Read Uab Meto YEREMIA 52 Bible Online

YEREMIA 52 - Uab Meto bible

YEREMIA 52

¹Nai Zedekia in ton bo'nua am mese leka in anfani kesel anbi Yehuda. In naplenat anbi Yerusalem nan ton bo'es am mese in a'lon. In ainaf kanan bi Hamutal, Nai Yeremia anfeto na'ko kot Libna.

²On Kesel Nai Yoyakim, Kesel Nai Zedekia amsa nasanab neu UISNENO.

³UISNENO nato' anae le'uf neu tuafen Yerusalem ma atoni Yehuda talan te In anli'u sin ma ka namafo fa sin anteni. Nai Zedekia anlaban he nafetnon na'ko Nai Nebukadnezar kesel Babel,

⁴es nane te Nai Nebukadnezar nok in solalus sin ok-oke sin nem ma nape' Yerusalem anbi fun bo' antam neno bo'mese antam ton sio tabu Nai Zedekia nanaoba plenat. Sin nahakeb bale solalus anbi kot kotin, nahakeb baki lape makenat

⁵ma sin anken kot nane piut talan te ton bo'es am mese Nai Zedekia nanaoba plenat.

⁶Anbi fun ha antam neno sio ton nane amsa, leka lasi amnahas mafen le'uf talan te to kan mu'i fa mnahat ok-oke anteni,

⁷musu nale'un baki lape kot. Anbi fai nane, maski atoni Babel fe nape' kot nane, solalus Yehuda ok-oke sin naen neu Nonof Yordan. Sin anao nok lanan nok etu sonaf, oke te anpoi nok eno naek le anmalutab baki lape nua en anbi bale nane.

⁸Mes solalus Babel sin anli'u Kesel Nai Zedekia, ma anheke in anbi mnela Yerikho. Ale in solalus sin naen nasaitan in.

⁹Nalali te sin neki Kesel Nai Zedekia neu Kesel Nai Nebukadnezar anbi kot Ribla anbi pah Hamat, oke te nafek lasi maten neu in.

¹⁰Anbi kot nane amsa namate in anah-anah sin anbi in human ma in maten, ma ale ana' aplenat Yehuda namate sin amsa.

¹¹Oke te anlo'i napoitan Nai Zedekia in matan, oke te anfutu in neki kolen besi ma neki in neu Babel. Anbi nane natam in anbi o'of, ma in kan poi nit fa na'ko nane talan te tabu in anmate.

¹²Anbi fun nima antam neno bo'mese anbi ton bo'en am sio Nai Nebukadnezar kesel Babel nanaoba plenat, atoni mese in kanan Nai Nebuzaradan in nem neu Yerusalem. In le nane afainekat ma nakaf apaot neu Nai Nebukadnezar in aon.

¹³Nai Nebuzaradan notu Ume UISNENO, kesel in sonaf, ma ale ume atoni anaet anbi Yerusalem.

¹⁴Oke te in solalus sin ok-oke natseleb nani ale baki malape kot nane.

¹⁵Nalali te to le fe anbi kot nane, esle' ale ameput mahine le fe nabalah, atoni-atoni amamu'it, ma atoni-atoni le sin naen neu Babel, Nai Nebuzaradan neki sin ok-oke nao neu Babel.

¹⁶Mes bian na'ko to amamu'it abainesit ma kan mu'i fa maus namaika sin anbi Yehuda, ma anlelu sin hen mepu lene tua min kase ma lene-lene meto.

¹⁷Ale ni noni molo ma ale aklet anbi Ume UISNENO ma pika noni molo atoni Babel nape' nani sin, oke te ale noni molo nane sin neki sin nao neu sin pah.

¹⁸Sin amsa naiti neki ale bale-bale i: ale skop, bale afu baki tulu, ale bale paku, mako-mako he nanunu mu'it in na' le anlolo neu fua tulu, mako-mako neu he notu atu fomeni, ma ale bale noni molo bian le anpake sin neu luli besa.

¹⁹Ale bale mnatu ma noni muti, esle' ale mako an-ana ma bale ai flae, mako-mako le nanunu mu'it in na' le anlolo neu fua tulu, bale afu, pake haen, mako-mako neu atu fomeni, ma mako-mako neu hen tesi tua mina mtasa neu fua tulu, Nai Nebuzaradan naiti neki sin ok-oke.

²⁰Ale bale noni molo le Kesel Nai Salomo anmo'e sin neu Ume UISNENO, esle' hi nono nua, aklet-aklet, bale oe ma bijael bo'es am nua le natnat bale oe nane, ale nane ma'fen le'uf, talan te kan tai nani fa sin.

²¹Ni noni molo nua en nane papmese; es-es amnanun meter 8, in akbubun meter 5,3, ma anbi in atnanan luman. Noni molo in mafaun milimeter 75. Anbi in mese-mese nane in fafon anmu'i ni in anakan amnanun meter 2,2. Anfun natef ni nane sin anakenu anmu'i makano neki linkase in fuan, al-al sin na'ko noni molo amsa.

²³Linkase fuan le makano anbi ni mese-mese in anakan nane fuan natun mese, mes al fuan bo'sio am ne le mamnita na'ko pinan.

²⁴Nesi na'ko nane, Nai Nebuzaradan anheke Ana' Fuat Knino Amnanut Nai Seraya in atuntakus Nai Zefanya, atoni tenu le anpao eno Ume UISNENO,

²⁵afainekat neu kesel sin mana' hitu le fe anbi kot, nakaf makenat, atuntakus nakaf makenat le anmepu solalus sin mepu sulat, ma atoni anaet bian sin bo'ne.

²⁶Atoni nane ok-oke neki sin neu Kesel Nai Nebukadnezar anbi

²⁷kot Ribla, anbi pah Hamat. Anhamu'i sin anbi nane, oke te namate sin. Onle nane atoni-atoni Yehuda naiti neki sin na'ko sin pah ma neki sin nao neu bale polin;

²⁸sin al sin ok-oke atoni 4.600. Nai Nebukadnezar naiti neki sin maakatuin on i: atoni 3.023 anbi ton hitu leka in nanaoba plenat, atoni 832 na'ko Yerusalem anbi ton bo'es amfanu leka in nanaoba plenat, ma atoni 745 Nai Nebuzaradan naiti neki sin anbi ton bo'nua am tenu leka Nai Nebukadnezar nanaoba plenat.

³¹Anbi fun bo'es am nua tam neno bo'nua am nim anbi ton bo'tenu am hitu leka naiti neki nalali Nai Yoyakhin neu bale polin, Nai Ewil-Merodakh anfani kesel Babel. Anbi ton nane amsa in naton in manekan neu Nai Yoyakhin, ma nafetin in na'ko o'of,

³²fun antao ma anmo'e in nok alekot. Anfe neu Nai Yoyakhin monit le in nesi na'ko monit kesel-kesel bian le anpolin sin amsa anbi Babel.

³³Nafetin in he nati' in anseka in bale o'of ma nesi na'ko nane te tal namsopu anbi in monin nanan in nabe'i anbukae anbi sonaf, ma neno-neno te anfe neune noni hen pake neu in monin.