Read Uab Meto YEHEZKIEL 12 Bible Online

YEHEZKIEL 12 - Uab Meto bible

YEHEZKIEL 12

¹UISNENO nakua anteni In a'an neu kau, nak,

²“Hoi mansian amates, ho mutua ambi atoni-atoni alaban sin atnanken. Sin anmu'i mataf, mes sin ka nit fa; sin anmu'i lukef, mes sin ka nen fa, natuin sin anlomi hen laban.

³Es nane te, hoi mansian amates, leka manas fe anpin, muloitan nai ho bale sin anbi amut mese onle atoni mapolin sin anmo'e nani. Leka mesokan fe ka nem antia fa, musaitan ho ume nai nok mat-mat onle atoni le neki neu bale mapolin. Anmo'e bola' anbi ho ume in aklipit ma maut he atoni alaban sin ansaksi lasi nane, ma meki amut le matua nok bale sin nane ampoi amnao mok bola' nane. Amloi amut nane anbi ho hanum. Amfen ma amnao nai anbi fai mesokan; amtobe ho matam talan te ho ka mit fa lanan le hom nao mokan. Mautu he nati' to Israel ok-oke sin nit ale lasi le ho mo'e nane, he nati' anfani lasi mnaut neu sin. Oni of sin nahin nak sin le nane atoni alaban.”

⁷Oke te au unaoba UISNENO In plenat nane neu kau. Anbi neno nane amsa, leka fe manas, au ubika ale au bale sin anbi amut mese, onle atoni atnanis sin antak hen mo'e. Leka fai he nem antia, au mo'e bola' eki au nimak anbi au ume in lape, oke te poi nao ok bola' nane. Atoni ok-oke sin ankiso kau, au loi amut nane neu au hanuk, oke te au fen ma au nao.

⁸Noka fa te UISNENO nakua a'an neu kau, nak,

⁹“Hoi mansian amates, to Israel, to alaban nane sin natoti nalali neu ko sa' le ho mepu.

¹⁰Es nane te mutiaba neu sin sa' le Au, UISNENO Anesit Afinit Au uton neu sin. Au han ba'an nane Au ululu' neu kesel anbi Yerusalem, ma tuafen kot nane ok-oke.

¹¹Muton neu sin mak sa' le ho mo'e le nane taka' neu sa' le of anbol neu sin esle': sin of anfani atoni mapolin ma le anheke nan sin.

¹²Anbi mesokan fai-fai sin kesel of anloi in amut anbi in hanun oke te in anao. Atoni-atoni of anmo'e bola' anbi lape he nati' nabe'i sin anpoi. In of antobe in matan talan te ka nit fa lanan le in nao nokan.

¹³Mes Au polin Au tifkai he nati' Au heke in. Oke te of Au eki in neu kot Babel, ma in of anmate anbi nane fun in kan nit fa kot nane.

¹⁴Ale atuas anbi sonaf nanan, fun ale in afainekat sin ma kesel in apaot sin nane of Au usana sin neu pah in heun ok-oke. Of Au li'u sin ma Au umate sin.

¹⁵Anbi tabu Au usana sin neu uf-uf bian sin sonan sin atnanan anbi pah-pah atoni bian, sin of nahin nak Au le i UISNENO Kau.

¹⁶Fua fauk na'ko sin of Au ufetin sin na'ko makenat, na'ko amnahas, ma na'ko menas anaek, he nati' anbi uf-uf bian nane sin sonan sin tananan sin of nahin nak sin anmo'e nalali lasi hainisit. Ma sin of nahin nak Au le i UISNENO Kau.”

¹⁷UISNENO nakua In a'an neu kau nak,

¹⁸“Hoi mansian amates, amlilitai nai anbi tabu ho ambukae, ma mumtau nai anbi tabu ho minu.

¹⁹Mutiaba neu ale uf sa' le Au, UISNENO Anesit Afinit le Au uton neu tuafen Yerusalem le fe sin namaika anbi sin ume. Sin of anlilitai anbi tabu sin anbukae ma sin namtau anbi tabu sin ninu. Sin pah of anfani monas, natuin ale atoni le sin natua anbi nane sin antanhai plenat piut-piut.

²⁰Kot-kot le tabu le i nahenu nok atuas anbine of nale'un naskuku nani ma sin lene sin anfani hufui. Ma sin of nahin nak Au le i UISNENO Kau.”

²¹UISNENO nakua In a'an neu kau nak,

²²“Hoi mansian amates, nansa' es atoni Israel sin antek piut nel le i: ‘Batan of masenu ma maseka, mes ale han manta'en nansa' kan bol nit fa’?

²³Nah, mutiaba neu sin mak Au, UISNENO Alatan Amnanut, Au fe neu sin han taes i: Lasi nel nane of Au uneku ani, talan te of kan tek anteni fa anbi Israel. Muton neu sin mak anfani on in asekan in tabu antelen, ma ale han ba'an mese-mese of anbol.

²⁴Anbi Israel of kan mu'i teni fa lasi mnitas ai han ba'an mo'el ma poi.

²⁵Au, UISNENO Anesit Afinit of Au umolok neu Israel, ma ale sa' le Au uton ulali namneo-namneo of anbol, ka natnanib anteni fa. Amnen nai, hoi to alaban! Anbi hi monim of Au unaoba ale sa' le Au umnaoba neu ki. Au, UISNENO Anesit Afinit ukua ulali Au a'ak.”

²⁶UISNENO nakua In a'an neu kau nak,

²⁷“Hoi mansian amates, atoni-atoni Israel sin nak ho lasi mnitas ma ho han ba'an nane in of anbol anbi neno amnemat.

²⁸Es nane te, muton neu sin mak Au, UISNENO Anesit Afinit, Au ukua Au a'ak ak: Ale sa' le Au uton ulali namneo-namneo of anbol, ka natnanib anteni fa. Au, UISNENO Anesit Afinit ukua ulali Au a'ak!”