Read Uab Meto RATAPAN 5 Bible Online

RATAPAN 5 - Uab Meto bible

RATAPAN 5

¹Mumnau kai, koi UISNENO, neu sa' le antoman kai. Amtae kai ma amkiso kai anbi hai nukat ma hai susal.

²Hai maus anmofu neu atoni bian sin niman, ma atoni anao mnemat es natua hai ume.

³Musu sin namate nalali hai ama; tabu le i hai aina anbanu ma haim fani li'anmanat.

⁴Oe ma hau mnotu nane haim sos mani.

⁵On mu'it mese maseke neu mepu mafena, hai mihaebom natuin kan fe neu kai fa tabu sona.

⁶Haim nao ma amfani atotis anbi pah Mesir, haim toti mnahat anbi pah Asyur.

⁷Hai na'i ma hai be'i nasanab nalali, tabu le i sin anmate nalali, mes of haim sutai, natuin sin sanat.

⁸Atoni sin naplenat kai namnes onle ate, ma kan mu'i fa es he naplenat ma nafetin kai na'ko sin.

⁹Ale atoni alolot sin nasitbok anbi kot in kotin; sin naeka hai smanam le hai mami mnahat.

¹⁰Hai mofu ambi amnahas, talantia hai pasum anmaput onle tunaf.

¹¹Sin anheke ma nale'un bife-bife abit Sion, ma nale'un li'feto munif sin anbi kuan-kuan Yehuda.

¹²Hai atopus-atopus sin anheke sin ma naboni sin, ma hai mnasi sin ka mateka fa.

¹³Ale li'mone munif sin anmepu anbi bale fole, ma ale li'anmone sin nameku sin natuin nasae hau tal sin matan anfain.

¹⁴Ale mnasi ka nabua anteni fa anbi eno naek, leku ma heo ka manena fa anbi atoni munif sin atnanan.

¹⁵Hai amlilat nane namneku; ale bso'ot maseka neki kaet kulut.

¹⁶Hai sobe honis nane namneku, hai mate milali natuin hai misanab milali.

¹⁷Tubu Sion nane masaitan ma luman kun; anbi nane asu fui in naom nem. Es nanet hai nekam naklati. Haim kae talantia haim kisot nanipu.

¹⁹Mes Ho kum, Ho es amkuas mubal, Ho es muplenat tal nabal-bal.

²⁰Nansa' es Ho musaitan kai lon onle i? Oni Hom nikan kai anbi ale tabu?

²¹Koi UISNENO mufani kai neu Ko; of hai mili' ma moebaniom neu Ko! Muleko hai monim on afi neno ahunut.

²²Ai Hom polin muneku kai? Ai Ho ka mumautu fa Ho to'am neu kai?