Read Uab Meto YEREMIA 5 Bible Online

YEREMIA 5 - Uab Meto bible

YEREMIA 5

¹Hoi tuafen Yerusalem, amnao mituin lanan-lanan anbi hi kot! Mami nai anbi me-me, ma amsaksi nai. Amtae nai anbi kot-kot sin bale eno matan ai anmu'i atoni amneot mese le nahelnon he na'ki neu Uisneno. Kalu anmu'i, UISNENO of ansako Yerusalem in sanat.

²Hi miuab mak hi miluli mibes neu UISNENO, mes hi ka mitenab fa onane.

³Namneo-namneo le UISNENO antoti na'ko ki esle' lasi aki'at. UISNENO anbeso ki, mes hi kam sian fa lasi nane. In nasanab ki, mes hi kam lomi fa he In nanoina ki. Hi nakfatu ki, ma kam lomi fa he mite'un mi'ko hi sanat-sanat sin.

⁴Au utenab ak, “Ah, sin al to ana le ka nahin fa sa'-sa'. Sin antao ma anmo'e nok mono, natuin sin ka nahin fa sa' le UISNENO anlomi ma antoti na'ko sin.

⁵Leko au nao neu ale anaet sin, ma u'uab ok sin. Mes sin nahin sa' le UISNENO In anlomi ma antoti na'ko sin.” Mes sin al-al sin amsa kan lomi fa UISNENO naplenat sin; sin kan lomi fa he na'ki neu In.

⁶Es nane te meo asu na'ko nasi of namate sin, ma asu fui pah hufui of anpisu naklati sin. Asu knatan of naoinson nami in osan anhaumak ale sin kot ma ale atoni le anpoi ma anoinson of anheke ma anpisu naklati sin. Ale lasi nane anbol nalali natuin sin nasanab anae le'uf, ma sin ankoti Uisneno piut-piut.

⁷UISNENO nakua In a'an nak, “Nansa' Au he polin aikoti sanat-sanat na'ko Au to? Sin nasaitan nalali Kau ma naluli nabes neu sa' le ka Uisneno fa. Au fe neu sin mnahat talan te sin namsenan, mes sin anmapaisa, ma sin nem piut-piut ma ansenu amapaisa-amapaisa sin.

⁸Sin onle bikase keso apokat ma sin sinmakat matani le'uf; es-es ansinmak in biaf in fenai.

⁹Ai ka namneo fa ka Au kas to onle nane ma seunbanin sa' le sin anmo'e nalali?

¹⁰Of Au sonu musu he nale'un sin lene tua min kase, mes ka nabe'i fa he nale'un naklati. Of Au lenu musu nane hen ote toef na'ko sin tua min kase, natuin toef-toef nane ka Au ini fa.

¹¹To Israel ma Yehuda namneo-namneo sin an aneb nalali Kau. Au, UISNENO Kau, Au ukua ulali Au a'ak.”

¹²UISNENO in to na'uab lasi le ka namneo fa antom UISNENO. Sin nak, “Ah, In of kan mo'e fa sa'-sa'. Amle'ut of kan toman kit fa ma hit of ka ta'eku tok fa makenat ma amnahas.

¹³Hi mitenab mak ale Mafefa knino nane sin on anin, natuin a'an UISNENO kan bi fa sin.”

¹⁴Oke te UISNENO Akuasat Afinit nak neu kau nak, “Yeremia, natuin ale atoni nane sin na'uab onane, sin of napeni amle'ut le natuin sin tenab nak lasi nane of kan bol fa neu sin. Of Au mo'e Au a'ak on le ai anbi ho fefam. Uf le i of on hau meto, ma ai of notu nani sin talan te namsu nain ok-oke.”

¹⁵Hoi, to Israel, UISNENO of anfe uf mese nem na'ko pah a'lot he nape' ki. Uf nane in esan na'ko ahun-hunut, in uab hi ka mihin mani fa. Sin nabe'i matani,

¹⁶ma sin atoni aklaot abe'it matani; sin anlolo ma namate ma kan mu'i fa manekat.

¹⁷Sin of nalali hi pah in afan ma hi mnahat oke te namate hi anah-anah sin. Hi mu'it bijae ma bikase of anlolo sin, ma ale hi lene tua min kase ma ale hau bub fua mina of sin nale'un nani sin. Kot-kot mabaki lape le him sonlaitom neu sin of sin nale'un naskuku nani sin.

¹⁸UISNENO nakua In a'an nak, “Maski onle nane, anbi tabu nane amsa of Au ka ule'un fa Au to.

¹⁹Mes kalu sin natoti nak nansa' talan te Au tao ma mo'e ale lasi nane neu sin, muton nai hoi Yeremia, onle sin nasaitan Kau anbi sin pah ma nausi neu uisneno teta uf bian, onane amsa sin of anfani ate neu atoni-atoni anao amnemat anbi pah bian.”

²⁰UISNENO anlelu kau he utiaba In han ba'an i neu Nai Yakub in sufan le sin natua anbi Yehuda,

²¹“Amnen nai, hoi atoni amonot, ma amono-amates! Hi mu'i mataf, mes hi ka mit fa, hi mu'i lukef mes hi kam nen fa!

²²Au UISNENO Kau; nansa' hi ka mimtausan Kau fa? Namneo hi mes hem lilitai neu Kau! Au es anmo'e tasi in ninen hen fani nakat he nati' tasi kais antanhai nani talan te nabal-bal. Tasi nabe'i anfoe ma oki nabe'i namaunu, mes kan tanhai fa nakat nane.

²³Mes hi nak fatu ki ma him lomi hem laban; him beo milali ma misaitan Kau.

²⁴Hi ka mitenab mit fa he mitola Kau, maski Au es a'fe ki ulan, leko anbi tabu ulan fe anfatnon ai anbi tabu ulan he nasnas. Au amsa es a'fe neu ki tabu hem abul anbi ton-ton.

²⁵Mes hi sanat-sanat sin le nane es an eka ale lasi alekot nane talan te hi kam tamis mani fa.

²⁶Hoi Au nonot, anmu'i atoni-atoni amle'ut anbi ki. Onle atoni apao kleot le in natetu hen heke kolo, onane sin natetu kleot hen heke atoni.

²⁷On atoni ali'ut kolo le natua in a'kola neki kolo, onane amsa sin ume nanan sin natua nok ale bale le sin napeni neki ale lasi fulit ma paitan. Onane sin anmu'i kuasat ma anmu'i ale sa'-sa'

²⁸ma sin anpok ma naleko. Sin amle'ut kan mu'i fa in tu'an. Sin kan tao ma anmo'e fa amneot neu lasi li'anmanat ma ankome sin, ma kan pesi fa lasi atoni-atoni le anhamu'i sin.

²⁹Mes, Au, UISNENO Kau, of Au fe kasat neu sin natuin ale lasi nane; of Au seunbanin taos mo'et uf le i.

³⁰Lasi matani le'uf ma neki lasi hakataus anbol nalali anbi pah i:

³¹mafefa-mafefa mo'el, ale ana' fuat sin antuthae natuin kun sin lomin ma hi Au nonot him lomi ale lasi nane. Mes sa' le of hi he mo'e leka neno amsoput nane in nem anbol?”