Read Uab Meto RATAPAN 2 Bible Online

RATAPAN 2 - Uab Meto bible

RATAPAN 2

¹UISNENO anmo'e ale lasi nok nek to'as, mesokan an aumnan Sion. Israel in alekot le amnanun on neno, mapolin nalali neu pah pinan. Anbi tabu UISNENO nato', In of ka nail fa ume abit Sion amsa.

²Ale mnela hufui anbi pah Yehuda In naskuku sin ma of ka namofu In nekan. Ale baki lape le anpanat pah nane sin anbi In to'as nanan. Atopus anbi pah ma sin plenat In namofu nani ma nasi'u sin.

³Anbi In to'as le anpin, In naipu Israel in matanin, anbi tabu musu an mauna sin, In kan lomi fa hen tuntaku sin. Onle ai in pinan le nale'un ale sa'-sa', onane amsa UISNENO In to'as neu kit.

⁴Onle musu In nakbetab In aklaot ma In sa'anef nane nalulu neu kit. Ale atoni le anhalin hit nekak In namate sin. In napoitan In to'as onle ai neu kot Yerusalem in nanan.

⁵UISNENO nabain'on manfani musu, In antepo Israel talantia anmofu. In naskuku ale baki lape ma sonaf, ma In ansato anteni susal ma nukat neu atokos anbi Yehuda.

⁶In naskuku In ume bale In to sin niubnok ma naluli nabes neu In. In nanikab ale atoni neu Neno Snasat, ma neno naek sin. Natuin UISNENO In nek to'as, es nanet In antite ale Ana' fuat knino ma kesel.

⁷UISNENO antite In baki tulu le knino kun, ma nasaitan In Ume anmeskun; ma nafetin In musu sin le natseleb In baki lape sin. Anbi bale hit taluli ma tabes, ma tabua atbine anbi neno ahunut musu sin na'ba' nok malinat.

⁸UISNENO nafek nalali nak ale baki lape anbi Sion so taseleb tani sin. Baki lape sin nane maleti nalali, he nati' tasitab tani. Baki lape ma el fatu sin nane tabu, le i anfani fatu-fatu mapolin.

⁹In eno naek sin makuba neki afu, ale sin hau eka sin nam ipun. Ale kesel ma ana' plenat sin es bale mapolin. UISNENO In aplenat ka nanoina fa anten; ma ale Mafefa knino kan simo anteni fa mnitas na'ko UISNENO.

¹⁰Ale amnasit anbi kot nanan antokon anbi afu; sin na'pehen afu anbi sin nakan, ma nabluaok neki kalo anfani takaf kaet kulut. Ale li'feto munif sin naluli sin nakan antia afu.

¹¹Au matak anfu'un natuin au ka usnas fa anbi kaet, ma au smanak naoelbon. Au nekak naskuku leka au kiso pah nane nasitbon, ma au it ale li'ana ma li'ansusu sin anfaineun anbi lanan-lanan kot nane.

¹²Sin nahaebok anbi kaet he napeni mnahat ma mninut na'ko sin ainaf. Onle atoni napapa' sin natsel anbi lanan-lanan ma sin anmaten anbi sin ainaf in aifan.

¹³O Yerusalem, Kot Sion le au nek ani, ho le'um nane onle noe tasi. Au of umolok ak sa' ka he nati' eki halinat neu ko? Natuin kan mu'i fa esle' antam anbi nukat onle ho. Namneo ka tit fa es he naleko ko.

¹⁴Al lasi fulit ma poi es Mafefa knino, sin naton neu ko. Sin ka naton fa ho sanat sin, he nati' ho mupis. Al sin naton uab-uab poi le namin neu ko.

¹⁵Ale atoni le nao natuin nane sin nasi'u ko natuin ho muskuku mulali. Sin anki'un ma namolok nak, “Nane kot amasat, ma kot le atoni pah pinan nanaeb in?”

¹⁶Ale ho musu sin ankiso ko nok nek to'as, sin anmanis ko ma antamis sin lulun. Ma sin namolok nak, “Kot nane hai mitseleb milali! Es nane in tabu le hai ampao lo antia nalali!”

¹⁷UISNENO nasanut nalali snama le In ansali nani anbi ahun-hunut ma le In namnauba kit neune. In nale'un kit ka nok fa nek manekat, ma In anfe mnisat neu hit musu sin. In namlilab sin leka sin nit atmofu.

¹⁸Hoi ale baki lape abit Yerusalem, misaeb hi sakoit neu UISNENO! Misaib hi matnu onle noe ansai fai manas. Amkae piut ma kais misnas talantia amhae.

¹⁹Amfen piut anbi fai teme he nati' muton ho nek salit neu UISNENO. Amtoti he nati' In nek mamun neu ho anah sin le anmofu anbi amnahas ma le matan anfain anbi lanan in atnanan.

²⁰UISNENO amkiso ma ampanat sin le Hom hamu'i sin! Ai anmu'i le Ho mo'e onane ka? Ainaf mese nah nani in anhoni le in nek nani, Ana' fuat knino ma Mafefa knino sin malolo anbi Ho Ume knino.

²¹Mnasi ma munif sin anmaten ma mapolin anbi lanan, munif bife ma atoni anmate natuin suni, anbi tabu Ho muto'an sin. Hom lolo sin ka nok fa manekat.

²²Hom hone ale musu le hai mimtausan sin, he nati' nabua nok bulalut anfun natef kai, sin namate sin le hai ampafa ma amnek sin. Kan mu'i fa esle' he naen anbi neno Ho musanut Ho nek to'as.