Read Uab Meto YEREMIA 9 Bible Online

YEREMIA 9 - Uab Meto bible

YEREMIA 9

¹Naleko nesi kalu au nakak on oe hela le oe nahenu, ma au matak on oe tulu le ansai piut! Ma nabe'i au kae fai manas, au kae neu atoni-atoni na'ko au nonot le musu namate sin.

²Kalu onle anbi pah hufui au upeni bale snasat neu atoni anao lanan! Ma au of usaitan au nonot sin ma au aen eu bale nane he au u'lo u'ko sin. Sin al sin a'aneb ok-oke, atoni pukan mese le ka na'ki fa,

³ma nabalbon piut neu he namoe. Anbi pah ok-oke, lasi amneot kan mu'i fa kuasat, al lasi ka amneot es naseke'on kun. UISNENO nakua In a'an nak, “Au to anmo'e lasi amle'ut ka nasnas nahin, sin ka nausi Kau fa on sin Uisneno.”

⁴Neu biaf ma benuf, es-es hen panton ma olif tataf amsa kan mafnekan fe es nok es. Natuin, onle Nai Yakub onane amsa sin, es-es anfuli kun in biaf in benuf. Es-es in nao neu me-me he na'uab nale'uf es in kanan ma anmo'e.

⁵Sin al-al sin anfuli ma anpaitan es nok es, katit fa es he na'uab nok amneot amnonot. Sin fefan lo fef mo'el kun, sin ka nabe'i fa he nasaitan sin sanat. Lasi amle'ut neu lasi amle'ut, lasi mafulit neu lasi mafulit sin antao ma anmo'e piut-piut, namneo-namneo sin antite UISNENO.

⁷Es nane te UISNENO Akuasat Afinit nakua In a'an nak, “On noni molo, of Au su' Au to sin he nati' sin anfani knino. Sa' anteni ka es Au he mo'e neu Au to le antao ma anmo'e nalali amle'ut ka?

⁸Sin uab sin molok lo matani, nabe'i namate atoni onle as'anef malaso. Sa' le sin na'uab ma namolok nane mo'el ok-oke. Sin uab sin molok meunana ma anfutu nekaf, mes namneo-namneo sin natetu kleot.

⁹Ait neu uf masan onle i of Au ka fe ani fa kasat anmatom nok sin monit ka? Of Au seunbanin sin taos sin mo'et; Au, UISNENO Kau, ukua ulali Au a'ak!”

¹⁰Au, Nai Yeremia kau, au u'uab nak, “Au he kae ma kul natuin hun ma naba anbi mnela hufui ma anbi ale tubu anmeto anmate ok-oke talan te atoni ka nao nokan fa. Mu'it sin hanan kat nen ateni fa anbine, kolo ma mu'it-mu'it bian anteni naen namneku.”

¹¹UISNENO nakua In a'an nak, “Yerusalem of Au mo'e ma anfani fatu tutnae bale asu fui natolo' anbine. Kot-kot Yehuda of namne, bale le of ka natua nani fa.”

¹²Au utoti ak, “Koi UISNENO, nansa' Ho mufetin pah le i hen hufui ma anmeto onle mnela hufui talan te katit fa es he nao nokan? Ai anmu'i mahine neu he nahin ale lasi i ok-oke? Ho mu'uab ale lasi nane neu sekau ka he nati' in natiaba nani neu atoni bian anteni?”

¹³UISNENO natae nak, “Ale lasi nane anbol natuin Au to sin kan simo fa ale Au plenat sin le Au fe ulali neu sin. Sin ka na'ki neu Kau fa, ma ka natuin fa Au plenat sin.

¹⁴Sin nakan fatu ma nabes neu ale le'u mahuma Baal onle sin amaf sin nanoina sin.

¹⁵Es nane te, amnen nai sa' le Au, UISNENO Akuasat Afinit Israel, le of Au mo'e ani: of Au fe neu Au to sin mana' ma luat menu he nati' sin nah ma laso he nati' sin ninu.

¹⁶Of Au una'at ani sin neu uf-uf le sin ka nahin fa sin ai le sin amaf sin ka nahin fa sin amsa. Of Au sonu solalus piut neu sin hen ken sin talan te Au ule'un ani sin ok-oke.”

¹⁷UISNENO Akuasat Afinit nakua In a'an neu In to nak, “Amkiso nai sa' le fe anbol anbi pah le i, ma amnao nok manoe amboin nai ale akaet sin. Amlelu sin hen nem ma sin ansi sit kulut kaet nai.”

¹⁸Atoni Yehuda sin nak, “Amlelu sin nok manoe he sin si sit kulut kaet neu kit ok-oke, he nati' hit matnu ansai napete hit a'kunkunuk.”

¹⁹Anbi Sion anmu'i han kaet, “Hit tamle'u ma namaeba nis kit. Hit mes tasaitan hit pah, hit ume-ume sin naskuku ma ansiksakenon.”

²⁰Au ak, “Amnen nai a'an UISNENO, hoi bife ok-oke! Neu hi anfeto sin minoina sin sit kae koli knino, neu hi bia ma hi benu sin minoina sin sit kulut kaet.

²¹Lasi maten antam nalali nao nok eno kiso, ma nape' ma antam nalalien neu sonaf nanan; in anheke ma anpisu ale li'ana anbi lanan ma atoni munif sin anbi bale mnela.

²²Sin aon nitu nasan'on anbi me-me on le maklafu anbi nain; on le ane kase le anlefi nalali oke te nasaitan ma ka nabuab anteni fa. Nane han ba'an UISNENO le of au etun ma uton ani.”

²³UISNENO nakua In a'an nak, “Atoni mahine ka nabe'i fa nanaeb in nekan natuin in nekan amneot, atoni abe'it natuin in be'in, ma atoni amu'it natuin in a'mu'in.

²⁴Sekau he nanaeb nekan neu sa'-sa' es, mes so nanaeb nekan nak in nahin Kau ma nahin nalek-leko Kau; in nahin nak Au nek umnau talan te nabal-bal ma Au uhelan plenat ma amneot anbi pah-pah pinan. Ale lasi nane ok-oke ahalin Au nekak. Au, UISNENO Kau, es uton ale lasi nane.”

²⁵UISNENO nakua In a'an nak, “Of anbi neno nane Au fe kasat neu atoni Mesir, Yehuda, Edom, Amon, Moab, ma tuafen mnela hufui le sin eu napalan sin nakan funu. Ma anhapi ma anheli sin papmese on atoni Israel, mes he neu sin ai he neu Israel anmo'e sin on atoni-atoni le kan hapi ma kan heli sin, natuin sin ka natuin fa lasi manta'en le anfani taka' natuin lasi le anhapi ma anheli sin nane.”