Read Uab Meto YEREMIA 6 Bible Online

YEREMIA 6 - Uab Meto bible

YEREMIA 6

¹Amnao nai mitnani nai, hoi atoni-atoni Benyamin! Misaitan nai Yerusalem! Amfu to'is nai anbi Tekoa, ma mipina ai taka' anbi Bet-Kerem! Lasi amle'ut ma mafena naek ansali ki na'ko aon bian a'li.

²Kot Sion nane in mas le'uf kun, mes UISNENO of nale'un nani;

³ale ana' aplenat of nahakeb sin um-ume anbi bale nane nok sin solalus sin. Anfun natef nan kot nane of sin antao sin um-ume, es-es anbi bale le in anlomi.

⁴Sin of na'uab nak, “Neu nai, mibalab nai mipe' Yerusalem nai! Aim nai tape' in nok ne-neno!” Mes namuni te of sin na'uab nak, “Koi, hit fe taniaok! Manas anmesoken, hit mafok namnanuen.

⁵Leko hit tape' kot nane nok fa-fai, ma taleun tani ale baki malape kot nane.”

⁶UISNENO Akuasat Afinit anlelu nalali ale ana' aplenat nane he nafae ale hau ma nahakeb bale makenat anfun natef nan kot Yerusalem. UISNENO nakua In a'an nak, “Kot le i of Au kas in natuin anbi kot nane in nanan antao ma anmo'e nalali hamu'it anae le'uf.

⁷On oe mata napoitan oe meuknino, onane amsa kot nane napoitan lasi amle'ut piut. Al lasi amle'ut ma lasi masikat es Au nen na'ko kot nane; papa' ma menas Au it anbi me-me.

⁸Hoi tuafen Yerusalem, nati' ale lasi susal mafena nane anfani lasi mnauba neu ki! Kais talan te Au usaitan ki ma Au ubaina hi kot anfani mnela hufui le katit fa atoni natua anbine.”

⁹UISNENO Akuasat Afinit nakua In a'an neu kau nak, “Of Au eu Israel monas af-afa onle tua min kase le anseu nalali in fuan ok-oke. Es nane te, leka fe anmu'i tabu, mifetin le fe namaika sin nai.”

¹⁰Au utae ak, “Koi UISNENO, au he u'uab neu sekau ka, ma au mes he umnauba sekau ka? Sin nakan fatu ma kan lomi fa hen simo lasi mnauba. Sin anma'nis ma kan lomi fa Ho a'am le au utiaba neu sin.

¹¹Ho to'as neu sin amsa maputu anbi au nanak, koi UISNENO! Au ka eka ube'i fa.” Oke te UISNENO nakua In a'an nak, “Ampolin Au to'as nane neu li'ana-li'ana sin anbi lan opat ma neu atoni-atoni munif sin le fe sin nabuan. Atoni ma bife of anheke sin, ma atoni mnasi sin amsa of ka nafetnok fa.

¹²Sin ume of sin fe nani neu atoni teta, onane amsa ale sin lene ma ale sin fenai sin. Tuafen anbi kot i of Au kas sin.

¹³Sin al-al sin, anaet abaut, sin nami lasi mnisat natuin lanan ka amneot. Nesi na'ko nane Mafefa knino ma Ana' fuat knino sin amsa anfuli ma anpaitan to.

¹⁴Ale papa' na'ko Au nonot sin natenab nak nane papa' an-ana. ‘Ah, ka sa'-sa' fa,’ sin nak, ‘ale lasi leko ma tainine.’ Mes lasi ka on fa nane.

¹⁵Namneo-namneo sin hen mae natuin sin anmo'e nalali ale lasi amle'ut nane. Mes sin human anmafau ma sin kan mae nahin fa. Es nane te sin of anbel papmese on atoni bian; sin monin namsopu leka Au kas sin. Au, UISNENO Kau, Au ukua ulali Au a'ak.”

¹⁶UISNENO nakua In a'an neu In nonot nak, “Amhake nai anbi lanan-lanan sin a'sekin, ma amkiso milek-leko nai! Mitoti nai neu afi lanan-lanan ahun-hunut, na'ko sin le nane me ka es naleko nesi. Mituin nai lanan nane, he nati' hi moni ambi tainine. Mes sin nak, “Kahaf, hai kam lomi fa he mituin lanan nane!”

¹⁷Oke te UISNENO naiti apanat ma apaot he namnauba sin he nati' sin nen hanaf taka' na'ko to'is in hanan. Mes to nane nak, “Hai kam lomi fa hem nen ma mitnin.”

¹⁸Es nane te UISNENO nakua In a'an nak, “Amnen nai hoi uf-uf! Hi mes he mihin sa' le of hen bol neu Au nonot.

¹⁹Amkiso nai, hoi pah pinan! Au nonot kan lomi fa hen simo Au plenat ma ka na'ki fa neu Kau. On seunbanit neu sin tenab ne'ob nane Au fe amle'ut nem anbol neu sin.

²⁰Maota sa' le sin neki fomeni neu Kau na'ko Syeba, ai atu fomeni na'ko pah a'lo? Au ka lomi fa he simo sin fua tulu nane. Au ka lomi fa ale sin fua tulu mnatu nane.

²¹Au mes amo'e atoni-atoni le i anpastun ma anbel. Amaf ma anah, biaf ma ume atnoes of namle'u ok-oke.”

²²UISNENO nakua In a'an nak, “Uf matani mese anfen nemen na'ko pah a'lo na'ko aon bian a'li. Sin nem hen makenan.

²³Sin bale makenat nane aklaot ma auni; sin amaufinut ma kan mu'i fa lasi manekat. On oki tasi in hanan onane amsa sin bikase ku'en hanan na'misu natuin antepo sin naen matani he nape' Yerusalem.”

²⁴Leka sin nen lasi nane, tuafen Yerusalem sin kan mo'e fa sa'-sa'. Lasi amtaus anfun natef nan sin, ma sin naben menas on bife le he nahoni.

²⁵Sin ka nabe'i fa he naoni anbi lanan ai he nao neu lene, natuin anbi bale me-me musu le anpake bale makenat sin napoitan maufinu.

²⁶UISNENO nakua In a'an neu In nonot nak, “Ampake nai klo'e kalo ma amtiloe nai ambi afu. Amkul ma amkae nai nok nek susal on akaet le ankae neu in anah fua mese le anmate, natuin ale'un le nape' ki nok askeken.”

²⁷Oke te UISNENO nakua In a'an neu Nai Yeremia nak, “Amsu' Au nonot nai, onle hom su' noni molo. Amtae mulek-leko sin taos sin mo'et!

²⁸Sin al-al sin alaban ma nakan fatu, matanin on niti molo ma besi. Sin taos mo'et amle'ut ma sin nao neu me-me he nanaoba lasi le nale'uf atoni bian sin kanan.

²⁹Bale neu he nanoeba noni anmaputu lek-leko, mes maklafu noni molo kan lomi fa he noe ma namneku. Ka maota fa neu hen su' Au nonot piut-piut he naknino sin, natuin sin kan polin fa sin atoni-atoni amle'ut sin.

³⁰Of nakanab sin nak noni muti mapolin, natuin Au, UISNENO Kau, Au polin ulali sin.”