Read Uab Meto YEHEZKIEL 10 Bible Online

YEHEZKIEL 10 - Uab Meto bible

YEHEZKIEL 10

¹Oke te au kiso neu tobes le anli'on anbi ahake neno sin nakan nane, ma au it sa' es onle toko' na'ko fatu klima mate muti.

²Nalali te Uisneno nakua a'an neu atoni le anpake bale muti nane nak, “Amtam nai neu ale aklet haefen le anbi ahake neno sin haen ma meki ai flae nimaf mese. Oke te amkifun ai flae nane neu kot in nanan.” In natuin ma au kiso in.

³Leka in antam, ahake neno nane sin fe anhake anbi Ume UISNENO aon bian a'li. Nope pukan mese nahenu baki tulu abit nanaf ma Ume UISNENO ok-oke.

⁴Pina nalim le naton nak UISNENO anhake anbi nane anpoi na'ko ahake neno sin ma natnani neu eno tam neu Ume UISNENO, talan te baki tulu nane meusine ok-oke.

⁵Ahake neno sin ninen naslutu manena antia baki tulu abit mone, onle Uisneno Akuasat Afin-finit In hanan.

⁶Leka UISNENO anlelu atoni le anpake bale muti manula nane in naiti ai flae nimaf mese na'ko aklet haef ahake neno sin nane, atoni nane in antam ma anhake anbi aklet haefes in aon bian.

⁷Oke te es na'ko ahake neno nane in natam in niman neu ai le anbi sin atnanken, in naiti ai flae fauk, ma anfe neu atoni le anpake bale muti manula nane. Atoni nane in ansimo oke te in anao kun.

⁸Au it nak anbi ahake neno sin ninen nupun nane anmu'i sa' es onle mansian in niman.

⁹Au it amsa nak ahake nane sin mese-mese te anmu'i aklet haef mese anbi in aon bian. Aklet haef ha en nane sin papmese, ma anpin nalim onle fatu mate molo amasat. Es-es te anmu'i haef mese anteni le nakbaton anbi in atnanan.

¹¹Nok nane ahake neno nane sin nabe'i anao neu neno kaben ha sin. Ma sin nabe'i anao neu me le sin anlomi, ma ka naklelo fa sin aon.

¹²Sin aoken ok-oke, sin kotiken, sin niman, sin ninen ma aklet haefen amsa nahenu nok mataf.

¹³Au nen nak aklet haefen nane antek sin nak “anin nautus”.

¹⁴Ahake neno nane es-es te anmu'i humaf le ka papmese fa. Humaf ahunut nane humaf bijae, humaf pa' nua nane on mansian human, humaf pa' tenu on meo asu human, ma humaf pa' ha nane on humaf kaka tasi panis sin human.

¹⁵Ahake neno nane sin le afi au it sin anbi Noe Kebar ninen. Leka ahake neno nane sin nabloli ai nauf sin ninken, hen sae neu neno atnanan he naplel anao mat ai he nasnas, aklet haefen nane sin natuin, natuin ahake neno nane sin ankuas sin.

¹⁸Oke te meusine alimat nane le naton nak UISNENO anhake anbi nane nasaitan eno antam neu Ume UISNENO ma natnani neu ahake neno nane.

¹⁹Au kiso ahake neno nane sin nauf sin ninen ma naplel nasaitan nani oke sin anao, ma aklet haefen nane sin natuin. Oke te sin nasnas anhaumak eno naek Ume UISNENO anbi kabenan neno saen, mes pina alimat nabalah anbi sin fafon.

²⁰Au umnau nak nane ahake neno sin le afi au it sin anbi Noe Kebar ninen anfun natef Uisneno atoni Israel.

²¹Ahake neno nane sin es-es te anmu'i humaf ha, ninef pasan nua, ma sa' es amsa onle mansian in niman anbi sin ninen nupun nane.

²²Sin humken papmese amsa onle humaf-humaf ahake neno sin le au it sin anbi Noe Kebar in ninen. Mese-mese anao piut neu mat.