Read Uab Meto YEHEZKIEL 17 Bible Online

YEHEZKIEL 17 - Uab Meto bible

YEHEZKIEL 17

¹UISNENO nakua In a'an neu kau nak, “Hoi mansian amates, munu'un nu'un i neu atoni-atoni Israel,

²le Au, UISNENO Alatan Amnanut Au lomi he utiaba neu sin: Anmu'i kaka tasi panis mese le anae le'uf le in funun namas ma in ninen menuan ma nahel. In naplel neu Tubu Libanon, ma in an ipu aijob mese in tunan,

⁴oke te in neki ma nabela anbi kot asosa le atoni namfau anbine.

⁵Nalali te in naiti hau sena mese le fe makuke na'ko pah Israel, ma ansenan anbi lene maafa mese, le in oe kan labu nit fa.

⁶Hau sena nane anfani hau tua min kase le anmoni na'pal-pal mes anlaba anao menuan. In atlaen sin an ali neu kaka tasi panis nane, mes in aba'an ansenon antam anbi afu. Hau tua min kase nane na'tem ma namlia kun.

⁷Fun anmu'i kaka tasi panis anae le'uf mese anteni, in ninen menuan ma in funun anmafau. Oke te hau tua min kase nane in nanono in aba'an ma in atlaen neu kaka tasi panis fe'u nane nok panet ma afnekan he nati' kolo nane anfe neune oe naek na'ko oe le anbi lene nane.

⁸Mes hau tua min kase nane in ansenon nalali anbi nani maafa nok oe le nathoe, talan te nabe'i in anmu'i non namfau, nafua namfau, ma anfani hau tua min kase alekot.

⁹Es nane te, Au, UISNENO Alatan Amnanut Au utoti, ak: Nabe'i ka hau tua min kase nane anmoni ma nanae? Ai kaka tasi panis ahunut nane of anbok nani in nok in aba'an sin, nale'un in fuan sin, naipu in atlaen sin ma nafetin in he nati' anmaknene? Kat pake fa nenuf atoni namfau ai uf abe'it ma matani hen bok hau nane talan te in aba'an sin.

¹⁰Namneo in ansenon nahel nalali, mes nabe'i in anmoni piut ma nanae pit? Ai of in kan maknene fa leka anin na'ko Neno Saen anfu in? Ai of in kan meto fa anbi bale le ansenan in?”

¹¹UISNENO nakua In a'an neu kau nak,

¹²“Mutoti neu alaban-alaban nane, sin nahin lasi leta nane in otan ai kahaf. Mutiaba neu sin mak kesel Babel nem nalali neu Yerusalem, ma naiti neki Kesel Yehuda nok anaet-anaet kot nane neu Babel.

¹³Oke te in anbeti mese na'ko Kesel Yehuda nane in-ini, anmo'e lasi manta'en nok in, ma anlelu in hen sup na'ki neu in. Kesel Babel nane in anheke ale atoni-atoni anaet,

¹⁴he nati' plenat Yehuda nane kan fen anfani fa, ma he nati' namneo-namneo nak lasi manta'en nane sin nanokab nani.

¹⁵Mes Kesel Yehuda in anlaban ma in ansonu haef neu Mesir he napeni bikase ma solalus amfaun. Of in nis ai kahaf? Ka nabe'i fa he in nasuan in lasi manta'en fun mes anfe neune kasat!

¹⁶Natuin Au, Uisneno amonit, UISNENO Anesit Afinit, Kesel Yehuda of in anmate anbi Babel, natuin in nasuan nalali in lasi supat nane ma in antanhai in lasi manta'en nok kesel Babel le natokob in anbi toko plenat.

¹⁷Fun solalus Mesir matani nane, ka nabe'i fa hen tuntaku in na'ko atoni-atoni Babel sin maunu le anmo'e kubat na'ko afu ma anhanin lolok he namate atoni namfau.

¹⁸Natuin in antanhai nalali in lasi supat ma in lasi manta'en, in of ka nafetnon fa.

¹⁹Natuin Au, Uisneno amonit, UISNENO Anesit Afinit, Kesel Yehuda of Au fe neune kasat natuin in antanhai nalali in lasi manta'en nok kesel Babel, fun anbi ahunut in ansup nalali anbi Au kanak he nati' in nanokab nani.

²⁰Of Au polin Au tifkai he nati' Au heke in. Of Au eki in neu Babel ma of Au kas in anbi nane, natuin in ka na'ki fa neu Kau.

²¹In solalus sin le abe'it ma matani of sin anmate anbi makenat in nanan, ma le nafetnok of nasan'ok neu ale bale. Ma Au to of sin nahin nak Au, UISNENO ukua ulali Au a'ak.”

²²Lasi ie es UISNENO Alatan Amnanut namolok nalali, “Natuin hau aijob amnanut, of Au ketu in tunan oke te Au ipu in atlaefes le fe makuke; Au senan atlaef nane anbi tubu le amnanut anhaumak nope.

²³Anbi tubu amnanut anbi Israel, Au senan in. Anbi nane of in anmoni, ma napoitan fuan, oke te anfani hau aijob le amasat kun. Ale kolo huma-huma of anmo'e kuna anbine ma nahaoftok anbi in hafon.

²⁴Ale hau anbi pah of nahin nak Au le i UISNENO Kau. Hau le namnanu Au ufae; hau apalat Au mo'e anmoni namnanu. Hau amliat Au mo'e ma anmeto; ma hau le anmeto Au mo'e anmoni ma nanae. Au, UISNENO Kau, ukua ulali Au a'ak, ale Au a'ak of nanaobon.”