Read Uab Meto YEREMIA 7 Bible Online

YEREMIA 7 - Uab Meto bible

YEREMIA 7

¹UISNENO anlelu kau nao neu In Ume ma au hake bi in eno naek le atoni Yehuda nem antam nokan he naluli nabes. In anlelu kau he uton In a'an i neu sin, “Mite'un hi taos hi mo'et ma hi monim, onane te Au, UISNENO Akuasat Afinit, Israel of Au ufetin ki he mitua mibalah anbi bale i.

⁴Kais hi miteb neu afulit apaitan le na'uab nak, ‘Hit tainine, natuin i Ume UISNENO. Namneo i Ume UISNENO!’

⁵Mite'un nai hi monim ma hi taos mo'et sin. Amtao ma mo'e nai lais amneot es neu es.

⁶Kais him hamu'i amteni atoni anao amnemat, li'ankome ma anmanat, ma ale bife banu. Kais mimate atoni le ka nasanab fa anbi pah i. Kais miusi uisneno teta uf bian, natuin lasi nane of nale'un ki.

⁷Kalu hi mite'un hi monim ma hi taos hi mo'et sin, ma misnas na'ko amtao ma mo'e ale lasi nane ok-oke, of Au ufetin ki he mitua mibalah anbi pah le i le Au fe ulali on bale bela mnasi neu hi amaf sin.

⁸Mes, namneo-namneo ka maota fa hi miteb neu ale uab mo'el ma poi.

⁹Hi mibak, mimate atoni, amapaisa, ma amsaksi lasi mo'el ma poi, ma mitulu fuat neu Baal, ma miluli mibes neu uisneno teta le hi ka mihin mani fa.

¹⁰Leka him tao ma mo'e ale lasi nane ok-oke, hi aim neu Kau anbi Au Ume, ma hi mak, ‘Hai amtainine!’ Oke te him tao ma mo'e piut hi taos hi mo'et amainisit nane.

¹¹Ai hi mitenab mak Au Ume knino i on bale masikat? Ale hi taos hi mo'et Au it ulalien.

¹²Amnao neu Silo, kot le afi ahunut Au beti ulali anfani bale luli besa neu Kau. Amkiso nai sa' le Au mo'e ulali neu bale nane natuin ale sanat na'ko Au nonot Israel.

¹³Maski Au ukua Au a'ak neu ki piut-piut, hi kam lomi fa hem nen ma mitnin. Him tao ma mo'e ale sanat-sanat nane, ma hi kam lomi fa he mitae leka Au boin ki.

¹⁴Nah, Au Ume knino le him sonlaitom meune, ma bale le Au fe ani neu hi amaf sin ma neu ki le i of Au tao ma mo'e ani onle Au tao ma mo'e Silo anbi tabu ahunut.

¹⁵Of Au li'u ki na'ko Au humak onle Au li'u ulali hi bia ma hi benu sin, to Israel.”

¹⁶UISNENO nakua In a'an nak, “Yeremia, kais hom onen toti neu atoni-atoni le i. Kais amtoti babat ai amonen toti neu sin; kais museke Kau, natuin Au ka lomi fa he nen totis nane.

¹⁷Ho mit mulali sa' le sin anmo'e anbi kot-kot Yehuda ma anbi lanan-lanan anbi Yerusalem!

¹⁸Li'ana-li'ana sin nabua' hau hopit, ma atoni anmone sin nahopi ai ma bife-bife sin anselo ut hen mo'e utunu' neu uisneno teta bife le sin nakanab nak Fetnai Neno. Ma neu he namenab Au nekak sin natulu amsa tua nim kase in oen neu uisneno teta bian.

¹⁹Mes namneo-namneo, ka Au fa esle' sin namenab, mes sin namenab sin aokenu talan te sin anmae.

²⁰Au, UISNENO Alatan Amnanut Kau, of Au usanut Au to'as maputu neu ume luli besa le i, neu atoni ma mu'it, ma neu ale hau amsa ma neu pah i afan. Au to'as nane of anpin anfin-fin on ai le kan sifo nabe'i fa.”

²¹UISNENO nakua In a'an nak, “Hoi Au nonot, hi mihin neu fua tulu le hi motu anbi baki tulu mes motu mani talan te oke anfini, ma fua tulu bian nabe'i hi miah mani. Mes Au, UISNENO ukua Au a'ak, neu hi miah mani nai ok-oke.

²²Leka Au upoitan hi amaf sin na'ko Mesir, Au ka fe fa lekat lulut neu sin antom fua tulu mnotu ai fua tulu bian anteni.

²³Au al uplenat sin neu he na'ki neu Kau he nati' Au fani sin Uisneno, ma sin anfani Au nonot. Au lelu sin hen moni natuin ale Au plenat sin he nati' sin napeni ua alekot.

²⁴Mes sin kan lomi fa he nen ma natnin ma kan lomi fa he natuin. Mes sin natuin kun sin lomin anmese le nakfatu ma amle'ut nane. Sin kan fani fa alekot anteni mes sin anfani kun amle'ut nesin teni kun.

²⁵Na'ko hi amaf sin anpoi na'ko Mesir talan te neno i Au sonu piut Au ate-ate sin, ale Mafefa knino, neu ki.

²⁶Mes katit fa neu he nen sin ai hen simo sin. Mes anesi na'ko nane hi minak fatu bainesi ma moni ambi amle'ut anesi na'ko hi amaf sin.”

²⁷Oke te UISNENO nakua In a'an nak, “Es nane te, hoi Yeremia, maski ho muton ale lasi nane ok-oke neu Au to, sin kan simo fa ale ho uab sin. Maski hom boin sin, of sin ka natae ko fa.

²⁸Es nane te, muton nai neu sin namneo sin le nane uf mese le kan lomi fa he na'ki neu Kau, sin UISNENO. Sin kan lomi fa he nanoina na'ko kasat le sin naben nalali. Sin lasi ki'at neu Kau namneku nalalien, fun sin ka na'uab anteni fa.”

²⁹UISNENO nakua In a'an nak, “Hoi tuafen Yerusalem, him kul ma amkae nai! Am eu mani hi nakam funu sin ma ampolin sin nai! Amsi nai sit kae koli anbi nuaf-nuaf sin tunan, natuin Au, UISNENO, Au fe uto' ma tite ulali ki ok-oke.

³⁰Atoni Yehuda antao ma anmo'e nalali amle'ut. Sin le'u-le'u mahuma le Au ka lomi fa sin le nane sin antao nalali anbi Au Ume knino, talan te nalahi nani.

³¹Baki tulu mese in kanan Tofet sin nahakeb nalali anbi Nonof Hinom neu he natulu sin anah-anah sin on fua tulu mnotu. Au ka lelu it fa sin hen tao ma anmo'e lasi nane, ma nesi na'ko nane lasi masan onle nane kan moni fa anbi Au tenab.

³²Es nane te of antia in neno amnemat bale nane kan tek anteni fa nak Tofet ai Nonof Hinom, mes antek nak Nonof Malolot. Bale nane of anfani bale nitu nate natuin kan mu'i fa bale bian anteni.

³³Sin aon nitu of anfani kolo in amnahat ma mu'it amaufinut sin, katit fa es hen li'u sin.

³⁴Pah i of anfani pah hufui. Hanaf amlilat ma amoket ma hanaf fesat kabin of Au usnasab ani sin anbi kot-kot Yehuda ma anbi lanan-lanan Yerusalem.