ok-oke.

³⁸Ale sin kesel sin ma sin anaet sin of Au ule'un ani sin, ma of Au uhakeb Au toko plenat anbi sin pah.

³⁹Mes anbi neno amunit, of Au uleko ufani Elam in monin. Au, UISNENO Kau, ukua ulali Au a'ak.”