Read Uab Meto RATAPAN 4 Bible Online

RATAPAN 4 - Uab Meto bible

RATAPAN 4

¹Mnatu alimat namsab nalali, fatu-fatu anbi Ume Uisneno mapolin anbi lanan.

²Anbi ahunut ale munif anbi Kot Sion onle mnatu maupa mes tabu le i anmo'e sin anfani onle nai' le anmo'e na'ko afu.

³Mes asu fui nasusu in ana' mes Au to sin anbulalun onle kol to'am mnanu anbi paha snaen.

⁴Ale li'ana ka masusu fa, talantia sin anmaten natuin meno. Ale li'ana sin antoti mnahat mes kan mu'i fa es hen fen sin.

⁵Sin le anbukae mnahat aminat, ma anmoni nok malinat, tabu le i naknama ma nami mnahat anbi knutu in buan, ma anmaten natuin amnahas, anbi lanan-lanan.

⁶Au to napeni kasat nalalien ma mafena nesin atokos abit Sodom le noka smela sin namle'un natuin Uisneno In kuasat ma mansian ka nokan selo fa.

⁷Anbi ahunut hai atopus sin nane nek muti kun onle ab muti. Sin amatanit ma abe'it, namlia ma an aominan.

⁸Mes tabu le i sin human metan nesin a'tasu, ma anpolin anbi lanan-lanan ma kan mu'i fa es he nahin sin. Sin pasu a nunuon anbi nuifenu, onle hau ametos.

⁹Sin ansutai ma'ne'at ma anmate na es ok, natuin sin kan mu'i fa mnahat. Amates anbi makenat maupa nesin le anmate natuin amnahas.

¹⁰Snama nane nae le'uf kun le antoman Au to talantia ale ainaf-ainaf le nek amalulet nahan in anah anmes he nati' in an bukae.

¹¹UISNENO nasanut In to'as ma notu Kot Sion namnel nok afu.

¹²Anbi ale kesel ma atokos anbi pah pinan kan mu'i fa es hen palsai nak eno-eno naek Kot Yerusalem of musu nao natuin.

¹³Mes lasi nane anbol nalali, natuin susat na'ko Ana' fuat knino ma Mafefa knino. Sin naopan nalali na' na'ko atoni le ka nasanab fa.

¹⁴Onle atoni afolot in nao natuin lanan onane amsa neu atopus-atopus anbi Kot Yerusalem. Sin bale pake sin nahenu nok na' talantia kan mu'i fa es hen haumak sin.

¹⁵Atoni namolok nak, “Amnao mu'ko i! Hi mi hainisin, kais ampoe kai!” Es nanet sin nao ma antam na'ko pah nao neu pah, mes es kan fen sin fa sona he nati' namaika anbi nane.

¹⁶UISNENO kan panat anteni fa In to; In es nasitab sin, ma anmo'e ale Ana' fuat knino sin ka maupa fa; ma ale atopus-atopus kan mu'i fa nek manekat.

¹⁷Haim hae leka haim kiso meki hai matam es nanet haim pao tuntakus le ka nem nit fa. Hai mifnek neu tuntakus na'ko pah mese, le namneo kan fe kai fa sa'-sa'.

¹⁸Hai ka mibe'i fa hem poi neu lanan, natuin musu natnu' kai piut, hai monim anhaumak he namsopu natuin hai neno monit sin namtis ma namno'u.

¹⁹Atoni le anli'u kau anmanoe nesin kaka tasi panis. Sin anli'u natuin kai anbi tubu ma an ek kai anbi mnela snaen.

²⁰Sin anhek nan sin kesel le UISNENO anbeti nani atoni le hai mifnek neune anfani afe honis, ma aneot ahafot anbi makenat.

²¹Hoi pah Edom ma Us, hi manis sin nai, mimlil nai leka hi mu'i tabu sona! Snama of nem neu ki amsa, ma natuin mafu tua of ho monas ho aom amsa.

²²Sion ansimo nalali in kasat natuin in sanat ma in mo'et sin; tabu le i of UISNENO ka nafetin kai fa ma of ka neki kai fa amtam neu bale mapolin. Mes ho, hoi Edom, UISNENO of ankas ko. Ma ho sanat of natonon.