Read Uab Meto YEREMIA 50 Bible Online

YEREMIA 50 - Uab Meto bible

YEREMIA 50

¹Le i han ba'an UISNENO neu kau antom kot Babel ma in tuafen nak,

²“Amtao taka' nai ma muton nai neu uf-uf mak Babel anmofu nalalien! Kais mutolo' lasi nane! Merodakh in uisneno teta naskuku nalalien, ma ale in le'u mahuma amle'ut anpe' nasan'on, ma ale in le'u mahuma sin nasi'ut sin matani.

³Uf mese na'ko aon bian a'li of nem nape' Babel ma anmo'e pah nane anfani mnela hufui. Atoni ma mu'it of sin naen, ma katit fa le anlomi he natua anbi nane anteni.”

⁴UISNENO nakua In a'an nak, “Anbi tabu nane atoni Israel ma Yehuda of sin nem ok-oke nok kaet, sin nami Kau, sin Uisneno.

⁵Of sin natoti lanan nao neu Sion, oke te sin anao nok lanan nane. Sin of anmo'e fef bela abal-balat nok Kau, ma of sin ana' nahelan fef bela nane.

⁶Au to nalet'on onle bibi kase le atukus-atukus nafetin ma anseke anbi neten. Sin naoinson na'ko tubu es neu tubu bian ma ka nahin anteni fa sin ume he es me.

⁷Ale musu le naeku nok sin anheke sin ma anhamu'i sin. Musu-musu na'ko Au to sin nak, ‘Sa' le hit atmo'e, kan sanaf, natuin atoni-atoni nane sin nasanab nalali neu UISNENO. Sin amaf sin nateb nalali neu UISNENO, es nane te sin mes he na'ki nabalah neu In.’

⁸Hoi to Israel, maen nai mi'ko Babel! Hi es mes hem nao mihun-hunu, he nati oke te bian natuin.

⁹Of Au boin uf fauk-fauk le abe'it ma matani na'ko aon bian a'li he nati sin nape' Babel. Sin of naloitan ma nabalab solalus hen maken ma anlaban Babel ma nis ma anbe'u in. Sin le nane atoni aklaot mahine le sin aklaot nane kan san nit fa.

¹⁰Of nasik nan Babel, ma asikten nane of sin naiti ale sa'-sa' nok sin nekan alomit kun. Au, UISNENO Kau, ukua ulali Au a'ak.”

¹¹UISNENO nakua In a'an nak, “Hoi atoni Babel, hi misik Au to. Him okaluaom nok amlilat onle bikase an'ekuli, ma onle bijae le fe neku hun.

¹²Mes hi of amfani uf le ka maota ki fa ante-teni anbi ale uf. Hit kot anae le'uf nane of nasi'ut ma namaeba nani. Hi pah of anfani mnela hufui le monas ma anmeto.

¹³Natuin Au uto', es nane te Babel of anfani fatu tutnae ma katit fa atuas anbi nane. Ale anaot le sin anao nok nane of sin naskek ma namtau.

¹⁴Hoi ale hi aklaot sin! Muloitan ma mubalab ho solalus sin hem funam mutef ma mupe' Babel. Miklaon nai hi anef sin ok-oke antumatan Babel, natuin in nasanab nalali neu Kau.

¹⁵Amhunun ma amkoa nai meki sakanat makenat funam natef kot nane! Babel nana'ton nalalien. Nale'un nalali ale in baki lape sin ma natsel nalalien. Au fe unaoba Au seunbanit neu Babel. Es nane te amtao ma mo'e sin nai onle sin antao ma anmo'e atoni-atoni bian.

¹⁶Kais mifetin sin hen mepu lene ai anabul anbi pah nane. Ale in atoni anao amnemat sin le sin natua anbi nane of sin anfani neu sin pah, natuin sin namtausan solalus le nape' Babel'.”

¹⁷UISNENO nakua In a'an nak, “Atoni Israel onle bikase pukan mese le meo asu anli'u sin ma nasana sin. Ahun-hunut kesel Asyur nape' ma anken sin, oke te Nebukadnezar kesel Babel ansau ma nanisi sin nuifen.

¹⁸Es nane te, Au, UISNENO, Akuasat Afinit, Israel sin Uisneno, of Au kas Kesel Nai Nebukadnezar ma in pah onle Au kas kesel Asyur.

¹⁹Of Au eki ufani atoni Israel neu sin pah. Sin of anbukae na'ko sin pah in afan Tubu Karmel ma pah Basan in afan. Sin of namsen natuin pah Efraim ma Gilead in afan.

²⁰Anbi tabu nane Israel ma Yehuda of sin naknino na'ko sanat, natuin of Au sako sanat atoni-atoni le Au ufetin ulali sin. Au, UISNENO Kau, ukua ulali Au a'ak.”

²¹UISNENO nakua In a'an neu uf mese na'ko aon bian a'li nak, “Mupe' tuafen Merataim ma Pekod nai. Mumate ma mule'un sin nai. Munaoba Au plenat nai. Au, UISNENO Kau, ukua ulali Au a'ak.”

²²Han makenat naslutu anbi pah, ma askuku naek anbol.

²³Babel anbiso pah pinan ok-oke talan te naskuku, mes muni i hau bisot nane nat'ipu nalalien! Ale uf sin naskek leka sin nen sa' le anbol nalali neu pah nane.

²⁴UISNENO nakua In a'an nak, “Babel hom laban Kau, es nane te hom tam anbi kleot le Au mo'e neu ko, mes ho ka muhin mani fa.

²⁵Au fai ulali Au ume bale makenat, ma nok to'as Au upoitan ale bale makenat nane, natuin Au UISNENO Anesit Afinit Kau ma Akuasat Afin-finit Kau mes he unaoba mepu mese anbi Babel.

²⁶Mipe' Babel nai na'ko ale bale, ma mile'un in ume maus ane kase! Ambubun ale bale le hi misik sin onle him bubun ane kase! Mile'un pah nane nai! Kais anmui nesif le miaina mani!

²⁷Mimate in solalus sin ok-oke nai! Mimate sin nai! Amle'ut neu uf Babel! In tabu antelen neu hen kas sin!” (

²⁸Atoni-atoni le sin naen neu Yerusalem na'ko Babel sin nanu'un neu onme hit UISNENO In anseunbanin taos mo'et atoni Babel antom Ume UISNENO.)

²⁹UISNENO nakua In a'an nak, “Amlelu ale ana' aklaot sin he nape' Babel nai. Mibuab ale atoni mahine le sin naklao nahin. Amfun ma mitef man kot nane ma kais mifetin es amsa he nafetnon. Amseunbanin ale in taos in mo'et ma anmo'e in anmatom nok in taos in mo'et, natuin in anmo'e nalali lasi amle'ut neu Kau. Le Knino Knao matani, Israel sin Uisneno.

³⁰Anbi neno nane ale in munif-munif sin of sin anmate anbi lanan-lanan in kot nanan, ma ale in solalus sin naskuku nani sin. Au, UISNENO Kau, ukua ulali Au a'ak.

³¹Babel hom neka naebom anae le'uf! Es nane te Au, UISNENO Kau, UISNENO Anesit Afinit, Uisneno Akuasat Afin-finit, Au laban ko. In tabu antelen he Au kas ko.

³²Ho to le neka naebon anae le'uf nane of sin anpastun ma anbel. Katit fa es amsa hen tuntaku ko he ho amfen. Ho kot-kot sin of Au otu ani sin, ma ale sa' le anhaumak sin of Au ule'un ani sin.”

³³UISNENO Akuasat Afinit nakua In a'an nak, “Atoni Israel ma Yehuda sin naben nameku sin. Al sin le anheke sin anpanat sin nok matani ma kan lomi fa he nafetin sin.

³⁴Mes sin afetin es Kau abe'it ma matani, Au kanak UISNENO Akuasat Afinit. Au eki nok es he mabe'u neu sin lasi eki halan neu pah pinan. Mes neu atoni Babel of Au fe neu sin lasi ka tainine ma lasi amtaus.”

³⁵UISNENO nakua In a'an nak, “Amle'ut neu Babel nok in to ma in ana' aplenat sin ma ale in atoni mahine sin!

³⁶Amle'ut neu ale mafefa Babel! Sin amo'et ma amonot. Amle'ut neu solalus Babel le abe'it ma matani! Sin namtau nae le'uf kun!

³⁷Miskuku mile'un sin bikase ma sin aklet makenat sin! Amle'ut neu in solalus sin le anseb sin! Fun sin ole anmate! Mile'un Babel in mu'in nai! Misik man ale sin a'maus nai!

³⁸Mimate ale sin noe ma sin lene nai! Natuin Babel nahenu nok ale le'u mahuma le neki mainisit, le anmo'e ale nausi neune anfani amaunut.

³⁹Es nane te Babel of anfani bale neu ale nitu ma ale smanaf amaunut ma ale kolo paha snaen. Talan te nabal-bala of katit fa esle' anlomi he natua anbi bale nane anteni.

⁴⁰Onle Au ule'un Sodom ma Gomora, nok ale kuan-kuan le anhaumak sin, onane amsa of Au ule'un Babel. Katit fa es amsa of natua anteni anbi bale nane. Au, UISNENO Kau, ukua ulali Au a'ak.

⁴¹Uf mese abe'it kun anfen nem na'ko pah a'lo anbi aon bian a'li. Sin nem nok kesel namfau hen makenan.

⁴²Sin bale makenat nane aklaot ma auni; sin amaufinut ma ka nahin fa lasi maneka. On aslutuf oki tasi nanan onane amsa slutuf na'ko sin bikase le naen nanes'on anao mat he nape' Babel.

⁴³Leka sin nen lasi nane, kesel Babel kan mo'e fa sa'-sa'. Lasi amtaus an amu nan sin, in namen onle bife he nahoni.

⁴⁴On meo asu anpoi na'ko nasi naek anhaumak Noe Yordan ma nem neu mnela bale bikase neku hun, onane amsa Au, UISNENO, of Au aum ma mo'e atoni Babel ma sin naen na'ko sin pah nok askeken. Oke te of Au beti atomatas mese he in naplenat uf nane. Sekau ka es nabe'i he nanes'on nok Kau? Sekau ka es nabe'i hen mo'e lasi nok Kau ka? Ai anmu'i atomatas le nabe'i hen laban Kau ka?

⁴⁵Es nane te amnen nai sa' le Au sali antom Babel, ma sa' le Au he mo'e neu in tuafen. Sin anhenu amsa of anhel sin ma neki sin anao, ma ale atoni of namtau.

⁴⁶Leka Babel in anmofu, of aslutuf anae le'uf anbol talan te pah pinan ok-oke antainun; han hunun ma han koa na'ko in tuafen of ale uf bian sin neu sin hankenu.”