Read Uab Meto YEREMIA 8 Bible Online

YEREMIA 8 - Uab Meto bible

YEREMIA 8

¹Anbi batan nane nuif-nuif na'ko ale kesel sin ma ale ana' aplenat anbi Yehuda, onane amsa nuif-nuif na'ko Ana' fuat knino, Mafefa knino, ma tuafen bian anbi Yerusalem of napoitan sin na'ko sin nitu nate,

²ka neu fa hen bubun sin ma ansub sin anfani, mes hen polin sin neu nain on maklafu. Nuif-nuif na'ko atoni-atoni nane of nasitbon ma nasan'on anbi manas, funan ma afkun-afkun le sin nausi neune, le sin nek ma namnau, antuthae, nabes, ma antoti fainekat na'kone.

³Ma atoni-atoni le anmoni na'ko uf amle'ut i le Au usitab ma usana sin neu me-me sin of anlomi hen mate na'ko sin hen moni. Au, UISNENO Akuasat Afinit, ukua ulali Au a'ak.”

⁴UISNENO anlelu kau uton on i neu In to, “Kalu atoni anbel, in of anfen anfani anteni, ma kalu atoni anseke anbi lanan, of in anfani nem.

⁵Mes nansa' hi, Au to, him beo piut-piut ma misaitan Kau? Hi amna' mihel neu hi le'u mahuma, ma kam lomi fa hem fani aim neu Kau!

⁶Au nen ulali lek-leko, mes hi ka miuab fa nok amneot. Katit fa es na'ko ki hen au in mo'et amle'ut. Katit fa es he na'uab nak, ‘Au usanab sa' ka?’ Hi mese-mese mituin kim hi lanan anmes onle bikase naen antam neu makenat.

⁷Kolo tu, kolo sonbiko ma kolo kiko amsa nahine in tabu hen baina neu balan. Mes hi, Au to, hi ka mihin fa Au plenat-plenat sin le Au fe neu ki.

⁸Hi matani le'uf ki talan te miuab mak hi nek amanoet ki, ma hi mihin Au plenat-plenat sin! Amkiso mit onme nok ale Au plenat-plenat sin le nane ale ahin sulat knino nakaf ka amneot sin nate'un nani!

⁹Ale hi ahinet sin anbi hi sonam hi atnanam of namaeba sin. Sin nekan of namneku ma nanuka. Sin kan lomi fa hen simo Au fainekat neu mahine sa' ka es fe nabala anbi sin?

¹⁰Es nane te sin lene of Au fe ani neu afu tuaf a'teta, ma sin fenai sin neu atoni teta. Sin al-al sin, anaet abaut, sin nami mnisat nok lanan ka amneot fa. Fun nesi na'ko nane Mafefa knino ma Ana' fuat knino sin anfuli ma anpaitan to.

¹¹Papa'-papa' na'ko Au to sin nane sin natenab nak papa' an-ana'. ‘Ah, ka sa'-sa' fa,’ sin na'uab nak, ‘leko ok-oke ma tainine.’ Mes namneo-namneo kahaf.

¹²Hoi Au to, namneo-namneo hi mes he mae natuin him tao ma mo'e milali ale lasi amle'ut le nane! Mes hi hum mafaun ki ma ka mae mihin fa. Es nane te hi of ambel onle atoni bian le anbel nalali; hi monim of namsopu leka Au kas ki. Au UISNENO Kau, ukua ulali Au a'ak.

¹³Au sinmak le'uf he nibun ubuab Au to onle atoni anibun in lene afan. Mes, Au to onle tua min kase ma bub fua mina le ka nafua fa, in non ok-oke anmaknene nalalien. Es nane te Au ufetin ulali atoni anao amnemat he nem ma naplenat sin pah. Au, UISNENO Kau, ukua ulali Au a'ak.”

¹⁴Uisneno In nonot sin na'uab nak, “Nansa' hit kat mo'e fa sa'-sa' ka? Aim nai hit al-al kit bua-bua tatnani neu kot-kot mabaki lape sin, maut nai hit atmate atbi nane. Hit UISNENO nafek nalali nak hit mes tamle'u. In anfe nalali neu kit laso he hit tinu natuin hit tasanab talalien neu In.

¹⁵Ka maota fa hit tafnekan lasi halan ma tabu neu he naleko kit, natuin le hit atmoni atbine al lasi mafena ma matani.

¹⁶Musu nem antia nalalien anbi kot Dan; hit atnen talali sin bikase sin hanan, ma kot namtau ok-oke. Musu in nem naskuku nale'un hit pah ok-oke, onane amsa hit kot ma tuafen ok-oke.”

¹⁷“Ampanat nai!” UISNENO nakua In a'an nak, “Tabu le i Au sonu neu ki ale kaun koko anbi hi sonam hi atnanam, neu hen sau ki, kaun koko malaso le in sunin nane ka mahina fa.”

¹⁸Au nekak maheli ma namen anmate, au nekak nasusbon ma ka naleko fa.

¹⁹Amnen nai! Anbi pah ok-oke han kaet ma anbait anaek na'ko au nonot le sin natoti nak, “UISNENO ka es fa Sion anteni ka? Tabu i sin kesel nane esme ka?” UISNENO sin kesel natae nak, “Nansa' ho mululi ma mubes neu ale uisneno teta le namneo-namneo ka maota fa? Nansa' ho mumenab Au nekak natuin ho mululi ma mubes neu ale le'u mahuma?”

²⁰To Israel anhunun nak, “Tabu abul ma tabu fauknais anfini nalalien, mes fe ka nafetin kit fa amsa.”

²¹Au nekak namen natuin au nonot namen anaek; au kul ma kae ma au nekak namle'u.

²²Sa' es antao ma anmo'e talan te au nonot antia tabu le i fe ka naleko fa? Ai anbi Gileat ok-oke, kan mu'i fa apalolit ai kan mu'i fa le'u?