Read Uab Meto YEHEZKIEL 11 Bible Online

YEHEZKIEL 11 - Uab Meto bible

YEHEZKIEL 11

¹Oke te Uisneno In Smanan Knino naiti kau ma neki kau neu eno naek Neno saen anbi Ume UISNENO. Anbi nane au it atoni 25, anbi sin le nane anmu'i atopus to, esle' kanan Nai Yaazanya Nai Azur anmone na es te in kanan Nai Pelaca Nai Benaya anmone.

²Uisneno nakua In a'an neu kau nak, “Hoi mansian amates, le i atoni-atoni le natenab lasi maufinu anbi kot le i ma ma anfe fainekat le nasekeb.

³Es nane te mutiaba Au a'ak antom kasat neu sin, hoi mansian amates. Natuin sin naton nak, ‘Ka lo fa anteni ume-ume le i of hit tafena tafani sin. Kot le i anfani on nai' ma hit on sisi anbi in nanan. Hit of tapeni tainine na'ko ai in maunun natuin nai' in nanini kit.’ ”

⁵Nalali te Smanan Knino UISNENO nahenu kau, ma UISNENO anlelu kau he umolok neu to Israel ak, “Hoi to Israel, Au uhin sa' le hi mimolok ma le hi mitenab.

⁶Atoni amfau le'ufen le hi mimate milali sin, talan te lanan-lanan anbi kot nanan nahenu nok atoni aon nitu.

⁷Es nane te, Au, UISNENO Alatan Amnanut, Au ukua Au a'ak neu ki: Namneo, kot le i anfani nai' kun, mes sisi anbi in nanan ka hi fa, mes atoni aon nitu le hi mimate milali sin! Mes hi of Au li'u upoitan hi na'ko kot i!

⁸Hi mimtausan suni ka? Of Au fe nem neu ki atoni le neki suni he nati' anlaban ki.

⁹Au of eki upoitan ki na'ko kot ma Au una'at ki neu atoni, Au ufek ulali lasi maten neu ki.

¹⁰Of hi mate anbi makenat anbi hi pah in nanan, ma nok nane te hi mihin nak Au le i UISNENO Kau.

¹¹Es nane te, hi of kam tainine fa anbi kot le i, ka onfa sisi anbi nai' es in nanan. Au of a li'u ki ma Au kas ki he hi ambi bale me amsa anbi pah Israel.

¹²Ma of hi mihin nak Au le i UISNENO Kau ma Au kas ki natuin him tanhai milali Au lekat lulut sin ma hi kam sian fa Au plenat-plenat sin natuin hi mituin lasi plenat na'ko uf-uf le anhaumak ki.”

¹³Fe au umolok lasi nane, nok askeken Nai Pelaca in anbel ma anmate. Es nane te au amsa li'tu ma au koa ak, “Koi UISNENO Alatan Amnanut! Ai nesif na'ko Israel le i Ho he mumate sin ok-oke?”

¹⁴UISNENO nakua In a'an anteni neu kau nak,

¹⁵“Hoi mansian amates, ho ma ho biaf ho benuf sin anbi bale mapolin, atoni Yerusalem fe sin namolok neu ki. Sin nak, ‘Atoni-atoni mapolin nane sin na'lo na'ko Yerusalem lo le'uf neu he naluli ma nabes neu UISNENO. Pah Israel UISNENO anfe nalali neu kit.’

¹⁶Es nane te, mutiaba Au han ba'an i neu ho biaf ho benuf sin le him bi bale mapolin, mak Au es eki sin ma u'loba sin na'ko uf-uf ma usitib sin neu ale pah. Mes leka sin fe anbi bale nane, of Au hake ok sin.

¹⁷Au, UISNENO Alatan Amnanut Kau, Au uton ak Au of ubuaba sin na'ko pah-pah anbi bale sin nasan'ok, oke te Au fe ufani pah Israel neu sin.

¹⁸Leka sin neki anfani, sin of anpolin ale fatu le'u ma hau le'u hainisit ma le neki hainisit le sin natef nokan.

¹⁹Of Au fe neno fe'u neu sin ma nek mahine fe'u neu sin. Sin nekan le namanu on fatu of Au aiti ma Au seka eki nekaf le natuin neu Kau.

²⁰Ma sin of natuin Au lekat lulut sin ma sin na'ki natuin ale Au plenat sin. Sin of anfani Au to, ma Au fani Uisneno neu sin.

²¹Mes atoni-atoni le anlomi he naluli ma nabes neu fatu le'u ma hau le'u ahainisit me le neki mainisit nane of Au kas sin natuin sin taos mo'et amle'ut nane.” Onle nane UISNENO Anesit Afinit In nakua In a'an.

²²Ahake neno nane sin naplel anteni ma aklet haefen nane sin natuin amsa. Meusine apinat le naton nak Uisneno atoni Israel anhake anbi nane.

²³Nalali te meusine apinat nane nasaitan Yerusalem ma natnani neu tubu anbi kabenan neno saen kot nane.

²⁴Anbi lasi mnitas nane, Smanan Knino Uisneno naiti kau ma neki nafani kau neu atoni-atoni mapolin anbi Babel. Nalali te lasi mnitas nane in namneku kun.

²⁵Oke te au unu'un neu atoni-atoni mapolin nane ale lasi mnitas na'ko UISNENO neu kau.