Read Uab Meto YEHEZKIEL 14 Bible Online

YEHEZKIEL 14 - Uab Meto bible

YEHEZKIEL 14

¹Fauk-fauk na'ko atopus to sin nem neu kau he natoti UISNENO In lomin.

²Oke te UISNENO nakua In a'an neu kau nak,

³“Hoi mansian amates, atoni-atoni le i sin nana'at nalali sin monin neu fatu le'u ma hau le'u talan te sin antam anbi sanat in nanan. Nansa' es sin he natoti neu Kau ka?

⁴Es nane te, mutonan sin mak Au, UISNENO Anesit Afinit utiaba Au han ba'an neu sin on i, ‘Ale atoni Israel le sin nana'at nalali sin aon neu fatu le'u ma hau le'u ma nafetin sin aon antam nalali neu sanat, oke te nem hen toti fainekat na'ko Mafefa knino mese, of Au eknok utae eki han taes le anmatom nok sin fatu le'u ma hau le'u sin amfaun nane!

⁵Ale fatu le'u ma hau le'u nane sin anmo'e talan te Au to sin na'lo na'ko Kau, mes nati' nok Au han taes nane Au to of anfani nem neu Kau.’

⁶Muton amsa neu atoni Israel mak Au, UISNENO Anesit Afinit Au ak neu sin ak, ‘Mite'un nai na'ko hi sanat-sanat sin, ma misaitan ale hi fatu le'u ma hi hau le'u sin le neki amle'ut nane.’

⁷Atoni Israel ai atoni anao amnemat le sin natua anbi to Israel, le sin na'lo na'ko Kau ma le nana'at sin aoken neu fatu le'u ma hau le'u, ma sin antoti fainekat na'ko Mafefa knino mese, Au eknok of utae.

⁸Of Au laban in ma Au mo'e in anfani heta neu atoni bian. Of Au u'lob in na'ko Au to sin, ma Au to sin of nahin nak Au le i UISNENO Kau.

⁹Kalu sin anfuli nalali Mafefa knino mese talan te sin anfe han taes le ansan, Au es a'fuli in. Au, UISNENO Alatan Amnanut of Au u'lob in na'ko atoni-atoni Israel.

¹⁰He Mafefa knino nane ai sin le antoti fainekat nane, sin of napeni kasat papmese.

¹¹Ale nane Au mo'e he nati' atoni Israel kais sin na'lo Kau anteni ma kais nalahi sin aoken neki sanat. Nok nane te sin of anfani Au to, ma Au fani sin Uisneno.” Au, UISNENO Anesit Afinit ukua ulali Au a'ak.

¹²UISNENO nakua In a'an neu kau nak, “Hoi mansian amates,

¹³leka pah mese nasanab ma ka na'ki fa neu Kau, of Au fe kasat neu pah nane. Of Au ule'un uskuku in bukae le naloitan ma nabalab, fe neu sin amnahas anaek ma Au umate atoni ma mu'it.

¹⁴Maski nak Nai Nuh, Nai Danel ma Nai Ayub sin natua anbi bale le i, sin teun sin, sin taos sin mo'et alekot al nafetin sin asmanan anmes. Au, UISNENO Alatan Amnanut ukua ulali Au a'ak.

¹⁵Fun of Au sonu ale mu'it fui he nati' namate tuafen pah nane, talan te pah nane anfani bale hakataus ma katit fa es he nao nokan.

¹⁶Maski nak Nai Nuh, Nai Danel ma Nai Ayub sin natua anbi nane, fun natuin Au, Uisneno amonit, UISNENO Anesit Afinit, sin ka mafetin fa sekau amsa, maski sin anah amsa kahaf. Al sin anmes es nafetnok, mes pah nane of anfani mnela snaen.

¹⁷Oni of Au usanut makenat nem neu pah nane, ma Au sonu bale manuat matani he nale'un atoni ma mu'it.

¹⁸Ma maski atoni tenu en nane sin natua anbi nane, fun natuin Au, Uisneno amonit, UISNENO Anesit Afinit, sin of ka nafetin fa sekau amsa, maski sin anah sin amsa kahaf. Al sin anmes es nafetnok.

¹⁹Oni Au fe nem neu pah nane menas anaek, ma Au usanut Au to'as neune talan te atoni ma mu'it of anmate.

²⁰Ma maski nak Nai Nuh, Nai Danel ma Nai Ayub natua anbi bale nane, fun natuin Au, Uisneno amonit, UISNENO Anesit Afinit, sin of ka nafetin fa sekau amsa, maski sin anah sin amsa kahaf. Al sin anmes es of nafetnok natuin sin taos sin mo'et alekot.”

²¹UISNENO Anesit Afinit nakua In a'an nak, “Of Au usanut Au kasat nono ha le matani le'uf neu Yerusalem he ule'un atoni ma mu'it. Lasi kasat nane esle': lasi amnahas, mu'it abulalut ma menas anaek.

²²Ai es kalu nafetnon ma nafetin sin anah-anah sin, amkiso ma ampanat sin leka sin nem neu ko. Amkiso neu onme sin maufinu nane, ma of hi mihin nak Au taos Au mo'et nane namneo neu Au kas Yerusalem.

²³Oke te of hi mihin nak ale Au taos Au mo'et nane namneo. Au UISNENO Anesit Afinit ukua ulali Au a'ak.”