Read Uab Meto RATAPAN 3 Bible Online

RATAPAN 3 - Uab Meto bible

RATAPAN 3

¹Au le i atoni le tamis ulali manukat natuin Uisneno In to'as antoman kau.

²Maski nak au u'lo ulali, anpolin natam kau anbi bale mesokan in nanan.

³In antepo kau piut ka nok fa nek manekat anbi neno teme.

⁴Au aok le i nahenu nok papa', ma au nuifenu nat ipun.

⁵In nasanut susal ma nukat anfun natef kau.

⁶In naseke kau he umaika ubalah mesokan in nanan onle atoni amates anbi neno ahunut.

⁷In anfut namepan kau neki kolen besi, talantia kan mu'i fa lanan he nati' au poi.

⁸Au sakoi ma toti tuntakus me Uisneno ka natae kau fa.

⁹In an eka au lanan sin neki baki lape.

¹⁰In anpao kau onle asu fui, ma in naekab kau onle meo asu.

¹¹In anli'u natuin kau talantia au beo na'ko lanan ma in pisu kau ma in nao nasaitan kau.

¹²In nakbetab in aklaot, ma anlulun in sa'anef neu kau.

¹³In sa'anef napisu au aok ma napisu au tekak.

¹⁴Ale atoni anmanis kau anbi neno teme; ma nalali te sin naslaet kau.

¹⁵Al amenut In anfe nani neu kau hen fani au mnahat ma au mninut.

¹⁶In anfonan au humak neu afu, ma au nisik natutu'on anbi fatu talantia namipun.

¹⁷A'lo au fe ka tamis it fa malinat; ma au nikan neu amlilat nane in onme ka?

¹⁸Au ka mateka kau fa anteni, au fnekat neu UISNENO namneku nalali.

¹⁹Leka au utenab neu au mapolin kau ma snama le antoman kau namnes onle tah laso le menu.

²⁰Au utenab lasi nane piut, tal au nekak nasunu.

²¹Maski onane au fnekat anfen anfani, leka au umnau lasi le i.

²²UISNENO In manekan nane of tal nabal-bal, ma In matakun nane of ka namsopu nit fa.

²³Ma nafe'un piut anbi nok-noka, namneo In matakun nane na'ki nabalah.

²⁴UISNENO nane au maus. Es nanet au ufnek al neu In.

²⁵UISNENO anmo'e alekot neu atoni le nafnek neu In, ma neu atoni le nami In.

²⁶Es nanet hit atpao nok nek amneot tal UISNENO nem ma anfe kit tuntakus.

²⁷Maut he nati' hit tanoina he talan anbi tabu hit fe munif kit.

²⁸Anbi tabu UISNENO anfe ma'ne'at neu kit, so leko hit atoko atmes ma ata'.

²⁹So leko hit tabaunok ma tana'tok, natuin oni fe anmu'i fnekat neu kit.

³⁰Maski nak antepo ma nasi'u kit, so hit atsimo ale lasi nane.

³¹Natuin UISNENO of kan tita kit fa tal nabal-bal.

³²Leka In anfe nalali ma'ne'at, In of anfe In matakun, natuin In anah kit nabalah neki In manekan le kan mu'i fa in tu'an ma in ekan.

³³In of ka nafetin kit fa he tam piut anbi susal ma nu'ut.

³⁴Leka sin antamni hit smanak anbi po'an

³⁵leka hit taneku hit ini le UISNENO anfe nani neu kit,

³⁶natuin sin naklelo amneot, namneo UISNENO of nahin in ma of anpanat nani.

³⁷Leka UISNENO kan lomi fa sa', namneo mansian of ka nabe'i fa hen mo'e sa' neune.

³⁸Alekot ma maufinu hit tanaob al natuin kun plenat UISNENO.

³⁹Nansa' es atoni ansakoi leka ankas in natuin in sanat sin?

⁴⁰So leko hit atae hit monik, ma ta baina ok atfani teu UISNENO abit neno tunan. Aim he atfai hit nekak ma at onen ma at onen,

⁴¹

⁴²“Hai misanab ma amlaban Ko, koi UISNENO, ma Ho kam fe kai fa sako sanat.

⁴³Hom li'u mutuin kai ma mumate kai, Ho mu'tolo' ma am amu Ho matamkum anbi Ho to'as in nanan.

⁴⁴Ho nek to'as nane onle nope ametak, talantia hai onen sin kan tia Ko fa.

⁴⁵Ho mo'e kai onle maklafu anbi pah pinan sin matan.

⁴⁶Hai musu sin naakan ma anmanis kai;

⁴⁷amle'ut ma maten antoman kai, ma hai moni anbi maten ma amtaus.

⁴⁸Au matnu ansai onle noe natuin naskuku nani au pah.

⁴⁹Au of ka usnas fa anbi kaet ma kulut,

⁵⁰talantia Ho, koi UISNENO abit neno tunan, ampanat kai.

⁵¹Au nekak ankul leka au ail monit ale fenai anbi hai kot.

⁵²Au musu sin anli'u natuin kau onle kolo, ma sin an un sin to'an neu kau nok kan mu'i fa sanat.

⁵³Sin anpolin natam kau neu oe nopu ma na'tuni kau neki fatu.

⁵⁴Oe ansae antia au nakak ma au utenab, ‘Au monik of namsopu!’

⁵⁵Koi UISNENO, au toti neu Ko na'ko oe nopu amnanut in tu'an.

⁵⁶Au toti neu Ko he kais amsun Ho lukem neu au totis hem tuntaku kau. Onane te Hom nen au onen, ma Ho aum ampaumak. Ma Ho mukua a'am mak, ‘Kais mumtau.’

⁵⁷

⁵⁸Munoebom aum, koi UISNENO ma ampesi mok kau anbi au lasi, natuin Ho mufetin mulali au smanak.

⁵⁹Ho mit mulali maufinu le sin anmo'e neu kau, salit maufinu na'ko musu naunu sin to'an neu kau. Es nane, koi UISNENO, ampesi mok kau anbi au lasi.

⁶⁰

⁶¹Ho kum, UISNENO, es amnen sin akan ma si'u neu kau; Ho es muhin ale sin salit neu kau.

⁶²Sin nami lanan neu kau anbi neno teme; ma sin natenab salit amle'ut neu kau he nati' nameta kau.

⁶³Sin anmanis kau na'ko nok-noka antia neno anmabe.

⁶⁴Amkas sin, koi UISNENO namnes nok sin taos sin mo'et.

⁶⁵Amsukat sin, ma mufetin sin anmoni anbi nukat ma susal in nanan.

⁶⁶Amli'u mutuin sin ma mumate sin talantia sin namneku na'ko pah pinan.”