Read Uab Meto YEREMIA 51 Bible Online

YEREMIA 51 - Uab Meto bible

YEREMIA 51

¹UISNENO nakua In a'an nak, “Of Au sonu anin a'le'un le anfu anao neu Babel ma neu in tuafen.

²Of Au sonu atoni-atoni anao amnemat le of naskuku nale'un Babel onle anin anfu natpeneb ane kase in a'po'an. Anbi neno amle'ut nane sin of nape' pah nane na'ko bale ok-oke ma nako ma anpik naknino nani.

³Kais amfe sona neu in solalus sin he nalulu sin as'anef ai nalile in pake makenat. Ale in anmunif sin kais mifetin sin hen monin. Miskuku mile'un in solalus sin ok-oke!

⁴Of sin napap matani ma anmate anbi lanan-lanan anbi sin kot nanan.

⁵Au, UISNENO Kau, UISNENO Akuasat Afinit, Uisneno Knino Israel, of Au ka usaitan fa Israel ma Yehuda, maski sin nasanab nalali neu Kau.

⁶Mifetin hi aom nai! Maen nai mi'ko Babel, kais talan te namate ki natuin hi sanat! Natuin in tabu esle' i Au seunbanin lasi amle'ut Babel, ma Au kas in anmatom nok in taos in mo'et.

⁷Babel afi ahunut onle klas mnatu le Au na' ma mo'e pah pinan anmafu ok-oke. Uf-uf sin ninu tua mina mtasa na'ko klas nane, talan te sin anfani namaunun.

⁸Mes nok askeken Babel in anmofu ma anpe'. Amkae nai neu in, ma mami nai le'u ma malo neu in papa'-papa' sin, oni nabe'i in naleko.

⁹Atoni anao amnemat le sin natua anbi nane sin na'uab es nok es nak, ‘Hit tahelnok talali he tuntaku Babel, mes hit kat manap fa! Leko nesi hit tasaitan pah i ma hit atfani neu hit kuan mese-mese. UISNENO ankas nalali Babel nok matani, ma naskuku nani ok-oke.’ ”

¹⁰UISNENO In to nak, “UISNENO naton nalali nak hit atbi lasi amneot. Aim het nao nai teu Yerusalem ma tatonan uf nane sa' le hit UISNENO anmo'e nalali.”

¹¹UISNENO nafena nalali nekaf ale kesel Media, natuin in he naskuku nale'un Babel. Onle nane In anseunbanin taos mo'et atoni-atoni le naskuku nale'un In Ume. Ale solalus nakaf amakenat sin anfe nalali plenat nak, “Miaikab aklaot in as'anef! Miloitan ben besi tika!

¹²Amfe taka' nai neu he mipe' ale baki lape Babel. Ampao mihel nai. Mihakeb apaot. Miloitan makenat nok askeken.” UISNENO nanoaba nalali sa' le In ansali neu atoni Babel.

¹³Pah nane in a mu'in matani ma in noe namfau, mes in amonin namsopuen; in neno amsopun nem atelen.

¹⁴UISNENO Akuasat Afinit ansup anbi In aon nak In of ansonu atoni amfaun on a'fokat he nape' Babel, ma sin of ankoa a'baf lasi mnisat.

¹⁵UISNENO anmo'e pah pinan neki In kuasat, In anpakae pah pinan neki In nek mahine, ma In nauf obet neno tnanan neki In nek manoe.

¹⁶Al In anfe plenat, oe anbi neno tnanan na'lu, In anfe anin nem na'ko pah pinan heun ok-oke, ma In anmo'e limat anpe' anbi ulan in nanan, ma In ansonu anin na'ko bale In nahik ma napan anin anbine.

¹⁷Atoni pah pinan nahin leka sin nit lasi nane ok-oke, nak in amonot ma kan mu'i fa mahine. Ale apakae mnatu sin anmae, natuin le'u mahuma le sin anmo'e nane mo'el ma luman ma kan mu'i fa smanaf.

¹⁸Ale le'u mahuma nane ka maupa fa, mes nakle'at sin ma nasi'ut sin. Leka in tabu antia, sin of namle'u.

¹⁹Uisneno Nai Yakub ka onfa ale le'u mahuma nane; In kanan UISNENO Akuasat Afinit; In anbeti nalali Israel anfani In to.

²⁰UISNENO nakua In a'an nak, “Babel ho on ko besi tutu', Au bale makenat he Au maken. Au pake ko he meso ale uf ma ale plenat.

²¹Au pake ko he muskuku mule'un bikase ma asaet, fun ale aklet ma asaet sin.

²²Au pake ko he mumate atoni ma bife, mnasi ma munif amsa, anfeto ma anmone.

²³Au pake ko he mule'un atukus ma in mu'it sin, amepu lene ma in bijae abetas sin, ana' aplenat ma ale solalus nakaf amnanut sin.”

²⁴UISNENO nakua In a'an nak, “Amsaksi nai neu onme anbi tabu le i Au he seunbanin neu Babel ma in tuafen ale sin mo'et amle'ut le sin mo'e antom Yerusalem.

²⁵Hoi Babel, ho onle tubu le muskuku mule'un pah pinan ok-oke. Mes Au, UISNENO Kau, of Au laban ko. Of Au hel ko ma nunu ko ma ufetin ko hem putu mate ma amfani afu.

²⁶Katit fa fatu mese amsa na'ko ho fatu atkuas le of hen pake nafani neu he nafena. Ho of amfani onle mnela hufui talan te nabal-bal. Au, UISNENO Kau, ukua ulali Au a'ak.”

²⁷“Hoi kesel na'ko aon bian a'li! Amfe taka' nai neu hem laban! Amfu to'is he nati' uf-uf sin a'nen! Mubuab uf-uf he maken amlaban Babel! Amlelu kesel Ararat, Mini ma Askenas he sin anmaken nok. Maiti nai solalus nakaf amnanut mese hen fani nakaf anbi makenat nane. Mubuab bikase amfaun onle fokat pukan mese.

²⁸Muloitan nai uf-uf he maken amlaban Babel. Amboin ale kesel Media ma ale ana' aplenat sin ma in atomatas sin ma solalus na'ko pah ok-oke le sin naplenat sin.

²⁹Pah pinan anlilitai ma nabeko natuin Au unaoba Au salit he mo'e Babel hen fani hufui le katit fa atoni natua anbine.

³⁰Solalus Babel nasnas nalalien na'ko makenat ma sin natua anbi bale-bale makenat. Sin be'in ma matanin namneku ma kan mo'e fa sa'-sa'. Kot in Eno Naek sin nale'un nalali sin ma notu nani ume-ume sin.

³¹Ale haef sin naen maakatuin he natonan kesel Babel nak nape' nalali in kot na'ko ale bale.

³²Musu antoko nalali bale tlakab, ma bale makenat musu notu nalali sin. Solalus Babel anfani namtau ma nekan namneku.

³³Ka lo fa anteni of nis ma anbe'u sin ma musu of anteli sin on ane kase anbi bale teli ane kase. Au, UISNENO Akuasat Afinit, Israel sin Uisneno, ukua ulali Au a'ak.”

³⁴Kesel Babel naskuku nani Yerusalem ma neku nani; in naknino nani kot nane on atoni naknino botil. On mu'it anae le'uf mese, in anolo nan Yerusalem ma in natua in tain neki ale alekot na'ko kot nane, oke te anpolin in nesin.

³⁵Tuafen Sion, miuab nai mak, “So nati' amle'ut ansanu nem neu Babel on afi in anmo'e neu kit!” Tuafen Yerusalem, miuab nai mak. “So nati' susal mafena ansanu nem neu Babel on afi in nasanut susal mafena neu kit.”

³⁶Es nane te UISNENO nakua In a'an neu tuafen Yerusalem nak, “Of Au mabe'u uhelnok neu hi lasi ma Au seunbanin taos mo'et na'ko hi musu-musu sin neu ki. Ale oe mata ma ale noe Babel of Au umeti ani sin.

³⁷Pah nane of anfani fatu tutnae, bale asu fui natolo' anbine. Atoni namtau leka ankiso bale nane ma katit fa es amsa hen lomi natua anbi nane.

³⁸Atoni Babel sin anbai on meo asu, ma nato' anae le'uf on meo asu ana.

³⁹Fun sin sinmakat neu he nah anfen nok matani, of Au uloitan amnahat neu sin, ma Au mo'e sin anmafu ma anfailelu talan te antup ma kan fen anteni fa.

⁴⁰Of Au eki hen lolo sin on bibi kase ana, bibi ma bibi keso. Au, UISNENO Kau, ukua ulali Au a'ak.”

⁴¹UISNENO nakua In a'an nak, “Babel le anpules in anbi pah pinan ok-oke nasik nan in nalalien ma antoko nalali neune. Fun nane neki lasi amtaus anae le'uf neu uf-uf.

⁴²Oe tasi ansae neu Babel; in okin pesen naslutu antom pah nane.

⁴³In kot-kot sin anfani bale amtaus, onle mnela hufui ametos. Katit fa es amsa le anlomi he natua ai he nao nok bale nane.

⁴⁴Fun Babel in uisneno teta, kanan Bel, of Au akas in. Of Au mo'e in anfe nafani sa' le afi in nasik nan sin. Uf-uf of ka nabes fa neu in anteni. Babel in baki lape sin natsel nalalien.

⁴⁵Es nane te maen nai mi'ko nane, hoi to Israel! Mifetin hi aom nai na'ko Au to'as le ansae mnaun le'uf.

⁴⁶Kais mimtau ai hi nekam naoni, natuin hanaf aseof le him nen. Ton mese te han beno le nanaobon nane in naikun — han beno antom lasi amle'ut anbi pah nanan ma antom kesel sin le anmakenan es nok es.

⁴⁷Miteb nai, of ante in tabu of Au kas ale le'u mahuma Babel. Of nasi'ut pah nane ok-oke, ma tuafen ok-oke of namate sin.

⁴⁸Ale sa le anbi neno tunan ma pah pinan of na'ba' nok amlilat leka Babel anmofu anbi uf aon bian a'li in niman le in nem he naskuku nale'un nani.

⁴⁹Atoni namfau anbi pah pinan ok-oke malolo ma anmate natuin Babel, mes tabu i Babel of anmofu natuin atoni Israel le anlolo namate sin. Au, UISNENO Kau, ukua ulali Au a'ak.”

⁵⁰UISNENO nakua In a'an neu atoni Israel anbi Babel nak, “Hi mifetnom milalien na'ko malolot ma maten. Es nane te, amnao nai esle' i! Kais ampao! Maski hi mi'lo mi'ko ume, mimnau nai neu Kau, hi UISNENO, ma neu Yerusalem.

⁵¹Hi mak, ‘Nasi'ut kai ma namaeba kai; hai humam namneku natuin atoni-atoni anao amnemat antoko ke'an-ke'an knino Ume UISNENO.’

⁵²Neu, amnen nai Au a'ak i. Of ante in tabu Au kas ale le'u mahuma Babel. Anbi pah nane ok-oke of atnen hanaf atoni ansakoi natuin papa' le anae le'uf kun.

⁵³Maski Babel ansae neu neno atnanan ma nafena bale he nataunon le kat nao atene fa, of Au sonu atoni piut neune he nale'un nani. Au, UISNENO Kau, ukua ulali Au a'ak.”

⁵⁴UISNENO nakua In a'an nak, “Amnen! Anbi Babel atoni ansakoi ma ankae nok susal natuin lasi amle'ut le anbol anbi pah nane.

⁵⁵Au fe uskuku ule'un Babel ma usnasab in hanaf-hanaf amlilat amoket sin. Musu nem onle tasi okin na'lu, ma in solalus sin amsa anken nok han sakanat makenat.

⁵⁶Sin nem he nale'un Babel, anheke in solalus-solalus sin ma naipu ale sin bale makenat. Au, UISNENO Kau le Au kas lasi amle'ut, ma Babel of Au seunbanin anmatom nok in taos in mo'et.

⁵⁷Au of umofu ale ana' aplenat Babel — ale in mahine sin, atomatas sin ma solalus sin. Sin of kan fen anteni fa mes antup talan te nabal-bal. Au ukua ulali Au a'ak; Au kesel Kau, UISNENO Akuasat Afinit Kau.

⁵⁸Baki lape Babel le nahel matani of Au uskuku ule'un ani talan te anfani namnes nok nain. In eno naek amnanut sin of Au otu ani sin ok-oke. Uf-uf sin nahaebon nok luman, natuin sin mepu in nesan Au of otu ani sin ok-oke. Au, UISNENO Akuasat Afinit, ukua ulali Au a'ak.”

⁵⁹Apaot apanat Kesel Nai Zedekia es Nai Seraya Nai Neria anmone Nai Mahseya in upuf. Anbi ton ha Nai Zedekia kesel Yehuda nanaoba plenat Nai Seraya natuin Nai Zedekia neu Babel. Fun au fe neune lasi sutais mese.

⁶⁰Ale amle'ut le of nem neu Babel ma lasi-lasi bian antom pah nane au tui ulali anbi sulat manunu mese.

⁶¹Oke te au ak neu Nai Seraya, “Leka hom tia Babel ho muhelnom he nati' ale sa' le matui anbi sulat i hom so'i mani neu atoni-atoni anbi nane.

⁶²Oke te hom onen toti mak on i, ‘Koi UISNENO, Ho mukua mulali Ho a'am mak kot i of Ho mule'un mani talan te atoni ma mu'it of namneku ok-oke, ma bale i of anfani on mnela hufui talan te nabal-bal.’

⁶³Nah, leka hom so'i mulali sulat i in nesan neu atoni-atoni nane, amfutun fatu neu sulat i, oke te ampolin neu Noe Efrat in atnanan,

⁶⁴ma ho mak, ‘Onle i of anbol neu Babel. Pah i of anlem ma kan poi anteni fa natuin amle'ut le UISNENO anfe nem neu in.’ ” Nai Yeremia in uab molok sin namsopu anbi i.