Read Uab Meto RATAPAN 1 Bible Online

RATAPAN 1 - Uab Meto bible

RATAPAN 1

¹Anbi ahunut kot Yerusalem nane nahenu nok ale lasi malinat, mes tabu le i Yerusalem in luman kun. Anbi ahunut kot nane antom mat anbi pah-pah mes tabu le i anfani onle bife banu. Anbi ahunut kot nane mateka kun, mes tabu le i in anfani ate.

²In ankae ma ankul anbi fai teme, in matnu ansai natuin in kun-kunun. Kan mu'i fa es na'ko le in nek nani sin anlomi hen halin in. In sob leko sin nasi'u in ma sin nabain'ok anfani musu neu in.

³Atokos abit Yehuda nasaitan sin pah natuin sin maaten ma sin anmoni anbi nukat. Tabu le i sin namaika anbi ale pah sin atnanan kan mu'i fa bale hen fe neu sin halan ma malinat. Musu anfun nan sin tabu sin antam anbi nukat.

⁴Anbi ale neno naek kan mu'i fa es he nati' nem neu Ume Uisneno. Fetnai-fetnai asit sin nanukbok, ma ale Ana' fuat knino sin anmoni nok nek as unu. Kan mu'if atoni anbi eno naek, kaet kulut an amu kot Sion.

⁵Ale musu sin namlilan natuin sin es naplenat in. UISNENO es nanukab in, natuin in sanat sin namfau. Ale atokos anhek sin ma antahan sin ma neki sin neu bale polin.

⁶Alekot neu Yerusalem anfani on etus tabu ahunut. Ale atopus an olen onle lus le namnah. Ma sin kan mo'e fa sa'-sa' neu musu le anli'u natuin sin.

⁷Tabu namle'u ma nukat antom, sin namnau Yerusalem anbi neno ahunut tabu in mu'in ma in amaus fe namfau; mo'e onme talantia in atokos sin anmofu anbi musu in niman, ma kan mu'i fa esle' he nem hen tuntaku sin. In musu sin anmanis in tabu sin nit in naskuku.

⁸Yerusalem es nale'un in aon anmes kun natuin in mo'e sanat namfau ma neki hainisit. Al sin le anbi ahunut nabes neu in, tabu le i sin nasi'u in natuin in monas. In an ole, natuin namaebon.

⁹Hainisit nane natonon mat-mat mes in kan filoli fa neu sa' es of anbolan in aon. Es nanet in anmofu nok a'naek, mes kan mu'i fa es hen halin in. Es nanet in toti tuntakus ma fetin na'ko UISNENO, natuin in musu sin anbe'u nalali.

¹⁰Ale in amaus in musu sin nasik nani. In antok ma ankiso sin leka sin antaman neu Ume Uisneno, taos ma mo'et mese le UISNENO kan lomi fa atoni le in ka maso'ik fa anfani In to.

¹¹Nok susal ma nukat in atokos sin nami mnahat, bale maupa sin anseka neki utunu', al natuin he nati' sin anmonin ma kais sin anmaten. Yerusalem ansakoi, “Koi UISNENO amtae kau fe, amnen ale au nukat sin.”

¹²“Hoi atoni-atoni le a nao natuin lanan amkiso nai ma ampanat nai! Ai hi mieku mok aten onle tabu le au tam a'bine, aten le UISNENO anfe nani neu kau, natuin to'as a'naek neu kau?

¹³In nasanut ai na'ko neno tunan he notu au nekak. In antao kle'o anbi au matak he nati' au mofu ma utsel. Ma In nasaitan kau mes anbi nukat ma'ne'at anbi neno teme.

¹⁴In nibun ale au sanat sin ma anfut sin anfani mese, ma In naboni sin neu au to'ak talantia in mafenan nane naoleb kau. UISNENO nana'at kau neu au musu sin; talantia au ka ube'i fa he laban sin.

¹⁵UISNENO na'baub ale au meo pae abe'it sin. In natam solalus he nati' ale au atoni munif sin namle'un. In anteli au pah tal naskuku, onle atoni anhabi tua min kase.

¹⁶Lasi nane es anmo'e kau tal au matnu ansai, kan mu'i fa hen hatani ma anhalin kau. Au nonot naneku ale sa'-sa', natuin musu es naplenat a nes.

¹⁷Au aiti au nimak ma toti tuntakus, mes kan mu'i fa es hen halin kau. UISNENO anfe musu anfun natef kau; sin nem ma anmaken nok kau. Sin anmo'e kau anfani maklafu, bale le nahenu nok hainisit anbi sin atnanan.

¹⁸Mes UISNENO nane amneot kun, natuin au tanhai In plenat. Amnen neu kau hoi ale pah-pah, mail kau anbi au nukat in nanan. An munif atoni ma bife anpo' sin ma neki sin neu bale mapolin.

¹⁹Anhaman au sob leko sin ma nasi'u kau. Ale Ana' fuat knino ma ana' plenat sin anbi pah anmaet nalali anbi lanan-lanan kot. Leka sin nami mnahat neu monit.

²⁰Koi, UISNENO! Ampanat kau, au nekak an ole ma au matak naskuku natuin au bulalut sin anbi tabu ahunut. Anbi ale lanan anmu'i malolot, ma anbi ume-ume anmu'i maten.

²¹Koi, UISNENO! Amnen au sakoit, kan mu'i fa esle' anhalin kau. Au musu sin namlilan, natuin sin nale'un kau. Neno le Hom ta'en kau neune nane anbol; ma of Ho munukab sin onle au.

²²Ampanat sin maufinu ma mo'e sin onle fun Ho mo'e kau, natuin ale sanat le au mo'e ulali sin neu Ko. Anbi nukat in nanan au unoi, kul ma kae ma us unu.”